Rahul: కర్ణాటక ప్రభుత్వం దేశంలోనే అత్యంత అవినీతిమయం: రాహుల్‌ ఫైర్

మైసూరు: కర్ణాటకలోని భాజపా ప్రభుత్వంపై కాంగ్రెస్‌ అగ్రనేత రాహుల్‌ గాంధీ తీవ్రస్థాయిలో ధ్వజమెత్తారు. రాష్ట్రంలోని బసవరాజ్‌ బొమ్మై సారథ్యంలోని కర్ణాటక ప్రభుత్వం దేశంలోనే అత్యంత అవినీతిమయని ఆరోపించారు. కర్ణాటక భాజపా సర్కార్‌ లంచం తీసుకుంటోందని కాంట్రాక్టర్లు ప్రధాని మోదీకి ఫిర్యాదు చేసినా ఎలాంటి చర్యలు తీసుకోవడంలేదని ఆక్షేపించారు. రాష్ట్రంలో 40శాతం కమిషన్‌తో పనిచేస్తున్న ప్రభుత్వం అన్ని వర్గాల నుంచీ లంచాలు తీసుకుంటోందని.. దీంతో రైతులు, కార్మిక వర్గాలతో పాటు చిన్న, మధ్యతరహా పరిశ్రామిక వర్గాలు తీవ్రంగా నష్టపోతున్నాని చెప్పారు. 26వ రోజు భారత్‌ జోడో యాత్రలో భాగంగా ఆయన కర్ణాటకలోని పాత మైసూరు వీధుల్లో రాహుల్‌ నడిచారు. ఈ సందర్భంగా రోడ్లకు ఇరువైపులా పెద్ద సంఖ్యలో ప్రజలు నిలబడి ఆయనకు ఘనంగా స్వాగతం పలికారు. రాహుల్‌.. రాహుల్‌.. అంటూ నినాదాలు చేస్తూ ఉత్సాహాన్ని నింపారు. ఇప్పటివరకు కర్ణాటక, తమిళనాడు, కేరళలో దాదాపు 600కి.మీలకు పైగా రాహుల్‌ పాదయాత్ర కొనసాగింది.