ఏమా కళ్లు... వాహ్‌ ఆ నవ్వు..!

ఆ కళ్లు చూడు... నాతో ఏవేవో ఊసులు చెబుతుంటాయి. తను నవ్వుతోంటే ముత్యాలు రాలుతున్నట్టే అనిపిస్తుంది. ఆ నవ్వుకే నేను ఫిదా! నచ్చిన అమ్మాయి విషయంలో అబ్బాయిల నుంచి వచ్చే పొగడ్తలే ఇవి కదూ! కేవలం సిగ్గు మొగ్గలేసే కళ్లని చూసి, గాజుల గలగలకు మనసు పారేసుకున్నానని చెప్పే కథలూ బోలెడు.

మరి ఆ మాటే నచ్చిందో... పొగడ్తకే పడిపోయారో కానీ... ఈమధ్య కళ్లు, చిరునవ్వు, ఒక పక్క ముఖం, గాజులతో నిండిన చేతులు, గజ్జెలున్న పాదాలు... ఇలా ఒక్కోదాన్నీ హైలెట్‌ చేస్తూ ఫొటోలు తీసుకుంటున్నారు అమ్మాయిలు. ఆపై వాటిని కొలేజ్‌గా మార్చి పంచుకుంటున్నారు. సెలెక్టివ్‌ ఫోకస్, క్రాప్‌డ్‌ పోర్ట్రెయిట్, మాక్రో ఫొటోగ్రఫీ అంటూ సోషల్‌మీడియాలో ట్రెండ్‌నీ చేస్తున్నారు. ఇక ఆ తరవాత చూడాలి... వాటిని పొగుడుతూ ఎన్ని కామెంట్లో. ఇంకేం తమ ముఖంలో వాళ్లు మెచ్చే భాగాన్ని మరింత అందంగా సృజనాత్మకతను జోడించి మరీ ఫొటోల్లో బంధించేస్తున్నారు. ఇది సరదా విషయమే కాదు, దీనిలో కొంత జాగ్రత్త కూడా ఉంది. తీసుకున్న ఫొటో నలుగురితో పంచుకోవాలని చాలామంది కోరుకునేదే! అయితే అవి ఏ దురుద్దేశం ఉన్నవారి చేతుల్లో పడుతున్నాయో అనే భయం. అలాగని సోషల్‌మీడియాకి దూరంగా ఉండలేరు. అలా భావించే అమ్మాయిలూ ఈ ట్రెండ్‌లో భాగమవుతున్నారు. అంతేకాదు... నీ కళ్లు కాస్త చిన్న. నీ పళ్లేంటి అలా ఉన్నాయి... హుష్‌... ఎలాగున్నా ఎన్నెన్ని వంకలు. ఎంత పట్టించుకోవద్దు అనుకున్నా మనసులో ఏ మూలో గాయపరచకుండా ఉంటాయా? అందుకని వెక్కిరించకుండా కూడా ఇలా ప్రయత్నిస్తున్నారట. పోనీ అలాకాకపోయినా తమలో తామే వంకలు వెతుక్కునే అమ్మాయిలూ ఎక్కువే. అలాంటివాళ్లు అరె ఇలా ఉన్నానే అని బాధపడకుండా తమలోని స్ట్రాంగ్‌ పాయింట్‌ ఏంటా అని వెతుక్కుంటున్నారట. వాటినే చూపిస్తూ కితాబులు అందుకుంటున్నారు. ఎవరి కారణమేదైనా ఈ సెలెక్టివ్‌ ఫోకస్, క్రాప్‌డ్‌ పోర్ట్రెయిట్‌ ఫొటోగ్రఫీ అమ్మాయిలను మెప్పించిందన్నది వాస్తవం. కాబట్టే, తెగ అనుసరించేస్తున్నారు. మరి మీ సంగతేంటి? మీకూ నచ్చిందా? చెడు కామెంట్లు, ఫొటో ఎవరి చేతిలో పడుతుందన్న భయం లేదు. పైగా వాహ్‌ అనిపించే పొగడ్తలు అదనం. ఇంకేం ప్రయత్నించండి మరి.