Breaking | Feedback | ePratibha | E-PAPER | Pratibha

IND vs AUS WC 2023: ప్లేయర్‌ ఆఫ్ ది టోర్నమెంట్‌గా కోహ్లీ

ప్రపంచకప్‌ ఫైనల్‌లో భారత్‌పై ఆస్ట్రేలియా ఆరు వికెట్ల తేడాతో విజయం సాధించింది. తొలుత బ్యాటింగ్ చేసిన భారత్ నిర్ణీత 50 ఓవర్లలో 240 పరుగులకు ఆలౌటైంది. ఈ లక్ష్యాన్ని ఆసీస్ 43 ఓవర్లలో 4 వికెట్లు కోల్పోయి ఛేదించింది.

Updated : 04 Dec 2023 16:31 IST

19/11/2023 22:49(IST)

గెలవడానికి చాలా ప్రయత్నించాం: రోహిత్‌ శర్మ

ఈ రోజు మేము సరిగా ఆడలేకపోయాం. అనుకున్న ఫలితం రాలేదు. మ్యాచ్‌ గెలవడానికి చాలా ప్రయత్నించాం. ఇంకో 20, 30 పరుగులు చేయాల్సింది. కేఎల్‌ రాహుల్‌, కోహ్లీ మంచి భాగస్వామ్యాన్ని నెలకొల్పారు. 270-280 పరుగులు చేస్తామని భావించాం. అయితే ఆ క్రమంలో వికెట్లు కోల్పోవడంతో అనుకున్న పరుగులు సాధించలేకపోయాం. అయితే 240 పరుగుల చేసినప్పుడు ఎక్కువ వికెట్లు తీయాల్సింది. కానీ అలా జరగలేదు. హెడ్‌, లబుషేన్‌ భారీ భాగస్వామ్యంతో మ్యాచ్‌ను మాకు దూరం చేశారు. రెండో ఇన్నింగ్స్‌ బ్యాటింగ్‌కు కొంచెం అనుకూలించింది. అయితే దీన్ని సాకుగా చూపాలనుకోవడం లేదు. ఈ మ్యాచ్‌లో ప్లడ్‌ లైట్ల కింద బ్యాటింగ్‌ చేయడం ఏ జట్టుకైనా అనుకూలిస్తుందని మాకు ముందే తెలుసు. అద్భుతమైన భాగస్వామ్యం నెలకొల్పిన హెడ్‌, లబుషేన్‌కే ఈ మ్యాచ్‌ క్రెడిట్‌ దక్కుతుంది.

19/11/2023 22:20(IST)

కమిన్స్‌కు ప్రపంచకప్‌ను అందించిన ప్రధాని మోదీ

భారత ప్రధాని మోదీ, ఆస్ట్రేలియా ఉప ప్రధాని రిచర్డ్‌ మార్లెస్‌ ఇద్దరు కలిసి ప్రపంచకప్‌ను ఆస్ట్రేలియా జట్టుకు అందించారు. ఆ జట్టు కెప్టెన్‌ ప్యాట్‌ కమిన్స్‌ ప్రపంచకప్‌ను అందుకున్నారు.

19/11/2023 21:22(IST)

ఆసీస్‌దే ప్రపంచకప్..

ప్రపంచకప్‌ ఫైనల్‌లో భారత్‌పై ఆస్ట్రేలియా 6 వికెట్ల తేడాతో విజయం సాధించింది.
తొలుత బ్యాటింగ్ చేసిన భారత్ నిర్ణీత 50 ఓవర్లలో 240 పరుగులకు ఆలౌటైంది.
ఈ లక్ష్యాన్ని ఆసీస్ 43 ఓవర్లలో 4 వికెట్లు కోల్పోయి ఛేదించింది.

19/11/2023 20:29(IST)

120 బంతులు.. 74 పరుగులు

241 పరుగుల లక్ష్యఛేదనలో ఆస్ట్రేలియా 30 ఓవర్లు ముగిసేసరికి 167/3తో నిలిచింది.

లబుషేన్ (37), ట్రావిస్ హెడ్ (86) పరుగులతో ఉన్నారు.

ఆసీస్ 20 ఓవర్లలో 74 పరుగులు చేస్తే విజయం సాధిస్తుంది. బౌలర్లు వికెట్లు పడగొడితే భారత్ మళ్లీ పోటీలోకి వస్తుంది.

19/11/2023 20:23(IST)

అంపైర్స్‌ కాల్‌తో బతికిపోయాడు

లబుషేన్ అంపైర్స్‌ కాల్‌తో బతికిపోయాడు.
బుమ్రా వేసిన 28 ఓవర్‌లో ఐదో బంతిని లబుషేన్ డిఫెన్స్‌ చేయడానికి ప్రయత్నించాడు.
ఎల్బీడబ్ల్యూ కోసం భారత ఆటగాళ్లు అప్పీల్ చేయగా.. అంపైర్ నాటౌట్ ఇచ్చాడు.
భారత్ రివ్యూ తీసుకోగా.. బంతి వికెట్‌కు తాకినట్లు తేలింది.
కానీ, అంపైర్స్‌ కాల్‌తో లబుషేన్ బతికిపోయాడు.
28 ఓవర్లకు స్కోరు 162/3. హెడ్ (84), లబుషేన్ (34) పరుగులతో ఉన్నారు.

19/11/2023 20:01(IST)

వికెట్ కోసం ఎదురుచూపులు

ట్రావిస్ హెడ్, లబుషేన్‌ క్రీజులో కుదురుకుని నిలకడగా ఆడుతున్నారు.
భారత బౌలర్లు వికెట్ కోసం ప్రయత్నిస్తున్న ఏ మాత్రం అవకాశం ఇవ్వకుండా పరుగులు రాబడుతున్నారు.
జడేజా వేసిన 23 ఓవర్‌లో ఐదు సింగిల్స్ వచ్చాయి.
23 ఓవర్లకు స్కోరు 122/3. హెడ్ (54), లబుషేన్ (25) పరుగులతో ఉన్నారు.

