Bomb blasts: బాంబు పేలుళ్లతో దద్దరిల్లిన అఫ్గాన్‌.. 33మంది మృతి

(ప్రతీకాత్మక చిత్రం)

కాబూల్‌: అఫ్గానిస్థాన్‌ మరోసారి బాంబు దాడులతో దద్దరిల్లింది. శుక్రవారం ప్రార్థనలు జరుగుతున్న వేళ మసీదు, ఓ మతపరమైన పాఠశాల లక్ష్యంగా చేసుకొని ముష్కర మూకలు బాంబు దాడులకు పాల్పడ్డారు. ఈ ఘటనలో 33 మంది మృతిచెందగా.. 43 మందికి పైగా గాయపడినట్టు తాలిబన్‌ ప్రభుత్వ అధికార ప్రతినిధి జబీహుల్లా ముజాహిద్‌ తెలిపారు. వీరిలో అధికంగా విద్యార్థులే ఉన్నట్టు పేర్కొన్నారు. కుందుజ్‌ ప్రావిన్స్‌లోని ఇమామ్‌ సాహెబ్‌ పట్టణంలో ఈ దారుణం చోటుచేసుకున్నట్టు ఆయన ట్విటర్‌లో తెలిపారు. ఈ ఘాతుక చర్యను ఖండించిన ముజాహిద్‌.. మృతులకు తన ప్రగాఢ సంతాపం ప్రకటించారు. మరోవైపు, గురువారం మజర్‌-ఈ-షరిఫ్‌ ప్రావిన్స్‌లోని ఓ మసీదులో బాంబు పేలుడు జరగ్గా.. దాదాపు 10మంది ప్రాణాలు కోల్పోయారు. అయితే, ఈ బాంబు దాడులకు బాధ్యత వహిస్తూ ఏ సంస్థా ఇప్పటివరకు ప్రకటన చేయలేదు. కానీ, ఇది అఫ్గానిస్థాన్‌ ఇస్లామిక్‌ స్టేట్‌ అనుబంధ సంస్థ పనే అయి ఉంటుందని భావిస్తున్నారు.