న్యూయార్క్‌లో భారత మహిళ ఆత్మహత్య..

కుమార్తెలకు జన్మనిచ్చావంటూ భర్త వేధింపులు.. అత్తింటివారి సూటిపోటి మాటలు భరించలేని ఓ ప్రవాస భారతీయురాలు తనువు చాలించింది. అంతకుముందే తన బాధలను వెళ్లగక్కుతూ ట్విటర్‌లో ఓ వీడియో పోస్ట్‌ చేసింది. ఉత్తర్‌ప్రదేశ్‌లోని బిజ్నోర్‌కు చెందిన మన్‌దీప్‌ కౌర్‌(30)కు రన్‌జోద్‌బీర్‌ సింగ్‌ సంధుతో 2015లో వివాహం జరిగింది. వీరు అమెరికాలోని న్యూయార్క్‌కు వలస వెళ్లారు. వారికి 4, 2 ఏళ్ల ఇద్దరు కూతుళ్లు ఉన్నారు. కుమార్తెలు పుట్టినప్పటినుంచి కౌర్‌కు వేధింపులు మొదలయ్యాయి. భర్త శారీరకంగా హింసించేవాడు. అత్తింటివారు సైతం మానసికంగా హింసించేవారు. ‘ఆత్మహత్య చేసుకొని చనిపొమ్మంటూ అత్తింటివారు వేధిస్తున్నారు’ అని కౌర్‌ ఆ వీడియోలో వాపోవడం ఆమె దీనస్థితికి అద్దం పడుతోంది. భర్త దాడులకు సంబంధించి పలు వీడియోలు కూడా సోషల్‌ మీడియాలో వైరల్‌గా మారాయి. ఎనిమిదేళ్లుగా ఈ బాధలను అనుభవిస్తున్నానని, ఇకనైనా భర్త మారతాడేమోనని ఆశిస్తున్నట్లు ఆమె తెలిపింది. ఇన్ని బాధలను అనుభవిస్తూ ఇకపై బతికుండలేనని పేర్కొంటూ.. ఆపై ఆత్మహత్యకు పాల్పడింది. యూపీలోని మృతురాలి తల్లిదండ్రులు ఈ విషయాన్ని వెల్లడించడంతో ఈ ఘటన వెలుగులోకి వచ్చింది.