19/11/2023 19:57(IST)

హెడ్ హాఫ్‌ సెంచరీ

ఆసీస్ ఓపెనర్ ట్రావిస్ హెడ్ 57 బంతుల్లో అర్ధ శతకం అందుకున్నాడు.
కుల్‌దీప్ వేసిన 21 ఓవర్‌లో తొలి బంతికి సింగిల్ తీసి హాఫ్‌ సెంచరీ పూర్తి చేసుకున్నాడు.
ఇదే ఓవర్‌లో మూడో బంతికి లబుషేన్ (23) ఫోర్ బాదాడు.
22 ఓవర్లకు స్కోరు 117/3.

19/11/2023 19:16(IST)

ప్రపంచకప్‌లో భారత్‌ మరో రికార్డు

వన్డే ప్రపంచకప్‌లో టీమ్‌ ఇండియా మరో అరుదైన రికార్డును సృష్టించింది. ఒక వరల్డ్‌కప్‌ ఈవెంట్‌లో అత్యధికంగా వికెట్లు పడగొట్టిన జట్టుగా నిలిచింది. తాజా ప్రపంచకప్‌లో భారత్‌ 98* వికెట్లు తీసి, 2007 నుంచి ఆస్ట్రేలియా పేరిట ఉన్న 97 వికెట్ల రికార్డును బద్దలు కొట్టింది. ఆ తర్వాతి స్థానాల్లో ఆస్ట్రేలియా 96 (2003), ఇంగ్లాండ్‌ 90 (2019), దక్షిణాఫ్రికా 88 (2023)లు ఉన్నాయి.

19/11/2023 18:48(IST)

మార్ష్‌ ఔట్

దూకుడుగా ఆడుతున్న మిచెల్ మార్ష్‌ (15)ని బుమ్రా ఔట్ చేశాడు.
అతడు వేసిన ఐదో ఓవర్‌లో మూడో బంతికి కేఎల్ రాహుల్‌కు క్యాచ్‌ ఇచ్చాడు.
5 ఓవర్లకు స్కోరు 41/2. హెడ్ (8), స్టీవ్ స్మిత్ (0) క్రీజులో ఉన్నారు.

19/11/2023 18:39(IST)

వికెట్.. 13 పరుగులు

షమి వేసిన ఇన్నింగ్స్‌ రెండో ఓవర్‌లో ఆసీస్‌ ఒక వికెట్ కోల్పోయి 13 పరుగులు చేసింది.
తొలి బంతికి వార్నర్ ఔటయ్యాడు. తర్వాత వైడ్ రూపంలో ఓ ఫోర్ వచ్చింది.
మిచెల్ మార్ష్‌ (5) నాలుగో బంతికి ఫోర్ బాదాడు. 2 ఓవర్లకు స్కోరు 28/1. ట్రావిస్ హెడ్ (5) పరుగులతో ఉన్నాడు.

19/11/2023 18:29(IST)

తొలి ఓవర్లో మూడు ఫోర్లు

బుమ్రా వేసిన తొలి బంతిని వార్నర్‌ ఫ్లిప్‌ చేశాడు. అది స్లిప్‌లో ఉన్న గిల్‌, కోహ్లీ మధ్య నుంచి వెళ్లింది.
అయితే వాళ్లిద్దరూ క్యాచ్‌ అందుకునేందుకు ప్రయత్నించకపోవడంతో బౌండరీకి వెళ్లిపోయింది.
నాలుగో బంతికి హెడ్‌ మరో ఫోర్‌ బాదాడు
చివరి బంతికి మరో బౌండరీ వచ్చింది.
దీంతో తొలి ఓవర్లో ఆసీస్‌ 15 పరుగులు రాబట్టింది.

19/11/2023 18:14(IST)

మైదానంలో సాంస్కృతిక సంబరాలు

భారత్‌ ఇన్నింగ్స్‌ ముగిసిన తర్వాత షెడ్యూల్‌ ప్రకారం మైదానంలో సాంస్కృతిక కార్యక్రమాలు మొదలయ్యాయి.
ఆదిత్య, ప్రీతమ్‌, జోనితా, నకాష్‌ అజీజ్‌, అమిత్‌ మిశ్ర, తుషార్‌ జోషి తదితర కళాకారులు సంగీత, నృత్య ప్రదర్శనలతో ఆకట్టుకుంటున్నారు.
500 మందికిపైగా కళాకారులు ఇందులో పాల్గొన్నారు.

19/11/2023 17:54(IST)

ఆస్ట్రేలియా టార్గెట్ 241

ఆస్ట్రేలియాతో జరుగుతున్న ప్రపంచకప్‌ ఫైనల్‌లో భారత్ గౌరవప్రదమైన స్కోరు చేసింది.
నిర్ణీత 50 ఓవర్లలో 240 పరుగులకు ఆలౌటైంది. కుల్‌దీప్‌ యాదవ్ (10) ఇన్నింగ్స్‌ చివరి బంతికి రనౌట్ అయ్యాడు.
తొలుత రోహిత్ శర్మ (47; 31 బంతుల్లో 4 ఫోర్లు, 3 సిక్స్‌లు) దూకుడుగా ఆడి మరోసారి మెరుపు ఆరంభం ఇచ్చాడు.
విరాట్ కోహ్లీ (54; 63 బంతుల్లో 4 ఫోర్లు), కేఎల్ రాహుల్ (66; 107 బంతుల్లో 1 ఫోర్) కీలక ఇన్నింగ్స్‌లు ఆడారు.
సూర్యకుమార్ యాదవ్ (18) పరుగులు చేశాడు. శుభ్‌మన్ గిల్ (4), శ్రేయస్ అయ్యర్ (4), జడేజా (9) విఫలమయ్యారు.
ఆసీస్ బౌలర్లలో మిచెల్ స్టార్క్‌ 3, హేజిల్ వుడ్ 2, కమిన్స్ 2, మ్యాక్స్‌వెల్, ఆడమ్ జంపా తలో వికెట్ పడగొట్టారు.

