వీళ్లు చాలా స్పెషల్‌

అవీ ఇవీ...

వీళ్లు చాలా స్పెషల్‌

వాళ్ల శరీర వయసు 20 ఏళ్లకు అటు ఇటుగా ఉంటుంది. కానీ వాళ్ల మనసు వయసు మాత్రం పదేళ్లే! చూడటానికి కుర్రాళ్లలా కనిపిస్తారు కానీ.. చేష్టలు మాత్రం పదేళ్ల పిల్లలవి! శరీరం పెరిగినా.. మానసికంగా మాత్రం చిన్నవాళ్లే. అయితేనేం.. వాళ్లే అద్భుతాలు చేస్తున్నారు. మేధో వైకల్యంతో బాధపడుతున్నా.. ‘ప్రత్యేక’ లక్షణాలతో సంచలనాలు సృష్టిస్తున్నారు. వైకల్యాన్ని అధిగమించి.. విధిని ఎదిరించి.. విజేతలుగా నిలిచారు. ఇటీవల అబుదాబిలో ముగిసిన స్పెషల్‌ ఒలింపిక్స్‌లో వీళ్లంతా పతకాలతో ఔరా అనిపించారు. తెలుగు రాష్ట్రాల నుంచి ప్రపంచ స్థాయి వేదికపై మెరుపులు మెరిపించిన కౌశిక్‌ అశోక్‌ అద్వైత్‌, హరివంశ్‌ సమంత్‌, ఖాలీద్‌ బెల్లారి, మహమ్మద్‌ దస్తగిరి గులామ్‌ల గురించే ఈ ఉపోద్ఘాతమంతా. తపన ఉండాలే కానీ ఎలాంటి వైకల్యం కూడా అడ్డురాదని నిరూపిస్తున్న వీళ్ల గాథలు స్ఫూర్తిదాయకం.

