మోదీకి కేజ్రీవాల్‌ ఆహ్వానం

దిల్లీ: వరుసగా మూడోసారి దిల్లీ ముఖ్యమంత్రి బాధ్యతలు చేపట్టనున్నారు ఆమ్‌ ఆద్మీ పార్టీ కన్వీనర్‌ అరవింద్‌ కేజ్రీవాల్‌. ఫిబ్రవరి 16 ఆదివారం చారిత్రక రామ్‌లీలా మైదానంలో సీఎంగా ప్రమాణస్వీకారం చేయనున్నారు. కాగా.. ఈ కార్యక్రమానికి ప్రధాని మోదీని ఆహ్వానించారు కేజ్రీ. గురువారమే మోదీకి ఆహ్వానం పంపినట్లు ఆప్‌ వర్గాలు వెల్లడించాయి. అయితే ఈ ఆహ్వానంపై పీఎంవో కార్యాలయం ఇంకా స్పందించలేదని తెలుస్తోంది. 

ఆదివారం ఉదయం 10 గంటలకు కేజ్రీ ప్రమాణస్వీకారం జరగనుంది. సీఎంతో పాటు కేబినెట్‌ మంత్రులు కూడా అదే రోజున ప్రమాణం చేయనున్నారు. అయితే ఈ కార్యక్రమానికి ఇతర రాష్ట్రాల ముఖ్యమంత్రులు, రాజకీయ నాయకులెవర్నీ ఆహ్వానించట్లేదని ఇటీవల ఆమ్‌ ఆద్మీ పార్టీ ప్రకటించిన విషయం తెలిసిందే. ప్రజలే తమకు అతిథులని పార్టీ నేత గోపాల్‌ రాయ్‌ చెప్పారు.