19/11/2023 17:26(IST)

ఎనిమిదో వికెట్

జస్‌ప్రీత్ బుమ్రా (1) ఔటయ్యాడు. ఆడమ్ జంపా వేసిన 45 ఓవర్‌లో ఐదో బంతికి వికెట్ల ముందు దొరికిపోయాడు.
దీంతో టీమ్ఇండియా ఎనిమిదో వికెట్ కోల్పోయింది.
45 ఓవర్లకు స్కోరు 215/8. కుల్‌దీప్ (1), సూర్యకుమార్ (14) పరుగులతో ఉన్నారు.

19/11/2023 17:21(IST)

50+ స్కోర్లలో కేఎల్‌దే అత్యల్ప స్ట్రైక్‌రేట్‌..

ఈ ప్రపంచకప్‌ టోర్నీలో 50+ పరుగులు సాధించిన వారిలో కేఎల్‌ రాహుల్‌దే ఈ ఇన్నింగ్స్‌లో అత్యల్ప స్ట్రైక్‌రేట్‌(61.68).
107 బంతుల్లో 66 పరుగులు చేసిన కేఎల్‌.. ఒక్క ఫోర్‌ మాత్రమే కొట్టాడు.

19/11/2023 17:02(IST)

40 ఓవర్లు..

40 ఓవర్లు ముగిసేసరికి భారత్ ఐదు వికెట్ల నష్టానికి 197 పరుగులు చేసింది.
హేజిల్ వుడ్ వేసిన 40 ఓవర్‌లో ఐదు పరుగులు వచ్చాయి.
కేఎల్ రాహుల్ (64), సూర్యకుమార్ (8) పరుగులతో ఉన్నారు.
చివరి 10 ఓవర్లలో భారత్ ఎన్ని పరుగులు రాబడుతుందో చూడాలి.

19/11/2023 16:42(IST)

సగం వికెట్లు డౌన్

టీమ్ఇండియా ఐదో వికెట్ కోల్పోయింది.
రవీంద్ర జడేజా (9) ఔటయ్యాడు.
హేజిల్‌వుడ్ వేసిన 36 ఓవర్‌లో ఐదో బంతికి వికెట్ కీపర్ జోష్‌ ఇంగ్లిస్‌కు క్యాచ్‌ ఇచ్చాడు.
36 ఓవర్లకు స్కోరు 178/5. సూర్యకుమార్ (0), కేఎల్ రాహుల్ (55) క్రీజులో ఉన్నారు.

19/11/2023 16:36(IST)

రాహుల్ అర్ధ శతకం

కేఎల్ రాహుల్ 86 బంతుల్లో అర్ధ శతకం పూర్తి చేసుకున్నాడు.
స్టార్క్‌ వేసిన 35 ఓవర్‌లో ఐదో బంతికి సింగిల్ తీసి హాఫ్ సెంచరీ అందుకున్నాడు.
35 ఓవర్లకు స్కోరు 173/4. జడేజా (9), రాహుల్ (50) పరుగులతో ఉన్నారు.

19/11/2023 16:33(IST)

ఆచితూచి బ్యాటింగ్

ఆసీస్ బౌలర్లు కట్టుదిట్టంగా బౌలింగ్ చేస్తున్నారు.
దీంతో భారత బ్యాటర్లు ఆచితూచి ఆడుతున్నారు.
స్టార్క్‌ వేసిన 33 ఓవర్‌లో మూడే పరుగులు వచ్చాయి.
33 ఓవర్లకు స్కోరు 165/4. రవీంద్ర జడేజా (6), కేఎల్ రాహుల్ (47) పరుగులతో ఉన్నారు.

19/11/2023 16:30(IST)

స్టేడియంలో ప్రముఖులు

భారత్ - ఆస్ట్రేలియా జట్ల మధ్య ఫైనల్‌ను వీక్షించేందుకు అన్ని రంగాల ప్రముఖులు హాజరయ్యారు. జగ్గీవాసుదేవ్‌, సచిన్‌, అనురాగ్‌, రోజర్ బిన్నీ, షారుఖ్‌ ఖాన్‌, ఆశా భోంస్లే తదితరులు ఉన్నారు.

19/11/2023 16:25(IST)

11-30 ఓవర్లలో తగ్గిన రన్‌రేట్‌..

వికెట్లు పడిపోవడంతో టీమ్‌ఇండియా ఆచితూచి ఆడుతోంది.
తొలి పది ఓవర్లలో 8 రన్‌రేట్‌తో 80 పరుగులు చేసింది.
11 నుంచి 30వ ఓవర్‌ వరకూ కేవలం 3.6 రన్‌రేట్‌తో 72 పరుగులు మాత్రమే చేసింది. ఈ ఓవర్ల మధ్య కేవలం ఒకే ఒక్క ఫోర్ మాత్రమే రావడం గమనార్హం.

19/11/2023 16:23(IST)

విరాట్ ప్రదర్శన ఇలా..

విరాట్ కోహ్లీ 11 ఇన్నింగ్స్‌ల్లో 765 పరుగులు చేశాడు.
ఇందులో మూడు సెంచరీలు, 6 అర్ధశతకాలు ఉన్నాయి.
వరుసగా ఐదుసార్లు 50+ స్కోర్లు చేయడం కోహ్లీకిది రెండోసారి.
సగటున 95.62 సగటుతో ఈ వరల్డ్ కప్‌లో పరుగులు రాబట్టాడు.

19/11/2023 16:15(IST)

విరాట్ - కేఎల్ భాగస్వామ్యం 87 రన్స్‌

స్వల్ప వ్యవధిలో వికెట్లు పడటంతో విరాట్ కోహ్లీ (54)-కేఎల్ రాహుల్ (39) ఆచితూచి ఆడారు. నాలుగో వికెట్‌కు 109 బంతుల్లో 87 పరుగులు రాబట్టారు. అయితే, క్రీజ్‌లో కుదురుకున్న విరాట్ అర్ధశతకం సాధించిన కాసేపటికే పెవిలియన్‌కు చేరాడు.

