అక్టోబరు ఆఖరుకు రూ.1.02 లక్షల కోట్లకు

దిల్లీ: దేశీయ క్యాపిటల్‌ మార్కెట్లలోకి పార్టిసిపేటరీ నోట్ల (పీ-నోట్లు) ద్వారా వచ్చే పెట్టుబడులు ఈ ఏడాది అక్టోబరు ఆఖరుకు రూ.1.02 లక్షల కోట్లకు చేరాయి. గత 43 నెలల్లో ఇదే గరిష్ఠ స్థాయి. పీ-నోట్లను నమోదిత విదేశీ పోర్ట్‌ఫోలియో మదుపర్లు (ఎఫ్‌పీఐలు) విదేశీ మదుపర్లకు జారీ చేస్తారు. భారత స్టాక్‌ మార్కెట్‌లో పెట్టుబడులు పెట్టాలనుకునే విదేశీ మదుపర్లు పీ-నోట్ల ద్వారా పెట్టుబడులు పెడుతుంటారు. భారత ఈక్విటీ, డెట్‌, హైబ్రిడ్‌ సెక్యూరిటీల్లోకి పీ-నోట్ల పెట్టుబడులు అక్టోబరు ఆఖరుకు రూ.1,02,553 కోట్లకు చేరాయని మార్కెట్ల నియంత్రణ సంస్థ సెబీ వెల్లడించింది. 2018 మార్చి నెలాఖరులో పీ-నోట్ల పెట్టుబడులు రూ.1,06,403 కోట్లు ఇప్పటివరకు అధికం. గత నెలలోనే రూ.5,000 కోట్లకు పైగా నికర పెట్టుబడులు పీ-నోట్ల ద్వారా దేశీయ మార్కెట్లలోకి వచ్చాయి. విదేశీ మదుపర్లు రూ.7,000 కోట్లు ఈక్విటీల్లోకి చొప్పించగా,  రూ.2,000 కోట్లు డెట్‌ మార్కెట్‌ నుంచి ఉపసంహరించుకున్నారు.