గోరటి వెంకన్నకు గౌరవ డాక్టరేట్‌ ప్రదానం

పటాన్‌చెరు, న్యూస్‌టుడే: ప్రముఖ కవి, ఎమ్మెల్సీ గోరటి వెంకన్నకు గీతం డీమ్డ్‌ విశ్వవిద్యాలయం గౌరవ డాక్టరేట్‌ ప్రదానం చేసింది. శనివారం జరిగిన స్నాతకోత్సవంలో ఇండియన్‌ స్కూల్‌ ఆఫ్‌ బిజినెస్‌(ఐఎస్‌బీ) డీన్‌ ప్రమత్‌ రాజ్‌సిన్హా దీన్ని అందజేశారు. ఈ సందర్భంగా గోరటి వెంకన్న మాట్లాడుతూ అత్తెసరు మార్కులతో ఎంఏ(తెలుగు) ఉత్తీర్ణుడైన తనను డాక్టరేట్‌తో సత్కరించడం ఆనందాన్నిచ్చిందన్నారు. ఐఎస్‌బీ డీన్‌ ప్రమత్‌ రాజ్‌సిన్హా మాట్లాడుతూ కనిపెంచిన తల్లిదండ్రులు, విద్యాబుద్ధులు నేర్పించిన గురువుల పట్ల కృతజ్ఞతాభావంతో ఉండాలన్నారు. ఈ సందర్భంగా 1,141 మంది విద్యార్థులకు పట్టాలు అందజేశారు. 21 మందికి బంగారు పతకాలు ప్రదానం చేశారు. ‘గీతం’ అధ్యక్షుడు శ్రీభరత్‌, కార్యదర్శి భరద్వాజ్‌, ఉపకులపతి దయానంద్‌, అదనపు ఉపకులపతి డీఎస్‌రావు తదితరులు పాల్గొన్నారు.