ప్ర‌త్యేక క‌థ‌నం



గన్నవరం నుంచి సింగాపురం
విజయవాడ నుంచి అంతర్జాతీయ విమాన సర్వీసులకు కుదిరిన ముహూర్తం
25న ఎగరనున్న తొలి విమానం?
ఏపీ విమానాశ్రయాల అభివృద్ధి సంస్థ, ఇండిగో మధ్య కుదిరిన ఒప్పందం
కస్టమ్స్‌ అనుమతి రాగానే టిక్కెట్ల విక్రయం
నెరవేరనున్న రాష్ట్ర వాసుల కల
ఈనాడు - అమరావతి
విజయవాడ విమానాశ్రయం నుంచి అంతర్జాతీయ సర్వీసులు ప్రారంభమవ్వడానికి ముహూర్తం ఖరారైంది. ఇందులో భాగంగా ఈ నెల 25న గన్నవరం నుంచి సింగపూర్‌కు అంతర్జాతీయ విమాన సర్వీసులను తొలుత నడపనున్నారు. ఈ మేరకు ఆంధ్రప్రదేశ్‌ విమానాశ్రయాల అభివృద్ధి సంస్థ, ఇండిగో సంస్థ తేదీని ఖరారు చేస్తూ ఒప్పందం కుదుర్చుకున్నాయి. విమానాశ్రయం అధికారులకు సైతం సిద్ధంగా ఉండాలంటూ శుక్రవారం సమాచారం అందించారు.

రాష్ట్ర ప్రభుత్వం చొరవతో
గన్నవరం విమానాశ్రయానికి అంతర్జాతీయ హోదాను ఏడాదిన్నర కిందటే కేంద్ర ప్రభుత్వం ప్రకటించింది. విమానాశ్రయంలో అవసరమైన ఏర్పాట్లు చేసుకోమని సూచించారు. సరిగ్గా నాలుగు నెలల్లో అంతర్జాతీయ ప్రయాణికుల రాకపోకలకు టెర్మినల్‌ భవనం, మూడంచెల భద్రత ఏర్పాట్లు, సౌకర్యాలను సిద్ధం చేశారు. కానీ.. ఇమ్మిగ్రేషన్‌, కస్టమ్స్‌ అనుమతుల విషయంలో తీవ్ర జాప్యం జరుగుతూ వచ్చింది. రాజధాని ప్రాంతానికి అంతర్జాతీయ సర్వీసులు అత్యవసరం కావడంతో రాష్ట్ర ప్రభుత్వం గత నాలుగైదు నెలలుగా చొరవ తీసుకుంది. ఏఏఐ, ఇండిగోతో.. ఆంధ్రప్రదేశ్‌ విమానాశ్రయాల అభివృద్ధి సంస్థ చర్చలు జరిపింది. అందరూ అంగీకారం తెలపడంతో.. అక్టోబర్‌ మొదటి వారం నుంచే సింగపూర్‌కు సర్వీసులను నడపాలని భావించారు. కానీ.. కస్టమ్స్‌ సిబ్బంది జీతాలను ఎవరు చెల్లించాలనే నిబంధనల విషయంలో మళ్లీ జాప్యం జరిగింది. తాజాగా అది కూడా కొలిక్కి వచ్చింది. దీంతో కస్టమ్స్‌ విభాగం నుంచి ఒకటి రెండు రోజుల్లో అనుమతి రానుందని ఏపీ విమానాశ్రయాల అభివృద్ధి సంస్థ ముఖ్య కార్యనిర్వహణాధికారి వీరేంద్రసింగ్‌ తెలిపారు. అనుమతి వచ్చిన వెంటనే టిక్కెట్ల విక్రయాన్ని ఇండిగో సంస్థ ప్రారంభిస్తుంది. 25 నుంచి సింగపూర్‌కు మిమాన సర్వీసులను ప్రారింభిస్తుంది.

20 లక్షల మంది ప్రయాణికులున్నారు
విజయవాడ నుంచి సింగపూర్‌కు విమాన సర్వీసులు ప్రారంభించాలని ఏపీ ఛాంబర్‌ ఆఫ్‌ కామర్స్‌ అండ్‌ ఇండస్ట్రియల్‌ ఫెడరేషన్‌ సహా వ్యాపార, వాణిజ్య సంఘాలు చాలా కాలంగా కోరుతున్నాయి. ఏటా కృష్ణా, గుంటూరు, ప్రకాశం, పశ్చిమ గోదావరి జిల్లాల నుంచి కనీసం 20లక్షల మందికి పైగానే విదేశాలకు వెళ్లి వచ్చే ప్రయాణికులు ఉంటున్నారని ఏపీ ఛాంబర్‌ ఆఫ్‌ కామర్స్‌ లెక్కలు కట్టి మరీ భారత విమానయాన సంస్థ, పౌర విమానయాన శాఖకు నివేదికలు సమర్పించింది. విజయవాడ నుంచి నేరుగా సింగపూర్‌కు చేరుకుంటే అక్కడి నుంచి ప్రపంచంలోని ఏ దేశానికైనా అత్యంత తేలికగా వెళ్లిపోయేందుకు విమాన అనుసంధానం ఉంటుంది. సింగపూర్‌కు మంగళ, గురువారాల్లో విమాన సర్వీసును తొలుత అందుబాటులోకి తేవాలని నిర్ణయించారు.

మరిన్ని

జిల్లా వార్తలు
జిల్లా తాజా వార్తలు

దేవ‌తార్చ‌న

రుచులు

© 1999- 2018 Ushodaya Enterprises Pvt.Ltd,All rights reserved.
Designed & Developed by Eenadu WebHouse
For Digital Marketing enquiries Contact : 9000180611, 040 - 23318181 eMail :marketing @eenadu.net
Best Viewed In Latest Browsers

Terms & Conditions   |    Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.