ఈత కొడితే పతకమే

వయసు పెరుగుతోంది కానీ అతను పిల్లాడిలాగే ప్రవర్తిస్తున్నాడు. ఆ తల్లిదండ్రుల్లో ఆందోళన మొదలైంది. ఒకట్రెండేళ్లు చూద్దాం అని ఓపిక పట్టారు. అయినా పరిస్థితిలో మార్పులేదు. అతనికి మేధో వైకల్యం ఉందని అర్థమైంది. దీంతో వాళ్లు నిరాశలో మునిగిపోయారు. కానీ అప్పుడు బాధపడ్డ వాళ్లే ఇప్పుడు తమ కొడుకును చూసి గర్వపడుతున్నారు. ప్రత్యేక ఒలింపిక్స్‌ స్విమ్మింగ్‌ బ్యాక్‌స్ట్రోక్‌ విభాగంలో అతను రజతంతో సత్తా చాటడమే దానికి కారణం. ఒలింపిక్స్‌ పతకంతో దేశంతో పాటు రాష్ట్రానికే గర్వకారణంగా నిలిచిన ఆ కుర్రాడు 19 ఏళ్ల అశోక్‌ అద్వైత్‌. హైదరాబాద్‌లోని బోయిన్‌పల్లికి చెందిన అద్వైత్‌ చిన్నతనంలోనే స్విమ్మింగ్‌పై ఆసక్తి కనబరచాడు. వైకల్యం ఉన్నా కూడా ఈతపై శ్రద్ధ పెట్టాడు. అతడి ఆసక్తిని గమనించి తల్లిదండ్రులు ప్రోత్సహించారు. వాళ్లే దగ్గర ఉండి మరీ స్విమ్మింగ్‌ సాధన చేయించేవాళ్లు. ఆ తర్వాత గచ్చిబౌలిలోని స్విమ్మింగ్‌ పూల్‌లో శాట్స్‌ కోచ్‌ ఆయూష్‌ యాదవ్‌ దగ్గర శిక్షణ తీసుకోవడం మొదలెట్టాడు. స్విమ్మింగ్‌కు సంబంధించిన ఏ విషయాన్నీ అద్వైత్‌ తొందరగా అర్థం చేసుకోలేకపోయేవాడు. దాంతో అతడికి అర్థమయేంత వరకూ పదే పదే చెప్పాల్సి వచ్చేది. ఇంటి నుంచి గచ్చిబౌలి 25 కిలోమీటర్ల దూరంలో ఉండడంతో అద్వైత్‌ అక్కడే స్టేడియానికి దగ్గర్లో ఉన్న వసతి గృహంలో చేరాడు. అప్పటి నుంచి పూర్తి దృష్టి కేవలం స్విమ్మింగ్‌పైనే పెట్టిన అతను రాష్ట్ర, జాతీయ స్థాయి పోటీల్లో రాణించాడు. ప్రత్యేక ఒలింపిక్స్‌ కోసం క్రీడాకారులను ఎంపికచేసేందుకు నిర్వహించిన సన్నాహక శిక్షణ శిబిరాల్లో మెరిసి భారత బృందంలో చోటు దక్కించుకున్నాడు. భవిష్యత్‌లో మరిన్ని అంతర్జాతీయ పతకాలు సాధించే దిశగా దూసుకెళ్తున్నాడు. ‘‘అద్వైత్‌కు మేధో వైకల్యం ఉందని తెలిసి బాధపడ్డాం. ఏ విషయాన్నైనా నేర్చుకోవడంలో అతను చాలా వెనకబడేవాడు. అయితే స్విమ్మింగ్‌లో మాత్రం తనంతటే తానే ఆసక్తి చూపించాడు. దాంతో మేం కూడా అతణ్ని ప్రోత్సహించాం. రోజూ సాధన కోసం 25 కిలోమీటర్లు వెళ్లిరావడం ఇబ్బంది అవుతుందని స్టేడియం దగ్గర్లోనే వసతి గృహంలో చేర్పించాం. అక్కడ చేరిన తర్వాత అతని పరిస్థితిలో మార్పు వచ్చింది. అందరితో కలవడం నేర్చుకున్నాడు. సన్నాహక శిక్షణ శిబిరాలకు కూడా ఒక్కడే వెళ్లాల్సి వచ్చింది. అక్కడ కూడా మిగతా అథ్లెట్లను చూసి చాలా విషయాలు ఒంటబట్టించుకున్నాడు. అతను ప్రత్యేక ఒలింపిక్స్‌కు ఎంపికై పతకం నెగ్గినందుకు గర్వంగా ఉంది’’ అని అద్వైత్‌ తండ్రి అశోక్‌ కుమార్‌ తెలిపాడు.

