Boeing 737: రన్‌వే పై జారిన బోయింగ్‌ 737 విమానం.. 10మందికి గాయాలు

డాకర్‌: ప్రయాణికులతో బయల్దేరిన బోయింగ్‌ 737 విమానం ప్రమాదానికి గురైంది. సెనెగల్‌ రాజధాని డాకర్‌ విమానాశ్రయంలో విమానం రన్‌వేపై జారింది. ఈ ఘటనలో పది మందికి గాయాలైనట్లు ఆ దేశ రవాణా శాఖ మంత్రి వెల్లడించారు. ట్రాన్స్‌ఎయిర్‌ సంస్థకు చెందిన ఎయిర్‌ సెనెగల్‌ విమానం బుధవారం అర్ధరాత్రి బమాకోకు బయల్దేరి వెళ్తున్న సమయంలో ఈ ఘటన చోటుచేసుకుంది. ఆ సమయంలో విమానంలో మొత్తం 85మంది ఉండగా.. వీరిలో 79మంది ప్రయాణికులతో పాటు ఇద్దరు పైలట్లు, నలుగురు క్యాబిన్‌ సిబ్బంది ఉన్నట్లు మంత్రి తెలిపారు. క్షతగాత్రులను ఆస్పత్రికి తరలించి చికిత్స అందించగా.. మిగతా అందరినీ విశ్రాంతి కోసం హోటల్‌కు తరలించినట్లు పేర్కొన్నారు.