Karvy Stock Broking case: హెచ్‌డీఎఫ్‌సీ ఫిర్యాదు.. మరోసారి పోలీస్‌ కస్టడీకి పార్థసారథి

తాజా వార్తలు

Updated : 03/09/2021 14:57 IST

Karvy Stock Broking case: హెచ్‌డీఎఫ్‌సీ ఫిర్యాదు.. మరోసారి పోలీస్‌ కస్టడీకి పార్థసారథి

హైదరాబాద్: షేర్లు తనఖా ఉంచి బ్యాంకుల్లో రుణాలు తీసుకుని ఎగవేసిన కార్వీ స్టాక్‌ బ్రోకింగ్‌ సంస్థ అక్రమాలు పోలీసుల దర్యాప్తులో మరిన్ని వెలుగు చూస్తున్నాయి. ఈ కేసులో అభియోగాలు ఎదుర్కొంటున్న కార్వీ సంస్థ ఛైర్మన్‌ పార్థసారథిని హైదరాబాద్‌ సీసీఎస్‌ పోలీసులు మరోసారి కస్టడీలోకి తీసుకున్నారు. హెచ్‌డీఎఫ్‌సీ బ్యాంకును మోసం చేసిన కేసులో నిందితుడిగా ఉన్న పార్థసారథిని విచారణ నిమిత్తం కస్టడీలోకి తీసుకున్నారు. పార్థసారథిని రెండు రోజుల పాటు కస్టడీలోకి తసుకున్న సీసీఎస్‌ పోలీసులు ఇవాళ, రేపు ప్రశ్నించనున్నారు. పెట్టుబడిదారుల షేర్లను తనఖా పెట్టి హెచ్‌డీఎఫ్‌సీ బ్యాంకు నుంచి రూ.347 కోట్లు తీసుకున్నట్లు పార్థసారథిపై అభియోగాలున్నాయి. తిరిగి చెల్లించకపోవడంతో పార్థసారథిపై హెచ్‌డీఎఫ్‌సీ యాజమాన్యం ఫిర్యాదు చేసింది. పార్థసారథిని సీసీఎస్‌ పోలీసులు కస్టడీలోకి తీసుకోవడం ఇది మూడో సారి కావడం గమనార్హం.

ఇప్పటికే సీసీఎస్‌ పోలీసులు రెండు సార్లు కస్టడీకి తీసుకొని ప్రశ్నించారు. ఇండస్ ఇండ్ బ్యాంకులో తనఖా పెట్టిన షేర్లకు సంబంధించిన పూర్తి వివరాలను పార్థసారథి నుంచి సేకరించారు. పెట్టుబడిదారులకు చెందిన డీమ్యాట్ ఖాతాల్లోని షేర్లను బ్యాంకులో తనఖా పెట్టి రూ.137 కోట్లను పార్థసారథి రుణంగా తీసుకున్నారు. కార్వీ సంస్థ లావాదేవీలకు సంబంధించిన సమాచారాన్ని సీసీఎస్‌ పోలీసులు రాబట్టారు. కార్వీ స్టాక్ బ్రోకింగ్ లిమిటెడ్‌తో పాటు అనుబంధ సంస్థలకు చెందిన ఆరు బ్యాంకు ఖాతాలను ఇప్పటికే సీసీఎస్ పోలీసులు స్తంభింపజేశారు. దర్యాప్తులో భాగంగా పార్థసారథి నుంచి సేకరించిన సమాచారం ఆధారంగా సీసీఎస్‌ పోలీసులు కార్వీ సంస్థ సీఎఫ్‌వో కృష్ణహరి, సీఈవో రాజీవ్‌ సింగ్‌ను నిన్న అరెస్టు చేశారు. డొల్ల కంపెనీల పేరుతో కృష్ణ హరి, రాజీవ్‌ మోసగించినట్లు పోలీసులు గుర్తించారు. పార్థసారథి ఆదేశాలతోనే డొల్ల కంపెనీలను ఏర్పాటు చేసినట్లు తేల్చారు. ఏడేళ్లుగా ఈ ఇద్దరు నిందితులు డొల్ల కంపెనీలను నిర్వహిస్తున్నట్లు సీసీఎస్‌ పోలీసులు తెలిపారు. అరెస్టు చేసిన ఇద్దరినీ పోలీసులు రిమాండ్‌కు తరలించారు. తాజాగా హెచ్‌డీఎఫ్‌సీ ఫిర్యాదు మేరకు పార్థసారథిని పోలీసులు మరోసారి కష్టడీలోకి తీసుకున్నారు.


Advertisement

Tags :

మరిన్ని

జిల్లా వార్తలు
బిజినెస్
మరిన్ని
సినిమా
మరిన్ని
క్రీడలు
మరిన్ని
పాలిటిక్స్
మరిన్ని
జనరల్
మరిన్ని
జాతీయ- అంతర్జాతీయ
మరిన్ని