19/11/2023 16:05(IST)

ప్చ్‌.. కోహ్లీ ఔట్

భారత అభిమానుల నిరాశకు ఎదురైంది.
విరాట్ కోహ్లీ (54; 63 బంతుల్లో) ఔటయ్యాడు.
కమిన్స్‌ వేసిన 29 ఓవర్‌లో మూడో బంతికి బౌల్డ్ అయ్యాడు.
దీంతో సూర్యకుమార్‌కు బదులు జడేజా క్రీజులోకి వచ్చాడు.
29 ఓవర్లకు స్కోరు 149/4. రాహుల్ (37), జడేజా (0) క్రీజులో ఉన్నారు.

19/11/2023 15:59(IST)

కేవలం రెండే ఎక్స్‌ట్రాల..

ప్రపంచకప్‌లో ఫైనల్‌లో ఆస్ట్రేలియా బౌలర్లు కట్టుదిట్టంగా బౌలింగ్‌ చేస్తున్నారు. ఇప్పటివరకూ 27 ఓవర్లు పూర్తి కాగా, కేవలం రెండంటే రెండే అదనపు పరుగులు ఇచ్చారు. మిచెల్‌ స్టార్క్‌ ఒక వైడ్‌ ఇవ్వగా లెగ్‌ బై రూపంలో మరో పరుగు వచ్చింది. 97 బంతుల తర్వాత భారత ఇన్నింగ్స్‌లో బౌండరీ నమోదైందంటే ఆసీస్‌ ఏ స్థాయిలో ఫీల్డింగ్‌ చేస్తుందో అర్థం చేసుకోవచ్చు.

19/11/2023 15:59(IST)

గంట తర్వాత బౌండరీ

గంట తర్వాత బౌండరీ భారత్ ఇన్నింగ్స్‌లో బౌండరీ నమోదైంది.
మ్యాక్స్‌వెల్ వేసిన 27 ఓవర్‌లో ఏడు పరుగులు వచ్చాయి.
రెండో బంతికి కేఎల్ రాహుల్ ఫోర్ బాదాడు.
27 ఓవర్లకు స్కోరు 142/3. రాహుల్ (34), కోహ్లీ (51) పరుగులతో ఉన్నారు.

19/11/2023 15:45(IST)

బౌండరీలు లేవు..

ఆసీస్ బౌలర్లు కట్టుదిట్టంగా బౌలింగ్ చేస్తున్నారు.
దీంతో భారత బ్యాటర్లు రిస్క్‌ చేయకుండా ఎక్కువగా సింగిల్స్‌కే ప్రాధాన్యం ఇస్తున్నారు.
సూమారు గంట నుంచి ఒక్క బౌండరీ రాలేదు.
స్టార్క్ వేసిన 23 ఓవర్‌లో నాలుగు పరుగులు వచ్చాయి.
23 ఓవర్లకు స్కోరు 125/3. కోహ్లీ (45), కేఎల్ రాహుల్ (23) పరుగులతో ఉన్నారు.

19/11/2023 15:19(IST)

ఏడు ఓవర్లుగా నో బౌండరీ

భారత ఇన్నింగ్స్‌లో గత ఏడు ఓవర్లలో ఒక్క బౌండరీ కూడా లేదు. ఆసీస్‌ కట్టుదిట్టంగా బౌలింగ్ చేస్తుండటంతో పరుగుల రాక కాస్త కష్టంగా మారింది. కమిన్స్‌ వేసిన ఇన్నింగ్స్‌ 17వ ఓవర్‌లో కేవలం మూడు పరుగులే వచ్చాయి. దీంతో భారత్‌ స్కోరు 104/3.

19/11/2023 15:17(IST)

భారత జెర్సీతో వరుణ్‌ తేజ్‌

టాలీవుడ్ నటుడు వరుణ్‌ తేజ్ భారత జెర్సీతో దిగిన ఫొటోను తన సోషల్‌ మీడియాలో షేర్ చేశాడు. టీమ్ఇండియా విజయం సాధించాలని ఆకాంక్షించాడు. సినీ ప్రముఖులు ప్రత్యక్షంగా మ్యాచ్‌ను వీక్షించేందుకు అహ్మదాబాద్‌ స్టేడియానికి వెళ్లిన సంగతి తెలిసిందే.

19/11/2023 15:10(IST)

ఈ ప్రపంచకప్‌లో రోహిత్‌ శర్మ రికార్డులివే!

ధాటిగా బ్యాటింగ్‌ ప్రారంభించిన టీమ్‌ ఇండియా కెప్టెన్‌ రోహిత్‌శర్మ (Rohit Sharma) తృటిలో అర్ధశతకాన్ని చేజార్చుకున్న సంగతి తెలిసిందే. 31 బంతుల్లో 47 పరుగులు చేసిన అతడు మ్యాక్‌వెల్‌ బౌలింగ్‌లో ట్రావిస్‌ హెడ్‌కు క్యాచ్‌ ఇచ్చి పెవిలియన్‌ చేరాడు. దీంతో తాజాగా టోర్నీలో రోహిత్‌ బ్యాటింగ్‌ అంకం ముగిసింది. ఈ క్రమంలో పలు రికార్డులను రోహిత్‌ నమోదు చేశాడు.

11 ఇన్నింగ్స్‌ల్లో రోహిత్‌ 597 పరుగులు చేశాడు. సగటు 54.27 కాగా, స్ట్రైక్‌ రేట్‌ 125.94
ఒక శతకం, మూడు అర్ధ శతకాలు ఉన్నాయి.
మొత్తం 31 సిక్స్‌లు బాదాడు. ఓ వరల్డ్‌కప్‌లో ఓ బ్యాటర్‌ కొట్టిన అత్యధిక సిక్స్‌లు ఇవే.
అత్యధిక పరుగులు చేసిన కెప్టెన్‌గాను రోహిత్‌ నిలిచాడు.

19/11/2023 15:04(IST)

మైదానంలోకి పాలస్తీనా మద్దతుదారుడు

భారత ఇన్నింగ్స్‌ కొనసాగుతుండగా.. మైదానంలోకి ఓ వ్యక్తి దూసుకొచ్చాడు. ‘ఫ్రీ పాలస్తీనా’ అని రాసి ఉన్న చొక్కొను ధరించిన అతడు నేరుగా విరాట్‌ కోహ్లీ దగ్గరకు వెళ్లి భుజంపై చేసి వేశాడు. దీంతో అప్రమత్తమైన భద్రతాసిబ్బంది వెంటనే అతడిని మైదానం నుంచి బయటకు తీసుకెళ్లారు.

