Navalny: పుతిన్ ప్రత్యర్థి నావల్నీ.. ఎట్టకేలకు ఆచూకీ లభ్యం!

మాస్కో: రష్యాలో అవినీతి వ్యతిరేక ఫౌండేషన్‌ వ్యవస్థాపకుడు, పుతిన్‌ (Putin) విధానాలను తీవ్రస్థాయిలో విమర్శించే విపక్ష నేత అలెక్సీ నావల్నీ (Alexei Navalny) జైలు నుంచి అదృశ్యమైనట్లు ఇటీవల వార్తలు వచ్చిన విషయం తెలిసిందే. మరికొన్ని నెలల్లో రష్యాలో అధ్యక్ష ఎన్నికల వేళ ఈ పరిణామం వెలుగులోకి రావడం చర్చనీయాంశమైంది. అయితే.. ఎట్టకేలకు నావల్నీ ఆచూకీ లభించినట్లు తెలుస్తోంది. ఆయన ప్రతినిధి కిరా యార్మిష్‌ ఈ విషయాన్ని ధ్రువీకరించారు. మాస్కోకు ఈశాన్యంగా 1,900 కి.మీల దూరంలో, యమల్‌- నెనెత్స్‌ రీజియన్‌లోని ఖార్ప్ పట్టణంలో ఉన్న పీనల్‌ కాలనీ (జైలు)లో నావల్నీని గుర్తించినట్లు ‘ఎక్స్‌’ వేదికగా వెల్లడించారు.

నావల్నీ.. జైలులో మిస్సింగ్‌..!

ఫౌండేషన్‌ కార్యకలాపాల విషయంలో నమోదైన కేసులో అలెక్సీ నావల్నీకి ఈ ఆగస్టులో 19 ఏళ్ల జైలు శిక్ష పడింది. తర్వాత ఆయన్ను రష్యా రాజధాని మాస్కోకు 230 కి.మీల దూరంలో ఉన్న పీనల్ కాలనీ(జైలు)కి తరలించినట్లు సమాచారం. అయితే.. డిసెంబరు 6 నుంచి నావల్నీని తాము సంప్రదించలేకపోతున్నామని ఆయన తరఫు న్యాయవాదులు డిసెంబరు రెండో వారంలో వెల్లడించారు. ‘గత వారం ఆయన తన జైలుగదిలో అనారోగ్యానికి గురయ్యారు. అప్పటి నుంచే కనిపించడం లేదు’ అని ఆందోళన వ్యక్తం చేశారు. అమెరికా సైతం ఈ వ్యవహారంపై ఆందోళన వ్యక్తం చేసింది. ఈ పరిణామాల నడుమ మూడు వారాలకు ఆయన ఆచూకీ లభ్యమైంది.