స్కేటింగ్‌లో మెరుపు

కాళ్లకు స్కేటింగ్‌ బూట్లు కట్టుకొని రయ్‌మని రింగ్‌లో దూసుకెళ్తాడు... లక్ష్యాన్ని చేరుకొని పతకాలు కొల్లగొడతాడు.. కానీ అతని ప్రతిభ చూసి ప్రజలు కొట్టే చప్పట్లు మాత్రం వినలేడు.. తన సంతోషాన్ని పంచుకోలేడు. ఎందుకంటే అతడికి చిన్నప్పటి నుంచి చెవుడు. అలాగే మెదడు కూడా ఎదగలేదు. అతనే 16 ఏళ్ల గులామ్‌ మహమ్మద్‌ దస్తగిరి. హైదరాబాద్‌కు చెందిన ఈ కుర్రాడు ప్రత్యేక ఒలింపిక్స్‌ రోలర్‌ స్కేటింగ్‌లో రెండు కాంస్యాలతో మెరిశాడు. 100మీ, 1000మీ రేసుల్లో పతకాలు నెగ్గాడు. ప్రస్తుతం గ్రీన్స్‌ ప్రత్యేక పాఠశాలలో శిక్షణ పొందుతున్నాడు. దస్తగిరిది మధ్య తరగతి కుటుంబం. అతని తండ్రి రోజువారీ కూలీగా పనిచేస్తున్నాడు. ఆరేళ్ల క్రితం తొలిసారి స్కేటింగ్‌ క్రీడను చూసి అతను దానిపై ఆసక్తి పెంచుకున్నాడు. అతనిలోని ప్రతిభను గమనించిన పాఠశాల కోచ్‌ దస్తగిరికి శిక్షణ ఇవ్వడం మొదలెట్టాడు. ప్రతి విషయాన్ని అతనికి అర్థమయ్యేలా చెప్పడం కష్టమయ్యేది. అయినా కూడా పట్టుదలతో ఆటలో మెళకువలు నేర్చుకున్నాడు. అంచెలంచెలుగా ఎదిగి జాతీయ ఛాంపియన్‌షిప్‌లో రెండు బంగారు పతకాలు, ఓ రజతంతో సత్తాచాటాడు. ఆ ప్రదర్శనతో ప్రత్యేక ఒలింపిక్స్‌కు ఎంపికై పతకాలు కైవసం చేసుకున్నాడు. భవిష్యత్‌లో రోలర్‌ స్కేటింగ్‌లో కోచ్‌గా మారి తనలాంటి వాళ్లను ఛాంపియన్లుగా తయారుచేయాలనే లక్ష్యం పెట్టుకున్నాడు. ‘‘దస్తగిరి ప్రత్యేక ఒలింపిక్స్‌లో పతకాలు గెలిచి దేశానికి ఖ్యాతి తీసుకొచ్చినందుకు గర్వపడుతున్నాం. అతడి మెదడు ఎదగడం ఆగిపోయింది. కానీ తను ఏదైనా అనుకుంటే కచ్చితంగా చేసి తీరుతాడు. స్కేటింగ్‌లో కూడా అదే పట్టుదల చూపిస్తున్నాడు. వైకల్యాన్ని అధిగమించి అతను ఛాంపియన్‌గా నిలవడం ఆనందంగా ఉంది’’ అని దస్తగిరి తండ్రి గులామ్‌ మొయినుద్దీన్‌ తెలిపాడు.

విజయాల వేటలో రయ్‌మంటూ

తండ్రి శారీరక దివ్యాంగుడు.. కొడుక్కేమో మానసిక వైకల్యం.. అలాంటి పరిస్థితుల్లో ఆ కుటుంబం గురించి తెలిసిన ఎవరైనా అయ్యో అనాల్సిందే! కానీ తన అద్భుత నైపుణ్యంతో ఆ కొడుకు అందరితో వారెవా అనిపించుకుంటున్నాడు. సైకిల్‌పై రయ్‌మంటూ దూసుకెళ్తూ పతకాలు కొట్టేస్తున్నాడు. అతనే 18 ఏళ్ల హరివంశ్‌ సమంత్‌ దంతూర్‌. ప్రత్యేక ఒలింపిక్స్‌ సైక్లింగ్‌ 2కె రేసులో కాంస్యం గెలిచి మెరిశాడు. ఎనిమిదేళ్ల వయసులో హరివంశ్‌ వైకల్యం గురించి తెలిసింది. దాంతో అతణ్ని జాతీయ మానసిక దివ్యాంగుల కేంద్రంలో చేర్పించారు. అక్కడే అతనికి సైక్లింగ్‌పై ఉన్న ఆసక్తి బయటపడింది. అక్కడ ఉన్న ఓ ఉపాధ్యాయుడు హరివంశ్‌కు సైక్లింగ్‌పై ఉన్న ఇష్టాన్ని గమనించి అతని తల్లిదండ్రులను పిలిపించి మాట్లాడాడు. అప్పటి నుంచి కన్నవాళ్లే స్వయంగా నిపుణుల సలహాలతో హరివంశ్‌కు శిక్షణ ఇవ్వడం మొదలెట్టారు. క్రమంగా ఆటపై పట్టు పెంచుకున్న అతను తెలంగాణ తరపున గతేడాది జాతీయ స్థాయి ప్రత్యేక ఒలింపిక్స్‌ ఛాంపియన్‌షిప్‌లో స్వర్ణంతో సత్తాచాటాడు. ప్రత్యేక ఒలింపిక్స్‌లో పోటీపడే అవకాశమూ చేజిక్కింది. ఈ పోటీల్లో పతకంతో దేశానికే గర్వకారణంగా నిలిచాడీ కుర్రాడు. ‘‘సైక్లింగ్‌ నాకు చాలా ఇష్టం. అది నా ఆత్మవిశ్వాసాన్ని పెంచి నాకు ఆనందాన్ని ఇస్తోంది. ప్రత్యేక వేసవి ఒలింపిక్స్‌లో కాంస్యం గెలిచినందుకు ఆనందంగా ఉంది. తర్వాత జరిగే ప్రత్యేక శీతాకాల ఒలింపిక్స్‌లో స్వర్ణం గెలిచేందుకు ప్రయత్నిస్తా’’ అని హరివంశ్‌ తెలిపాడు. తన కొడుకు వయసు పద్దెనిమిదేళ్లు అయినా అతను మాత్రం పదేళ్ల పిల్లాడే అని హరివంశ్‌ తండ్రి రాజేశ్‌ చెబుతున్నాడు. ‘‘మేధో వైకల్యం ఉన్న కొడుకు ఉంటే జీవితం ఊహించని విధంగా ఉంటుంది. అతని భవిష్యత్‌ గురించి మాకు బెంగగా ఉండేది. కానీ అతను మా ఆలోచనల్ని తలకిందులు చేశాడు. తనకంటూ ప్రత్యేక గుర్తింపు తెచ్చుకున్నాడు. మేం ఎప్పుడూ అతనికి మద్దతుగానే నిలిచాం. అయినా కూడా ప్రయాణం సాగించాల్సింది తనే’’ అని రాజేశ్‌ పేర్కొన్నాడు. హైదరాబాద్‌లోని అల్వాల్‌కు చెందిన హరివంశ్‌ ప్రస్తుతం ఎనిమిదో తరగతి పూర్తి చేశాడు.

