close

ప్ర‌త్యేక క‌థ‌నం

Facebook Share Twitter Share WhatsApp Share Telegram Share
మండుటెండల్లో.. మెదడులో విస్ఫోటం

ఒంట్లో నీరు ఇంకి రక్తప్రసరణకు ఆటంకం
సిరల్లో రక్తం గడ్డకట్టే ప్రమాదం
30 శాతం మందిలో ప్రాణాపాయం
సిగరెట్‌ తాగేవారికి ముప్పు ఎక్కువ
అప్రమత్తత అవసరమంటున్న నిపుణులు
ఈనాడు - హైదరాబాద్‌

* 29 ఏళ్ల యువకుడే. ఎండదెబ్బకు విలవిలలాడిపోయాడు. ఒంట్లో అధిక శాతం నీరు ఆవిరవడంతో మెదడు రక్తనాళాల్లో రక్తస్రావమైంది. ప్రస్తుతం ఆసుపత్రిలో అత్యవసర చికిత్స పొందుతున్నాడు.
* అతను 55 ఏళ్ల వ్యక్తి. ఎండలో తిరిగిన కారణంగా డీహైడ్రేషన్‌కు లోనయ్యాడు. మెదడులో రక్తనాళాలు చిట్లిపోయాయి. ప్రాణాపాయ స్థితిలో ఆసుపత్రిలో ఉన్నాడు.
మండుటెండల్లో బయటకు వెళ్లినప్పుడు ఒంట్లో నీరు హరించుకుపోవడం, వడదెబ్బకు గురికావడం వంటి సమస్యలు సాధారణంగా కనిపిస్తాయి. కొన్నిసార్లు వయసుతో సంబంధం లేకుండా కొందరు తీవ్ర అనారోగ్యానికి గురయ్యే ప్రమాదమూ లేకపోలేదనేందుకు ఈ రెండు ఉదంతాలే నిదర్శనం. ఈ తరహా బాధితుల్లో 30 శాతం మందిలో ప్రాణాపాయ ముప్పు పొంచి ఉందని వైద్యనిపుణులు చెబుతున్నారు. ముఖ్యంగా సిగరెట్‌ తాగే అలవాటున్న వారు డీహైడ్రేషన్‌కు గురైతే ముప్పు రెట్టింపు అవుతుందని హెచ్చరిస్తున్నారు. రాష్ట్రంలో ఉష్ణోగ్రతలు 46 డిగ్రీలు దాటుతున్నాయి. రానున్న వారం రోజులపాటు ఉష్ణోగ్రతలు మరింతగా పెరిగే ప్రమాదముందని వాతావరణ నిపుణులు చెబుతున్నారు. ఈ పరిస్థితుల్లో మరింత అప్రమత్తంగా ఉండాలని వైద్యులు హెచ్చరిస్తున్నారు.

ఎండల్లో తిరిగితే ఏం జరుగుతుంది?
*  ఒంట్లో నుంచి నీరు, ఖనిజాలు, లవణాలు చెమట రూపంలో ధారాళంగా బయటకు పోతాయి. నిస్సత్తువ ఆవహిస్తుంది. దీన్నే వైద్య పరిభాషలో ‘డీహైడ్రేషన్‌’ అంటారు. ఈ పరిస్థితుల్లో అత్యవసరంగా శరీరంలో నీటిని, లవణాలను భర్తీ చేయాలి. లేని పక్షంలో శరీరంలో ఉష్ణోగ్రతను నియంత్రించే వ్యవస్థ దెబ్బతింటుంది. ఫలితంగా శరీరంలో వేడి అంతకంతకూ పెరిగిపోయి మనుషులు కుప్పకూలిపోతారు. ఈ స్థితినే ‘వడదెబ్బ’గా పిలుస్తారు.
*  డీహైడ్రేషన్‌కు గురైనప్పుడు రక్తం చిక్కబడుతుంది. ఫలితంగా రక్త ప్రవాహం నెమ్మదిస్తుంది. ఒక్కోసారి గడ్డకడుతుంది. రక్తం గడ్డకడితే సిరల గోడలు చిట్లిపోయి, మెదడులో తీవ్ర రక్తస్రావం జరుగుతుంది.


పసిగట్టేదెలా?

*  తీవ్రమైన తలనొప్పి, మూర్ఛ, కళ్లు తిరగడం, మాట తడబడటం, తీవ్రమైన నీరసం, కాళ్లు,చేతుల్లో తిమ్మిర్లు, చూపు మందగించడం, మత్తుగా ఉండడం వంటివి వడదెబ్బ లక్షణాలు. గమనించిన వెంటనే వైద్యుణ్ని సంప్రదించాలి.


ఎలా జాగ్రత్తపడాలి?

*  ఎండ ఎక్కువగా ఉన్న సమయంలో బయటకు వెళ్లకపోవడమే మంచిది.
*  తప్పనిసరిగా వెళ్లాల్సి వస్తే ముందే తగినంత నీరు తాగాలి.
*   టోపీ ధరించాలి. తలకు తువ్వాలు లేదా చేతి రుమాలైనా కట్టుకోవాలి.
*  వాంతులు, విరేచనాలు అవుతున్నప్పుడు ఓఆర్‌ఎస్‌ ద్రావణాన్ని తాగించాలి.
*  వడదెబ్బకు గురైన వారి శరీర ఉష్ణోగ్రత 101 డిగ్రీల ఫారన్‌హీట్‌ కంటే తక్కువకు చేరే వరకు తడి లేదా చల్లటి నీటిలో ముంచిన వస్త్రంతో తుడుస్తూ ఉండాలి.
*  అయినా సాధారణ స్థితికి రాకపోతే దగ్గర్లోని ఆస్పత్రికి తీసుకెళ్లాలి.


ఎవరిలో ముప్పు ఎక్కువ?

*  ఎక్కువగా డీహైడ్రేషన్‌కు గురైన వారిలో
*  సిగరెట్‌ తాగే వారిలో
*  పక్షవాతం బాధితుల్లో
*  గర్భ నిరోధక మాత్రలు వాడుతున్న వ్యక్తుల్లో
*  ప్రసవానంతరం రక్తం చిక్కగా ఉన్న వారిలో
*  కొన్ని రకాల క్యాన్సర్‌ రోగుల్లో


వేసవిలో ఎక్కువ ముప్పు

రక్త ప్రవాహం నెమ్మదించినప్పుడు, రక్తనాళాల్లో కవాటాలు(వాల్వ్‌) దెబ్బతినప్పుడు, రక్తం గడ్డకట్టే పదార్థాలు ఉన్నప్పుడు సిరల్లో రక్త ప్రవాహం నిలిచిపోతుంది. ఎండాకాలంలో సిరల్లో రక్తం గడ్డకట్టే కేసులు ఎక్కువగా వస్తుంటాయి. నెలకు 10-15 శస్త్ర చికిత్సలు చేస్తుంటాం. 30 శాతం మందిలో ఇది ప్రాణాంతక సమస్యే. కొందరు ఉపవాస దీక్షలు చేస్తూ కూడా నీళ్లు తాగరు. మరికొందరు ఎండల్లో తిరుగుతున్నప్పుడూ తగినంతగా నీరు తీసుకోరు. ఇవన్నీ సమస్యను పెంచుతాయి.

- డాక్టర్‌ బీజే రాజేశ్‌, న్యూరో సర్జన్‌

మరిన్ని

జిల్లా వార్తలు

దేవ‌తార్చ‌న

మరిన్ని
రుచులు
+

© 1999- 2020 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact :
040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.