19/11/2023 14:49(IST)

శ్రేయస్‌ ఔట్

భారత్‌కు మరో షాక్‌ తగిలింది.
కమిన్స్‌ బౌలింగ్‌లో (10.2వ ఓవర్‌) కీపర్‌ చేతికి క్యాచ్‌ఇచ్చి శ్రేయస్‌ (4) పెవిలియన్‌కు చేరాడు.
దీంతో 81 పరుగుల వద్ద టీమ్‌ఇండియా మూడో వికెట్‌ను కోల్పోయింది.
ఈ ఓవర్‌లో కేవలం రెండు పరుగులు మాత్రమే వచ్చాయి.
భారత్ స్కోరు 11 ఓవర్లకు 83/3.
క్రీజ్‌లో విరాట్ కోహ్లీ (24*), కేఎల్ రాహుల్ (1*) ఉన్నారు.

19/11/2023 14:44(IST)

రోహిత్ ఔట్

రోహిత్ శర్మ (47) ఔటయ్యాడు.
మ్యాక్స్‌ వెల్‌ బౌలింగ్‌లో (9.4వ ఓవర్) ట్రావిస్‌ హెడ్‌ చేతికి చిక్కాడు.
వరుసగా సిక్స్‌, ఫోర్ కొట్టిన తర్వాత మరో భారీ షాట్‌కు యత్నించాడు.
అయితే, ట్రావిస్‌ వెనక్కి పరుగెడుతూ అద్భుతంగా క్యాచ్‌ను ఒడిసిపట్టాడు.
దీంతో 76 పరుగుల వద్ద టీమ్‌ఇండియా రెండో వికెట్‌ను కోల్పోయింది.
ఈ ఓవర్‌లో మొత్తం 14 పరుగులు వచ్చాయి.
అనంతరం క్రీజ్‌లోకి శ్రేయస్‌ అయ్యర్ (4*) వచ్చాడు.
ఒక బౌండరీ కొట్టాడు.
దీంతో భారత్‌ స్కోరు 10 ఓవర్లకు 80/2.

19/11/2023 14:43(IST)

ఫైనల్‌లో ఫాస్టెస్ట్‌ 50.. రికార్డు మనదే

ప్రపంచకప్‌ ఫైనల్‌లో వేగంగా 50 పరుగులు చేసిన జట్టుగా భారత్‌ నిలిచింది. ఆసీస్‌తో జరుగుతున్న ఫైనల్‌లో భారత్‌ 6.3 ఓవర్లలో 50 పరుగులు చేసింది. 2003లో ఆసీస్‌ 6.6 ఓవర్లలో హాఫ్‌ సెంచరీ చేసిందే ఇప్పటివరకు రికార్డ్‌.

19/11/2023 14:41(IST)

రోహిత్‌ మరో రికార్డు

ప్రపంచకప్‌లో టీమ్‌ ఇండియా కెప్టెన్‌ రోహిత్‌ శర్మ (Rohit Sharma) మరో రికార్డు సృష్టించాడు. ఒక వరల్డ్‌ కప్‌ ఎడిషన్‌లో అత్యధిక పరుగులు చేసిన కెప్టెన్‌గా రికార్డు సృష్టించాడు. ఆస్ట్రేలియాతో జరుగుతున్న ఫైనల్‌ మ్యాచ్‌లో 581 పరుగుల మార్కును దాటి, కివిస్‌ ఆటగాడు విలియమసన్‌ (578) పేరిటి ఉన్న రికార్డు బద్దలు కొట్టాడు. జయవర్దనే (548), రికీ పాంటింగ్‌ (539), ఫించ్‌ (507) ఆ తర్వాతి స్థానాల్లో ఉన్నారు.

19/11/2023 14:34(IST)

కోహ్లీ హ్యాట్రిక్ ఫోర్లు

7 ఓవర్లు: విరాట్ కోహ్లీ (16*) హ్యాట్రిక్‌ ఫోర్లు బాదేశాడు.
స్టార్క్‌ బౌలింగ్‌లో 14 పరుగులు వచ్చాయి.
దీంతో భారత్‌ స్కోరు బోర్డు కూడా వేగం అందుకుంది.
ప్రస్తుతం టీమ్‌ఇండియా స్కోరు 54/1.
క్రీజ్‌లో కోహ్లీతోపాటు రోహిత్ (33*) ఉన్నాడు.

19/11/2023 14:22(IST)

గిల్ ఔట్

శుభ్‌మన్‌ గిల్ (4) ఔటయ్యాడు.
స్టార్క్‌ బౌలింగ్‌లో (4.2వ ఓవర్‌) ఆడమ్‌ జంపా చేతికి క్యాచ్‌ ఇచ్చాడు.
దీంతో 30 పరుగుల వద్ద తొలి వికెట్‌ను భారత్‌ నష్టపోయింది.
అనంతరం క్రీజ్‌లోకి విరాట్ కోహ్లీ (1*) వచ్చాడు.
ఈ ఓవర్‌లో ఏడు పరుగులు వచ్చాయి.
చివరి బంతిని రోహిత్ (31*) సిక్స్‌గా మలిచాడు.
ప్రస్తుతం భారత్ స్కోరు 5 ఓవర్లకు 37/1.

19/11/2023 14:16(IST)

క్యాచ్‌ మిస్‌

3 ఓవర్లు: భారత యువ బ్యాటర్ గిల్ (3*) ఔటయ్యే ప్రమాదం నుంచి తప్పించుకున్నాడు.
స్టార్‌ వేసిన తొలి బంతిని ఆడబోయి స్లిప్‌లో దొరికిపోయేవాడు.
అయితే, ఫీల్డర్లకు కాస్త ముందు పడటంతో లైఫ్‌ లభించింది.
ఈ ఓవర్‌లో ఐదు పరుగులు వచ్చాయి.
దీంతో భారత్ స్కోరు 18/0.
క్రీజ్‌లో గిల్‌తోపాటు కెప్టెన్ రోహిత్ శర్మ (14*) ఉన్నాడు.

