విజయానికి చేరువలో నేపాలీ కాంగ్రెస్‌

కాఠ్‌మాండూ: నేపాల్‌ పార్లమెంటరీ ఎన్నికల్లో అధికార నేపాలీ కాంగ్రెస్‌ (ఎన్‌సీ) పార్టీ నేతృత్వంలోని కూటమి విజయానికి మరింత చేరువైంది. ఇప్పటివరకు 124 స్థానాల ఫలితాలు వెలువడగా.. వాటిలో 67 సీట్లు దాని ఖాతాలోకే వెళ్లాయి. ఇందులో ఒక్క ఎన్‌సీ వాటాయే 42. నేపాల్‌ ప్రతినిధుల సభలో మొత్తం సభ్యుల సంఖ్య 275. ఇందులో 165 మందిని ప్రత్యక్ష ఓటింగ్‌ విధానంలో ఎన్నుకుంటారు. మిగతా 110 మంది ఎన్నికను దామాషా విధానంలో పూర్తిచేస్తారు. ఏదైనా పార్టీ/కూటమి మొత్తంగా 138 స్థానాలను దక్కించుకోగలిగితే స్పష్టమైన మెజార్టీతో ప్రభుత్వాన్ని ఏర్పాటుచేయగలుగుతుంది. తాజా ఎన్నికల్లో ఇప్పటికే ఏకైక అతిపెద్ద పార్టీగా అవతరించిన ఎన్‌సీ.. తన మిత్రపక్షాలైన సీపీఎన్‌-మావోయిస్టు సెంటర్‌, సీపీఎన్‌ యూనిఫైడ్‌ సోషలిస్ట్‌ తదితర పార్టీలతో కలిసి సర్కారును ఏర్పాటుచేయడం ఇక దాదాపు లాంఛనప్రాయమే. ప్రతిపక్ష సీపీఎన్‌-యూఎంఎల్‌ నేతృత్వంలోని కూటమి ఇప్పటివరకు 38 స్థానాలు గెల్చుకుంది.