రష్యా దళాలపై ‘మౌస్‌ ఫీవర్‌’ ప్రభావం

పెద్దగా పట్టించుకోని మాస్కో కమాండర్లు: ఉక్రెయిన్‌

మాస్కో: రష్యా సైనికులు మౌస్‌ ఫీవర్‌తో బాధపడుతున్నారని, ఆ వ్యాధి మాస్కో బలగాలను తీవ్రంగా దెబ్బతీస్తోందని ఉక్రెయిన్‌ నిఘా సమాచారాన్ని ఉటంకిస్తూ అంతర్జాతీయ మీడియాలో కథనాలు వెలువడ్డాయి. ఈ చలికాలంలో సరైన సదుపాయాలు కొరవడడంతో కప్యాన్స్క్‌లోని రష్యన్‌ దళాల్లో ఈ మౌస్‌ ఫీవర్‌ ప్రబలిందని ఉక్రెయిన్‌ నిఘా విభాగం పేర్కొంది. ఇది ఒక బ్యాక్టీరియల్‌ ఇన్ఫెక్షన్‌. ఎలుకలను తాకినప్పుడు, వాటి వ్యర్థాల మీదుగా వచ్చే గాలిని పీల్చినప్పుడు సోకే అవకాశం ఉంటుంది. ఈ వ్యాధి బారినపడినవారిలో తీవ్రమైన తలనొప్పి, జ్వరం, దద్దుర్లు, ఎర్రగా కందిపోవడం, బీపీ తగ్గడం, కళ్లు ఎర్రగా మారిపోవడం, పలుమార్లు వాంతులు కావడం వంటి లక్షణాలు కనిపిస్తాయని తెలిపింది. అయితే ఈ వ్యాధి వ్యాప్తిని రష్యా కమాండర్లు పట్టించుకోవడం లేదని ఉక్రెయిన్‌ నిఘా విభాగం వెల్లడించింది.