19/11/2023 13:57(IST)

మేం బ్యాటింగ్‌ చేయాలనుకున్నాం: రోహిత్

టాస్‌ నెగ్గితే మేం తొలుత బ్యాటింగ్‌ చేయాలని భావించాం. పిచ్‌ చాలా బాగుంది. స్కోరు బోర్డుపై భారీగా పరుగులు ఉంచేందుకు ప్రయత్నిస్తాం. క్రికెట్‌లోనే గొప్ప సందర్భం. ఫైనల్‌లో కెప్టెన్సీ చేయాలనే కల సాకారమైంది. గత పది మ్యాచుల్లో ఎలాంటి ఆటతీరును ప్రదర్శించామో ఈ మ్యాచ్‌లోనూ ఆడతాం.

19/11/2023 13:53(IST)

ఆల్‌ది బెస్ట్‌ టీమ్‌ఇండియా: నరేంద్ర మోదీ

వన్డే ప్రపంచకప్‌ ఫైనల్‌లో తలపడుతున్న టీమ్‌ఇండియాకు ప్రధాని నరేంద్ర మోదీ శుభాకాంక్షలు తెలిపారు. 140 కోట్ల మంది మద్దతుగా నిలుస్తున్నారు. అద్భుతంగా ఆడి భారత్‌ను విశ్వవిజేతగా నిలపాలని ఆశిస్తున్నానని ట్వీట్ చేశారు.

19/11/2023 13:39(IST)

భారత జట్టులో మార్పుల్లేవు..

గత మ్యాచ్‌లో ఆడిన జట్టుతోనే భారత్ బరిలోకి దిగుతోంది. రోహిత్ శర్మ (కెప్టెన్), శుభ్‌మన్‌ గిల్, విరాట్ కోహ్లీ, శ్రేయస్ అయ్యర్, కేఎల్ రాహుల్ (వికెట్ కీపర్), సూర్యకుమార్‌ యాదవ్, రవీంద్ర జడేజా, షమీ, బుమ్రా, కుల్‌దీప్ యాదవ్, సిరాజ్

19/11/2023 13:27(IST)

మా దృష్టి అంతా దానిపైనే: బుమ్రా

చివరి వరకూ బాధ్యతలను సక్రమంగా నిర్వర్తించడంపైనే మేం దృష్టిపెట్టాం. స్టేడియంలో వాతావరణం అద్భుతంగా ఉంది. అభిమానులు, కుటుంబసభ్యులు పెద్ద ఎత్తున మద్దతుగా నిలిచేందుకు వచ్చారు. స్వదేశంలో ఆడేటప్పుడు ఫ్యాన్స్‌ సపోర్ట్‌ అద్భుతం.

19/11/2023 13:25(IST)

మ్యాచ్‌ టై అయితే పరిస్థితేంటి?

భారత్-ఆసీస్ మధ్య ఫైనల్‌ మ్యాచ్‌ సర్వం సిద్ధమైంది. ఒకవేళ ఇరు జట్ల స్కోర్లు సమమైతే అప్పుడు ‘టై’ అవుతుంది. ఇలాంటి సమయంలో మ్యాచ్ ఫలితాన్ని గత వరల్డ్‌ కప్ ఫైనల్‌ మాదిరిగా బౌండరీలను లెక్కకట్టి విజేతను ప్రకటించడం జరగదు. గతంలో మాదిరిగానే సూపర్‌ ఓవర్‌ను ఆడిస్తారు. అయితే, ఆ సూపర్‌ ఓవర్‌ కూడా టైగా ముగిస్తే.. విజేత తేలే వరకూ సూపర్‌ ఓవర్లను కొనసాగిస్తూనే ఉంటారు. అలాగే ఫైనల్ మ్యాచ్‌ కోసం అదనంగా 120 నిమిషాలను కేటాయించడం జరిగింది. అనుకోని సంఘటనల వల్ల మ్యాచ్‌ ఆలస్యమైనా ఎలాంటి ఇబ్బంది రాకుండా ఉండేందుకే ఐసీసీ ఇలాంటి నిర్ణయం తీసుకుంది.

19/11/2023 12:51(IST)

వరల్డ్‌ కప్‌ ఫైనల్‌.. నాని ‘హాయ్‌ నాన్న’ ప్రమోషన్‌

వన్డే ప్రపంచ కప్‌ ఫైనల్‌లో ‘హాయ్‌ నాన్న’ చిత్రాన్ని ప్రమోట్‌ చేసేందుకు నాని ముంబయి వెళ్లారు. దర్శకుడు హరీశ్‌ శంకర్‌తోపాటు పలువురు సినీ తారలు టీమ్‌ ఇండియాకు ఆల్‌ ది బెస్ట్ చెబుతూ ట్వీట్స్‌ పెట్టారు.

19/11/2023 12:45(IST)

పిచ్‌ రిపోర్ట్

భారత్ - పాకిస్థాన్‌ జట్ల మధ్య జరిగిన మ్యాచ్‌కు వాడిన పిచ్‌నే ఫైనల్‌ కోసం సిద్ధం చేసినట్లు తెలుస్తోంది. నల్లరేగిడితో చేసిన పిచ్. బౌన్స్‌ తక్కువగా ఉండటంతోపాటు బంతి నెమ్మదిగా తిరిగే అవకాశం ఉంది. ఈ వరల్డ్‌ కప్‌లో నాలుగు మ్యాచుల్లో ఛేజింగ్‌ చేసిన జట్టే మూడుసార్లు విజేతగా నిలిచింది. తేమ ప్రభావం కూడా కాస్త ఉండొచ్చు. నరేంద్ర మోదీ స్టేడియంలో తొలి ఇన్నింగ్స్‌ యావరేజ్‌ స్కోరు 251. మరి టాస్ నెగ్గే జట్టు తొలుత ఏం ఎంచుకుంటుందనేది ఆసక్తికరంగా మారింది.

