ఓటర్ల అనాసక్తిపై చురకలు!

గ్రేటర్‌ ఎన్నికల్లో ఓటర్ల అనాసక్తిపై మంగళవారం సామాజిక మాధ్యమాల్లో పెద్దఎత్తున చర్చ జరిగింది. కొందరు కార్టూన్లు చిత్రించి వ్యంగ్యాస్త్రాలు సంధించగా మరికొందరు వాక్యాలతోనే చురకలు అంటించారు. ఇచ్చే ఆ వరద సాయాన్నేదో పోలింగ్‌కేంద్రంలోనే ఇస్తే సమయం దాటినా అక్కడే బారులు తీరి ఉండేవారన్నది వాటిలో ఒకటి. తీగలవంతెన ప్రారంభ కార్యక్రమానికి మాత్రం కరోనాను లెక్కచేయకుండా వస్తారు గానీ ఓటేసేందుకు ఎందుకొస్తారంటూ కామెంట్లుపెట్టారు. ఓటర్లు రాకపోవడంతో, గంటల తరబడి ఖాళీగా ఉండలేక సిబ్బంది కునికిపాట్లు పడుతున్న వైనంపైనా పలువురు విభిన్నంగా స్పందించారు. పోలింగ్‌ కేంద్రంలో నిద్రించే సిబ్బందినే కాదు..ఓటేయకుండా బాధ్యతారహితంగా నిదురిస్తున్న పౌరుల బాధ్యతను కూడా గుర్తెరిగేట్లు చేయాలని కొందరు సూచించారు.

-ఈనాడు డిజిటల్‌, హైదరాబాద్‌