Crocodile Attack: మొసలి కళ్లలో పొడిచి.. ప్రాణాలతో బయటపడి!

కాన్‌బెర్రా: ఆస్ట్రేలియా (Australia)లో ఒళ్లు గగుర్పొడిచే ఘటన చోటుచేసుకుంది. మొసలి నోట చిక్కిన ఓ వ్యక్తి.. చాకచక్యంతో దాని బారినుంచి తప్పించుకోవడం గమనార్హం. స్థానిక అధికారుల వివరాల ప్రకారం.. 44 ఏళ్ల వయసున్న ఓ వ్యక్తి ఇక్కడి క్వీన్స్‌లాండ్‌ (Queensland)లోని కూక్‌టౌన్‌ వద్ద సముద్రంలో చేపలు పట్టేందుకు దిగాడు. ఈ క్రమంలోనే దాదాపు 4.5 మీటర్ల పొడవున్న ఓ మొసలి (Crocodile) తనను సమీపిస్తున్నట్లు గుర్తించాడు. ఈ క్రమంలోనే తప్పించుకునేందుకు విఫలయత్నం చేశాడు. అయితే, అతనిపై మూడు సార్లు దాడి(Crocodile Attack) చేసిన ఆ మకరం.. ఆపై నోటకరచుకుని నీటి అడుగు భాగానికి లాక్కెళ్లింది.

ఈ క్రమంలోనే చాకచక్యంగా వ్యవహరించిన ఆ బాధితుడు.. తన చేతి వేళ్లతో మొసలి కళ్లలో పొడిచాడు. దీంతో అది అతన్ని విడిచిపెట్టగా.. బతుకు జీవుడా అంటూ ప్రాణాలతో తీరానికి చేరుకున్నాడు. ఈ దాడిలో అతని తల, కాళ్లు, భుజాలకు తీవ్ర గాయాలయ్యాయి. వెంటనే అతన్ని ఆస్పత్రికి తరలించి, చికిత్స అందిస్తున్నారు. మరోవైపు ఈ ఘటనపై అప్రమత్తమైన అధికారులు.. ఆ ప్రాంతానికి వచ్చేవారు జాగ్రత్తగా ఉండాలని హెచ్చరికలు జారీ చేశారు. క్వీన్స్‌ల్యాండ్ డిపార్ట్‌మెంట్ ఆఫ్ ఎన్విరాన్‌మెంట్ అండ్ సైన్స్ గణాంకాల ప్రకారం.. 2020 నుంచి ఈ ఏడాది మార్చి వరకు ఇక్కడ మొత్తం ఎనిమిది మొసలి దాడులు జరగగా.. ఒకరు మృతి చెందారు.