19/11/2023 12:35(IST)

అహ్మదాబాద్ స్టేడియం వద్ద అభిమానుల కోలాహలం

క్రికెట్‌ ప్రపంచం ఆసక్తిగా ఎదురు చూస్తున్న వన్డే ప్రపంచకప్‌ 2023లో ఇండియా, ఆస్ట్రేలియా జట్ల మధ్య మ్యాచ్‌ మరికాసేపట్లో ప్రారంభం కాబోతోంది. అహ్మదాబాద్‌ వేదికగా జరగనున్న తుది పోరులో భారత్‌ × ఆస్ట్రేలియాలు తలపడనున్నాయి. ఈ మ్యాచ్‌ను వీక్షించేందుకు నరేంద్రమోదీ స్టేడియానికి అభిమానులు భారీగా తరలివస్తున్నారు. చిత్రాల కోసం క్లిక్‌ చేయండి

19/11/2023 12:14(IST)

ప్రపంచ కప్‌ విజేతకు ప్రైజ్‌మనీ ఎంతంటే?

వన్డే ప్రపంచకప్‌ విజేతగా నిలిచిన జట్టుకు ఐసీసీ 40 లక్షల డాలర్లను ప్రైజ్‌మనీగా ఇవ్వనుంది. మన రూపాయల్లో దాదాపు 33 కోట్లు. ఇక రన్నరప్‌గా నిలిచిన టీమ్‌కు 20 లక్షల డాలర్లు. అంటే దాదాపు 16.50 కోట్లు దక్కనున్నాయి. పూర్తి వార్త కోసం క్లిక్‌ చేయండి

19/11/2023 11:51(IST)

వరల్డ్‌కప్‌ ఫైనల్‌.. హోటళ్లలో భారీ తెరలు, ప్రత్యేక రాయితీలు

ప్రపంచ కప్‌ క్రికెట్‌లో భారత్‌-ఆసీస్‌ మధ్య తుదిపోరు వీక్షణకు నగరం సిద్ధమైంది. ఒకవైపు ఎన్నికల కోలాహలం ఉన్నప్పటికీ అభిమానుల కోసం నగరంలోని పబ్బులు, క్లబ్బులు, హోటళ్లు ప్రత్యేక ఏర్పాట్లు చేశాయి. వీక్షకుల కోసం భారీ తెరలను అందుబాటులోకి తెచ్చాయి. మధ్యాహ్నం నుంచి మ్యాచ్‌ ప్రారంభం కానున్న నేపథ్యంలో అభ్యర్థులు తమ ప్రచారాన్ని మ్యాచ్‌ సమయానికి ముగించేలా ప్రణాళికలు వేసుకున్నారు. మరోవైపు ఆతిథ్య కేంద్రాల్లో యువకులు పెద్దఎత్తున బుకింగ్‌ చేసుకున్నారు. పూర్తి వార్త కోసం క్లిక్‌ చేయండి

19/11/2023 11:40(IST)

భారత్‌ గెలిస్తే భోజనం ఉచితం: దాబా యజమాని

వన్డే ప్రపంచకప్‌ను టీమ్‌ఇండియా గెలిస్తే తన దాబాలో భోజనం ఉచితంగా ఇస్తానని అహ్మదాబాద్‌కు చెందిన నరేంద్ర సింగ్ తెలిపారు. భారత్ తొలిసారి కప్‌ను గెలిచిన 1983 నుంచి ప్రతి మెగా టోర్నీని చూస్తున్నట్లు పేర్కొన్నారు. ‘‘కపిల్‌ దేవ్‌ నాయకత్వంలో భారత్ 1983లో విశ్వవిజేతగా నిలిచింది. అప్పటి నుంచి ప్రతి వరల్డ్‌ కప్‌ను చూస్తున్నా. ఇప్పుడు మళ్లీ టీమ్‌ఇండియా ఫైనల్‌కు చేరింది. ఈసారి కప్‌ గెలిస్తే భోజనం ఉచితంగా పెడతా’’ అని నరేంద్ర వెల్లడించారు.

19/11/2023 11:27(IST)

గతం గతః.. ఇప్పుడెలా ఉన్నామన్నదే ముఖ్యం: కమిన్స్‌కు రోహిత్‌ కౌంటర్‌..!

ప్రపంచకప్‌ మహాసంగ్రామం మరికొద్ది గంటల్లో ఉందనగా.. ఆసీస్‌ కెప్టెన్‌ పాట్‌ కమిన్స్‌ చేసిన కామెంట్లు.. దానికి రోహిత్‌ కామెంట్లు మరింత హీటు పెంచాయి. తమకు అద్భుతమైన అదనపు బలం ఉందంటూ ఆసీస్‌ కెప్టెన్‌ కమిన్స్‌ చేసిన కామెంట్లకు హిట్‌మ్యాన్‌ తనదైన శైలిలో బదులిచ్చాడు. ఇటీవల కమిన్స్‌ మాట్లాడుతూ 2015లో ప్రపంచకప్‌ ఫైనల్స్‌ ఆడిన ఆటగాళ్లు పెద్దసంఖ్యలో తమ జట్టులో ఉన్నారని.. ఆ అనుభవం తమకు కలిసి వస్తుందని వ్యాఖ్యానించాడు. ఇదే విషయాన్ని నిన్న రోహిత్‌ శర్మ ప్రీ మ్యాచ్‌ కాన్ఫరెన్స్‌లో విలేకర్లు ప్రస్తావించారు. దీనికి హిట్‌ మ్యాన్‌ తనదైన శైలిలో స్పందించాడు. పూర్తి వార్త కోసం క్లిక్‌ చేయండి

19/11/2023 11:23(IST)

వరల్డ్ కప్‌ ఫైనల్‌.. గూగుల్‌ ‘స్పెషల్‌ డూడుల్‌’

వన్డే ప్రపంచ కప్‌ ఫైనల్‌ నేపథ్యంలో గూగుల్ సంస్థ ప్రత్యేకంగా డూడుల్‌ను క్రియేట్‌ చేసింది. తుది పోరుకు చేరిన భారత్- ఆస్ట్రేలియా జట్లకు గుడ్‌లక్‌ చెప్పింది.

