Maldives: మాల్దీవుల అధ్యక్షుడి అభిశంసనకు విపక్షాలు సిద్ధం..!

మాలె: మాల్దీవుల(Maldives) అధ్యక్షుడు మహమ్మద్‌ ముయిజ్జు(President Mohamed Muizzu)పై ఆ దేశ పార్లమెంట్‌లో అభిశంసన తీర్మానం పెట్టే అవకాశాలు కనిపిస్తున్నాయి. దీనికి అవసరమైన సంతకాలను ప్రతిపక్ష పార్టీలు సేకరించినట్లు స్థానిక మీడియా కథనాలు వెల్లడించాయి. ఈక్రమంలో పార్లమెంట్‌లో భద్రతను కట్టుదిట్టం చేశారు. ఇతర  పార్టీలతో కలిసి తాము సంతకాలు సేకరించినట్లుగా ప్రధాన ప్రతిపక్షం మాల్దీవియన్‌ డెమొక్రటిక్‌ పార్టీ(MDP) ఎంపీ చెప్పినట్లు కథనాలు వెలువడ్డాయి.

అధికార, విపక్ష ఎంపీల తోపులాటలు, ముష్టిఘాతాలతో మాల్దీవుల పార్లమెంట్‌ అట్టుడికిన తరుణంలో ఈ వార్తలు వెలుగులోకి రావడం గమనార్హం. మాల్దీవుల కేబినెట్‌ తీసుకున్న నిర్ణయంపై పార్లమెంటులో ఆదివారం ఓటింగ్‌ నిర్వహించారు. ఈ క్రమంలో అధికార, ప్రతిపక్ష ఎంపీలు సభలో గందరగోళం సృష్టించారు. పోడియం పైకి వెళ్లిన కొందరు సభ్యులు స్పీకర్‌ కార్యకలాపాలను అడ్డుకున్నారు. మరికొందరు సభ్యులూ అక్కడికి చేరుకొని స్పీకర్‌తో వాగ్వాదానికి దిగారు. బెంచీల పైనుంచి దూసుకెళ్లి స్పీకర్‌ను తోసివేసే ప్రయత్నం చేశారు. అనంతరం ఎంపీలు ఒకరిపైఒకరు ముష్టిఘాతాలు కురిపించుకున్నారు.