close
అప్పటి ముచ్చట్లు
Facebook Share Twitter Share WhatsApp Share Telegram Share
ప్రేయసి గుర్తొచ్చి కన్నీరుపెట్టుకున్న రజనీకాంత్‌

తొలిప్రేమ చేసిన గాయం.. కండక్టర్‌గా ఉన్న రోజుల్లో..!

చెన్నై: ఎల్లలులేని కథానాయకుడు, కోట్లాది అభిమానుల్ని సంపాదించుకున్న రజనీకాంత్‌ తొలి ప్రేమ విఫలమైందట. బెంగళూరులో బస్సు కండక్టర్‌గా పనిచేస్తున్న రోజుల్లో రజనీ.. ఎంబీబీఎస్‌ చదువుతున్న నిర్మల ప్రేమించుకున్నారు. తన తొలి ప్రేమ గురించి రజనీ తన స్నేహితుడు, మలయాళ నటుడు దేవన్‌కు ఓసారి చెప్పి.. కన్నీరుపెట్టుకున్నారట. ఓ మాలీవుడ్‌ వెబ్‌సైట్‌కు ఇచ్చిన ఇంటర్వ్యూలో దేవన్‌ ఈ విషయాన్ని గతంలో వెల్లడించారు.

‘మేమంతా సినిమా షూటింగ్‌ కోసం చెన్నైలో ఉన్నాం. ఓ రోజు రజనీ నన్ను డిన్నర్‌కు ఆహ్వానించారు. దీంతో ఆయన గదికి వెళ్లా. డిన్నర్‌కు కావాల్సినవన్నీ తెప్పించి పెట్టారు. ఆ సమయంలో రజనీ కాస్త మద్యం సేవించి.. ‘నీకు తొలి ప్రేమ ఉందా?’ అని అడిగారు. నేను నా లవ్‌స్టోరీ చెప్పా. ఆపై ఆయన భావోద్వేగానికి గురయ్యారు. ఎందుకు బాధపడుతున్నారని నేను రజనీని అడిగా. ఆపై బెంగళూరులో మొదలైన తన తొలిప్రేమ గురించి ఇలా వివరించారు’.

‘‘నేను బెంగళూరులో బస్సు కండక్టర్‌గా పనిచేస్తున్నప్పుడు ఎంబీబీఎస్‌ చదువుతున్న అమ్మాయి నిర్మలతో పరిచయం ఏర్పడింది. ఆమె బస్సు ఎక్కినప్పుడల్లా ఇద్దరం మాట్లాడుకునేవాళ్లం. ఓరోజు నేను ప్రధాన పాత్ర పోషించబోతున్న నాటకాన్ని చూడటానికి నిర్మలను పిలిచా. ఆపై కొన్ని రోజులకు మద్రాసు ఫిల్మ్‌ ఇనిస్టిట్యూట్‌ నుంచి నాకు ఇంటర్వ్యూ లెటర్‌ వచ్చింది. అయితే నేను దరఖాస్తు చేసుకోకుండానే లెటర్ రావడంతో షాక్‌ అయ్యా. ఆపై దరఖాస్తు నేనే చేశానని నిర్మల చెప్పింది. నాటకంలో నా నటన ఆమెకు బాగా నచ్చడంతో, నా నైపుణ్యాన్ని ప్రోత్సహించడానికి నా తరఫున మద్రాసు ఫిల్మ్‌ ఇనిస్టిట్యూట్‌లో అప్లికేషన్‌ వేసింది. నేను పెద్ద స్టార్‌ కావాలని ఆమె కోరుకున్నారు. అప్పట్లో బెంగళూరు నుంచి చెన్నై వెళ్లడానికి కూడా నా దగ్గర డబ్బులు లేవు. ఈ విషయం తెలిసి నిర్మల రూ.500 ఇచ్చింది. ఆ డబ్బులతో నేను చెన్నై వచ్చా. మద్రాసు ఫిల్మ్‌ ఇనిస్టిట్యూట్‌లో చేరిన తర్వాత ఓరోజు బెంగళూరుకు వెళ్లా. నిర్మల కనిపించలేదు. దీంతో స్నేహితులతో కలిసి ఆమె ఇంటికి వెళ్లి చూశా. తాళం వేసి ఉండటంతో ఇరుగుపొరుగును విచారించా. నిర్మల కుటుంబం మరో ప్రాంతానికి షిఫ్ట్‌ అయ్యారని చెప్పారు’ అని సూపర్‌స్టార్‌ నాతో పంచుకున్నారు’.

‘అంతేకాదు ఆ తర్వాత ఇప్పటి వరకు తన జీవితంలో రజనీ.. నిర్మలను చూడలేదట. ఆ విషయం చెప్పి ఏడ్వడం మొదలుపెట్టారు. సాధారణంగా కాదు.. కన్నీరుమున్నీరయ్యారు. ‘నేనెప్పుడు బెంగళూరుకు వెళ్లినా నిర్మల కనిపిస్తుందేమోనని చూస్తుంటా. కానీ ఇప్పటి వరకు ఆమె నా కంటికి కనపడలేదు. ఆమె గొప్ప మహిళ. అందుకే ఎవర్నీ బాధపెట్టకూడదని ఇప్పటి వరకు నన్ను చూడటానికి కూడా రాలేదు. బహుశా నేను తనను మర్చిపోయానని అనుకుందేమో’ అని రజనీ నాతో అన్నారు. ఆపై ఏదో ఒకరోజు మీరు నిర్మలను కచ్చితంగా చూస్తారని నేను చెప్పడంతో ఆయన చాలా సంతోషపడ్డారు’ అని దేవన్‌ పేర్కొన్నారు.


Tags :

తాజా వార్తలు

టాలీవుడ్‌

మరిన్ని

ఫోటోలు

హీరో మరిన్ని

హీరోయిన్ మరిన్ని

సినిమా స్టిల్స్ మరిన్ని

ఈవెంట్స్ మరిన్ని

జిల్లా వార్తలు

దేవ‌తార్చ‌న

మరిన్ని
రుచులు
+

© 1999- 2020 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact :
040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.