శరీర బరువునూ, మధుమేహాన్నీ తగ్గించే రసాయనం

వాషింగ్టన్‌: బేరియాట్రిక్‌ శస్త్రచికిత్స చేయించుకోకుండానే స్థూలకాయాన్నీ, మధుమేహాన్నీ తగ్గించడానికి తోడ్పడే కొత్త రసాయనాన్ని రాబర్ట్‌ డాయల్‌, క్రిస్టియన్‌ రాత్‌ అనే అమెరికన్‌ పరిశోధకులు కనుగొన్నారు. ఈ రసాయనం లేదా పెప్టైడ్‌ శరీర బరువుతోపాటు మధుమేహాన్నీ తగ్గిస్తుంది. బేరియాట్రిక్‌ శస్త్రచికిత్స తరువాత ఉదరంలో గ్లూకగాన్‌ తరహా పెప్టైడ్‌-1 (జీఎల్పీ-1), పెప్టైడ్‌ వైవై (పీవైవై) అనే హార్మోన్ల స్థాయులు మారతాయి. దానివల్ల కొంచెం తిన్నా కడుపు నిండిపోయి ఆకలి తీరిన అనుభూతి కలిగి, తద్వారా రక్తంలో చక్కెర శాతం తగ్గిపోతుంది. క్లోమ గ్రంథిలో, మెదడులో జీఎల్పీ-1 రిసెప్టర్లను ప్రేరేపించి కడుపు నిండిపోయిన అనుభూతిని కలిగించే లిరాగ్లుటైడ్‌ అనే మందు మార్కెట్‌లో అందుబాటులో ఉంది. జీఎల్పీ-1ను మాత్రమే ప్రేరేపించే లిరాగ్లుటైడ్‌ ఇంజెక్షన్‌ కన్నా మూడు రెట్లు ఎక్కువ బరువును తగ్గించే జీఈపీ-44 పెప్టైడ్‌ను డాయల్‌ బృందం రూపొందించింది. అది జీఎల్పీ-1తోపాటు పీవైవై రిసెప్టార్లనూ ప్రేరేపించి 80 శాతం తక్కువ తిండితోనే సరిపెట్టుకునేట్లు చేస్తుందని ఎలుకల మీద పరిశోధనలు తేల్చాయి. లిరాగ్లుటైడ్‌ మాదిరిగా ఈ పెప్టైడ్‌ వాంతులు, తలతిరుగుడు వంటి ప్రభావాలను కలిగించదు.