close
మరో మూడు నగరాభివృద్ధి సంస్థలు 

ఒంగోలు, ఏలూరు, కడపలో ఏర్పాటు 
రాష్ట్రంలో 13కి చేరిన  యూడీఏల సంఖ్య 
సమగ్రాభివృద్ధికి త్వరలో  బృహత్తర ప్రణాళికలు 
ఈనాడు - అమరావతి

ఒంగోలు, ఏలూరు, అన్నమయ్య(కడప) పేరుతో కొత్తగా మూడు నగరాభివృద్ధి సంస్థల(యూడీఏ)ను ఏర్పాటుచేస్తూ ప్రభుత్వం మంగళవారం ఉత్తర్వులిచ్చింది. ఇప్పటికే ఉన్న పదింటితో కలిపి రాష్ట్రంలో వీటి సంఖ్య 13కి చేరింది. రెండేళ్ల వ్యవధిలో కొత్త నగరాభివృద్ధి సంస్థలను ఏర్పాటు చేయడం ఇది రెండోసారి. 2016లో రాజమహేంద్రవరం, మచిలీపట్నం, నెల్లూరు, అనంతపురం, కర్నూలు కేంద్రాలుగా నగరాభివృద్ధి సంస్థలకు సర్కారు రూపమిచ్చింది. కొత్త  సంస్థలకు ఛైర్మన్లు, వైస్‌ ఛైర్మన్లు, సభ్యులను నియమించాల్సి ఉంది. ఈలోగా తదుపరి చర్యలు తీసుకోవాలని ప్రభుత్వం కలెక్టర్లను ఆదేశించింది. 
ఉపయోగమిలా.. 
యూడీఏల పరిధిలో ప్రాంతాల సమగ్రాభివృద్ధికి బృహత్తర ప్రణాళిక (మాస్టర్‌ ప్లాను) రూపొందించి త్వరలో అమలుచేయనున్నారు. నివాస, వాణిజ్య, పారిశ్రామిక, వ్యవసాయ ప్రాంతాల అభివృద్ధిపై ఇప్పటికంటే మరింత స్పష్టత వస్తుంది. ప్రజల భవిష్యత్తు అవసరాలకు వీలుగా మాస్టర్‌ ప్లానును అనుసరించి రహదారులు అందుబాటులోకి వస్తాయి. 
ప్రభుత్వం సమకూర్చే, రైతులు, ప్రజల నుంచి సమీకరించే భూములను అభివృద్ధి చేసి, లేఅవుట్లు వేసి ప్రజలకు స్థలాలను కేటాయిస్తారు. ఇళ్ల నిర్మాణాలు చేపట్టి అందుబాటు ధరల్లో ఉంచుతారు. 
విస్తీర్ణం, జనాభా పెరుగుదలతో కేంద్ర ప్రభుత్వం పట్టణాభివృద్ధి కోసం ప్రవేశపెట్టే అనేక పథకాలు, కార్యక్రమాలు అమలుచేసే వీలుంటుంది. 
కొత్త నిర్మాణాలు, లేఅవుట్లకు అనుమతులు తప్పనిసరి చేస్తారు. పట్టణ ప్రణాళిక చట్టం అమలుతో అక్రమ నిర్మాణాలు, లేఅవుట్లను నియంత్రించవచ్చు. 
నగరాభివృద్ధి సంస్థలు ఆర్థికంగా బలోపేతం కావడంతో ప్రజల అవసరాల కోసం కల్యాణ మండపాలు, ఉద్యానవనాలు, సామాజిక భవనాలు, వాణిజ్య సముదాయాలు నిర్మించి, అభివృద్ధి చేస్తారు. 

ఒంగోలు నగరాభివృద్ధి సంస్థ 
విస్తీర్ణం: 4864.35 చదరపు కిలోమీటర్లు 
పరిధిలోని నగరపాలక, పురపాలక సంఘాలు, నగర పంచాయతీలు: ఒంగోలు, చీరాల, మార్కాపురం, కందుకూరు, అద్దంకి, చీమకుర్తి, కనిగిరి, గిద్దలూరు 
మండలాలు: 39 
ఏలూరు నగరాభివృద్ధి సంస్థ 
విస్తీర్ణం: 3227.99 చదరపు కిలోమీటర్లు 
పరిధిలోని నగరపాలక, పురపాలక సంఘాలు, నగర పంచాయతీలు: ఏలూరు, కొవ్వూరు, నిడదవోలు, తాడేపల్లిగూడెం, తణుకు, నరసాపురం, పాలకొల్లు, భీమవరం, జంగారెడ్డిగూడెం 
మండలాలు: 35 
అన్నమయ్య నగరాభివృద్ధి సంస్థ 
విస్తీర్ణం: 5392.26 చదరపు కిలోమీటర్లు 
పరిధిలోని నగరపాలక, పురపాలక సంఘాలు, నగర పంచాయతీలు: కడప, ప్రొద్దుటూరు, రాయచోటి, మైదుకూరు, జమ్మలమడుగు, బద్వేల్‌, పులివెందుల, రాజంపేట, ఎర్రగుంట్ల 
మండలాలు: 39

ముఖ్యాంశాలు

జిల్లా వార్తలు

దేవతార్చన


రుచులు
+

© 1999- 2019 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact : 9000180611, 040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.