మాస్కోకు మరో వ్యూహాత్మక ఎదురుదెబ్బ

లీమన్‌ నగరాన్ని చుట్టుముట్టిన ఉక్రెయిన్‌ దళాలు

పారిపోయిన పుతిన్‌ సేనలు

కీవ్‌: ఉక్రెయిన్‌తో యుద్ధంలో గత నెల నుంచి వరుస ఓటములు ఎదుర్కొంటున్న రష్యాకు మరో ఎదురుదెబ్బ తగిలింది. పుతిన్‌ దళాల అధీనంలోని ఖర్కీవ్‌లోని రెండో అతి పెద్ద నగరమైన లీమన్‌ను ఉక్రెయిన్‌ దళాలు అన్ని వైపుల నుంచి చుట్టుముట్టాయి. దీంతో తప్పనిసరి పరిస్థితుల్లో అక్కడి నుంచి మాస్కో తన దళాలను ఉపసంహరించుకోవాల్సి వచ్చింది. ఇది జెలెన్‌స్కీ సేనకు వ్యూహాత్మక విజయమని విశ్లేషకులు చెబుతున్నారు. రష్యా కూడా దీనిపై ప్రకటన చేసింది. తమ దళాలను.. ప్రత్యర్థులు చుట్టుముట్టలేదని.. వ్యూహాత్మకంగా అక్కడి నుంచి ఖాళీ చేశామని తెలిపింది. మరోవైపు కుపియాన్స్కీ జిల్లాలో పౌరులను సురక్షిత ప్రాంతానికి తరలిస్తున్న వాహనశ్రేణిపై మోర్టార్లతో దాడులు జరిపి, 20 మంది అమాయక పౌరుల ప్రాణాలను రష్యా బలిగొందని ఉక్రెయిన్‌ వర్గాలు ఆరోపించాయి.

‘జపొరీజియా’ అణువిద్యుత్కేంద్ర డైరెక్టర్‌ కిడ్నాప్‌
జపొరీజియా అణు విద్యుత్కేంద్ర డైరెక్టర్‌ మురషోవ్‌ను రష్యా దళాలు అపహరించాయని ఉక్రెయిన్‌ అణు సంస్థ ‘ఎనర్గో ఆటం’ తెలిపింది. శుక్రవారం తన నివాసం నుంచి కారులో విద్యుత్కేంద్రానికి  వెళుతున్న మురషోవ్‌ను అడ్డగించిన మాస్కో సైన్యం.. అతని కళ్లకు గంతలు కట్టి ఎత్తుకెళ్లారని పేర్కొంది. ఈ అపహరణతో ఐరోపాలోని అతిపెద్ద అణు విద్యుత్‌ కేంద్రం భద్రత ప్రశ్నార్థకంగా మారిందని ఆ సంస్థ ఆందోళన వ్యక్తం చేసింది.దీనిపై రష్యా ఇప్పటివరకు ఎలాంటి ప్రకటన చేయలేదు.