నోరు ఆరోగ్యంగా ఉండాలంటే..!

ఆయిల్‌ పుల్లింగ్‌ ప్రక్రియ ద్వారా బోలెడన్ని ప్రయోజనాలు చేకూరతాయంటున్నారు నిపుణులు. ఈ క్రమంలో మన వంటింట్లో ఉండే కొన్ని రకాల నూనెలతో నోటిని పుక్కిలించడం వల్ల నోరు శుభ్రపడడమే కాదు.. ఇతర ఆరోగ్య ప్రయోజనాలూ చేకూరతాయని వారు సూచిస్తున్నారు.

⚛ మన నోట్లో వందల సంఖ్యలో సూక్ష్మక్రిములు ఉంటాయట. అందులో కొన్ని హానికరమైనవి కూడా ఉంటాయి. అవి పంటి నొప్పి, చిగుళ్లకు సంబంధించిన వ్యాధులు, నోటి దుర్వాసనకు కారణమవుతాయి. అయితే ఆయిల్ పుల్లింగ్‌ ప్రక్రియ ఇలాంటి బ్యాక్టీరియాను తొలగించగలదని కొన్ని అధ్యయనాల్లో వెల్లడైంది.

⚛ నోటిని చక్కగా శుభ్రపరచుకోకపోవడం, నోటి ఇన్ఫెక్షన్లు, చిగుళ్లలో సమస్యల వల్ల నోటి దుర్వాసన రావడం కామన్‌. అయితే ఈ సమస్య నుంచి బయటపడాలంటే బయట దొరికే మౌత్‌వాష్‌ల కంటే మన వంటింట్లో ఉండే నూనెలే సమర్థంగా పని చేస్తాయంటున్నారు నిపుణులు.

⚛ చక్కెర, చక్కెర సంబంధిత పదార్థాలు అధికంగా తీసుకోవడం, దంతాల మధ్య చిక్కుకున్న పదార్థాల అవశేషాలను తొలగించుకోకపోవడం వల్ల పళ్లు పుచ్చిపోవడం మనం గమనిస్తూనే ఉంటాం. ఇలాంటి సమస్య రాకుండా ఉండేందుకు ఆయిల్‌ పుల్లింగ్‌ మంచి చిట్కా అంటున్నారు నిపుణులు. రోజూ ఉదయాన్నే బ్రష్‌ చేసుకున్న తర్వాత ఆయిల్‌ పుల్లింగ్‌ చేయడం వల్ల చెడు బ్యాక్టీరియా నశిస్తుందంటున్నారు. 

⚛ ఈ ప్రక్రియ ద్వారా దవడ, మెడ కండరాలకు చక్కటి వ్యాయామం అందుతుందంటున్నారు నిపుణులు.

ఎలా చేయాలంటే?

నోటి ఆరోగ్యానికి దోహదం చేసే ఆయిల్‌ పుల్లింగ్‌ ప్రక్రియను పాటించడానికీ ఓ పద్ధతుందంటున్నారు దంత వైద్య నిపుణులు. ఈక్రమంలో ముచ్చటగా ఈ మూడు చిట్కాల్ని పాటించాలని సూచిస్తున్నారు.

⚛ ఆయిల్‌ పుల్లింగ్‌కి కొబ్బరి/ఆలివ్‌/నువ్వుల నూనెలు చక్కటి ఎంపిక. వీటిలో ఏదో ఒక దాన్ని ఎంచుకొని టేబుల్‌స్పూన్‌ నూనెను నోట్లోకి తీసుకోవాలి.

⚛ ఆపై 15 నుంచి ఇరవై నిమిషాల పాటు ఆ నూనె నోట్లోని మూలమూలకు వెళ్లేలా పుక్కిలిస్తూ ఉండాలి. ఈ క్రమంలో దీన్ని మింగకుండా జాగ్రత్తపడాలి. పని పూర్తయ్యాక ఉమ్మివేయాలి.

⚛ ఇక ఏదైనా తినేముందు లేదా తాగే ముందు నోటిని శుభ్రపరచుకొని ఆ తర్వాత ఆహారం తీసుకోవడం మంచిది. అలాగే ఆహారం తీసుకున్న తర్వాత సైతం నోటిని శుభ్రపరచుకోవాలి.