మరోవైపు కర్నూలు జిల్లా ఆధోనికి చెందిన 17 ఏళ్ల ఖాలీద్‌ కూడా స్కేటింగ్‌లో సత్తాచాటుతున్నాడు. ప్రత్యేక ఒలింపిక్స్‌లో రెండు కాంస్యాలతో మెరిశాడు. 5కె, 10కె రేసుల్లో మూడో స్థానంలో నిలిచాడు. మానసిక వైకల్యం ఉన్న అతను నాలుగేళ్ల క్రితమే సైక్లింగ్‌ చేయడం మొదలెట్టాడు. పుట్టుకతోనే చెవుడు.. పైగా మెదడు పెరుగుదల కూడా తక్కువే. అలాంటి పరిస్థితుల్లో కూడా అతను ఆటపై ఆసక్తి చూపించాడు. హైదరాబాద్‌లోని గ్రీన్స్‌ ప్రత్యేక పాఠశాలలో ఉంటూ సైక్లింగ్‌పై పట్టు సాధించాడు. రాష్ట్ర స్థాయి టోర్నీల్లో సత్తాచాటి జాతీయ ఛాంపియన్‌షిప్‌కు ఎంపికయ్యాడు. జాతీయ ఛాంపియన్‌షిప్‌లో స్వర్ణంతో మెరిసి ప్రత్యేక ఒలింపిక్స్‌లో పాల్గొనే భారత బృందంలో చోటు దక్కించుకున్నాడు. ‘‘చిన్నపుడు ఖాలీద్‌ను చూసి ఎంతో బాధపడ్డాం. అతను ఏమవుతాడో అనుకున్నాం. అయితే తను ఆటలో రాణించి దేశానికి పతకాలు సాధించిపెట్టడం గర్వంగా ఉంది. మేం కర్నూల్‌లో ఉంటున్నాం. వాడేమో హైదరాబాద్‌లో మామ దగ్గర ఉండి ఆటలో శిక్షణ తీసుకుంటున్నాడు’’ అని డ్రైవర్‌గా పనిచేస్తున్న ఖాలీద్‌ తండ్రి జమీర్‌ బాషా తెలిపాడు.

Tags :

మరిన్ని

జిల్లా వార్తలు

వారెవ్వా! చదువు సుఖీభవ ఈ-నాడు మకరందం రయ్.. రయ్ సిరి విజేత ఈ తరం హాయ్! ఆహా హాయ్ బుజ్జీ స్థిరాస్తి రుచులు విహారి