Yodha: ఓటీటీలోకి యాక్షన్‌ థ్రిల్లర్‌ ‘యోధ’.. ప్రస్తుతానికి అద్దె ప్రాతిపదికన..

ఇంటర్నెట్‌ డెస్క్‌: బాలీవుడ్‌ కథా నాయకుడు సిద్ధార్థ్‌ మల్హోత్రా ప్రధాన పాత్రలో నటించిన యాక్షన్‌ థ్రిల్లర్‌ ‘యోధ’. ఇటీవల ప్రేక్షకుల ముందుకు వచ్చిన ఈ చిత్రం మెప్పించింది. ఇప్పుడీ సినిమా ఓటీటీ ప్రేక్షకులను అలరించేందుకు సిద్ధమైంది. అమెజాన్‌ ప్రైమ్‌ వీడియో వేదికగా స్ట్రీమింగ్‌ అవుతోంది. ప్రస్తుతానికి అద్దె ప్రాతిపదికన (రూ.349) ఇది అందుబాటులోకి వచ్చింది. మే 10 తర్వాత ఉచితంగా చూడొచ్చు. ఈ విషయాన్ని చిత్రబృందం అధికారికంగా ప్రకటించింది. సాగర్‌ అంబ్రే, పుష్కర్‌ ఓఝా సంయుక్తంగా తెరకెక్కించిన ఈ చిత్రంలో రాశీఖన్నా హీరోయిన్‌గా నటించారు.

క‌థేంటంటే: త‌న తండ్రి సురేంద్ర క‌టియాల్ (రోనిత్ రాయ్‌) స్ఫూర్తితో యోధా టాస్క్‌ఫోర్స్‌లో క‌మాండోగా చేర‌తాడు అరుణ్ క‌టియాల్ (సిద్ధార్థ్ మ‌ల్హోత్రా). దూకుడుగా వ్య‌వ‌హ‌రిస్తూ ఆప‌రేష‌న్స్‌లో పాల్గొన‌డం అతడి శైలి. ఆ క్ర‌మంలో కొన్నిసార్లు నిబంధ‌న‌ల్ని కూడా అతిక్ర‌మిస్తుంటాడు. ఆయ‌న భార్య ప్రియంవ‌ద క‌టియాల్ (రాశీఖ‌న్నా) కేంద్ర ప్ర‌భుత్వంలో ఉన్నతోద్యోగి. అరుణ్ చేప‌ట్టిన ఓ ఆప‌రేష‌న్ ఫెయిల్ కావ‌డంతో ప్రముఖ శాస్త్ర‌వేత్త అయిన అనుజ్ నాయ‌ర్ ప్ర‌యాణిస్తున్న విమానం హైజాక్‌కు గురికావ‌డంతో, ఉగ్ర‌వాదుల చేతుల్లో ఆయ‌న దారుణ హ‌త్య‌కు గుర‌వుతాడు. అదంతా స‌మ‌న్వ‌యలోపంతో జ‌రిగింద‌ని, అరుణ్‌ త‌న వాద‌న‌ వినిపిస్తాడు. ఆ ఆపరేషన్‌ ప్రభావం అరుణ్‌, ప్రియంవ‌ద వైవాహిక జీవితంపై పడుతుంది. ఆ సంఘ‌ట‌న త‌ర్వాత యోధ టాస్క్‌ఫోర్స్ భ‌విత‌వ్యమే ప్ర‌శ్నార్థ‌కం అవుతుంది. ఆ తర్వాత ఉగ్రవాదుల కుట్ర‌ల‌ను అతడు ఎలా తిప్పికొట్టాడ‌నేది సినిమా చూసి తెలుసుకోవాల్సిందే.