19/11/2023 11:00(IST)

ఆసీస్‌ను తేలిగ్గా తీసుకోవద్దు.. టైటిల్‌ మనదే : బీసీసీఐ అధ్యక్షుడు

ప్రత్యర్థి ఆస్ట్రేలియాను అంత తక్కువగా అంచనా వేయొద్దని.. ఎలాంటి పొరపాట్లకు తావులేకుండా టీమ్‌ఇండియా ఆడాలని పలువురు సూచిస్తున్నారు. ఫైనల్‌ పోరు ముందు బీసీసీఐ(BCCI) అధ్యక్షుడు రోజర్‌బిన్నీ(Roger Binny) కూడా రోహిత్‌ సేనకు పలు సూచనలు చేశాడు. పూర్తి వార్త కోసం క్లిక్‌ చేయండి

19/11/2023 10:50(IST)

విరాట్, రోహిత్ కాదు.. అతడే ‘ప్లేయర్‌ ఆఫ్‌ ది టోర్నీ’: యువరాజ్‌ సింగ్‌

వన్డే ప్రపంచకప్‌ (ODI World Cup 2023) తుది సమరానికి సమయం ఆసన్నమైంది. భారత్-ఆస్ట్రేలియా జట్ల మధ్య అహ్మదాబాద్ వేదికగా మ్యాచ్‌ జరగనుంది. కప్‌ను ఎవరు సొంతం చేసుకుంటారనేది పక్కన పెడితే ‘ప్లేయర్ ఆఫ్ ది టోర్నీ’గా ఎవరు నిలుస్తారనే దానిపై ఆసక్తికర చర్చ నడుస్తోంది. తాజాగా ఇదే అంశంపై భారత మాజీ ఆల్‌రౌండర్ యువరాజ్‌ సింగ్‌ స్పందించాడు. అద్భుతమైన ఓపెనింగ్‌తో జట్టుకు శుభారంభం అందిస్తున్న రోహిత్‌ శర్మతోపాటు ఈ టోర్నీలో అత్యధిక పరుగులతో అగ్రస్థానంలో ఉన్న విరాట్ కోహ్లీని కాదని.. పేస్‌ సంచలనం షమీ వైపు యువీ మొగ్గు చూపాడు. అలాగే హార్దిక్‌పాండ్య లేనిలోటు ఎక్కడా కనిపించలేదని.. రిజర్వ్‌ బెంచ్‌ చాలా బలంగా ఉందన్నాడు.

19/11/2023 10:38(IST)

వరల్డ్‌ కప్‌ టికెట్లపై వ్యాపారవేత్త హర్ష గోయెంకా ఆసక్తికర వ్యాఖ్యలు!

దేశమంతా వరల్డ్‌ కప్‌ (World Cup 2023) మేనియా నడుస్తోంది. భారత్‌- ఆస్ట్రేలియా మధ్య జరగనున్న తుది పోరు కోసం యావత్‌ దేశం ఆసక్తిగా ఎదురుచూస్తోంది. ప్రత్యక్షంగా లక్షకుపైగా.. టీవీల ముందు కోట్లాది మంది వీక్షించేందుకు సిద్ధమయ్యారు. ఇలాంటి మ్యాచ్‌ టికెట్లకు ఎంత డిమాండ్‌ ఉంటుందో అందరికీ తెలిసిందే. ఈ తరుణంలో ప్రముఖ పారిశ్రామికవేత్త హర్ష గోయెంకా (Harsh Goenka) ‘ఎక్స్‌’లో చేసిన ఓ పోస్ట్‌ చర్చనీయాంశమైంది. ఓ వర్గం నుంచి విమర్శలూ ఎదురవుతున్నాయి. సాధారణంగా ఇలాంటి మ్యాచ్‌లకు వివిధ రంగాలకు చెందిన ప్రముఖులను నిర్వాహకులే స్వయంగా ఆహ్వానిస్తుంటారు. వారికి ఉచితంగా పాస్‌లు అందజేస్తుంటారు. ఈ క్రమంలోనే పలువురు రాజకీయ, వ్యాపార, సినీ ప్రముఖులు పాస్‌లు పొందారు. దీనిపైనే తాజాగా గోయెంకా ఓ విమర్శనాత్మక పోస్ట్‌ చేశారు. పూర్తి వార్త కోసం క్లిక్‌ చేయండి

19/11/2023 10:13(IST)

ఇప్పుడుకాక.. ఇంకెప్పుడు

2023 ప్రపంచకప్‌ (World Cup 2023 Final) అంతిమ సమరానికి రంగం సిద్ధమైంది. ఒక్క మ్యాచ్‌ ఓడకుండా, ఎదురొచ్చిన ప్రతి ప్రత్యర్థినీ ఓడిస్తూ ఫైనల్‌ చేరిన భారత్‌ (Team India) ఓవైపు.. రెండు వరుస ఓటములతో టోర్నీని ఆరంభించినా, తర్వాత బలంగా పుంజుకుని వరుస విజయాలతో ఫైనల్‌కు దూసుకొచ్చిన ఆస్ట్రేలియా (Australia) ఇంకోవైపు. మూడోసారి ప్రపంచకప్‌ గెలవడానికి వచ్చిన సువర్ణావకాశాన్ని వదులకోకూడదని భారత్‌ పట్టుదలతో ఉంటే.. తమ టైటిళ్ల ఖజానాను అరడజనుకు పెంచాలని ఆస్ట్రేలియా చూస్తోంది. టోర్నీలో ఆధిపత్యానికి తోడు సొంతగడ్డపై ఆడుతుండటం రోహిత్‌సేనను ఫేవరెట్‌గా నిలబెడుతోంది. పూర్తి వార్త కోసం క్లిక్‌ చేయండి

19/11/2023 09:56(IST)

ఎవరయ్యేనో హీరో

భారత్‌ ఇప్పటిదాకా రెండు ప్రపంచకప్‌ (World Cup)లు గెలిచింది. ఈ టోర్నీల ఫైనల్స్‌లో టీమ్‌ఇండియా (Team India) తరఫున ఒక ఆటగాడు హీరోగా మారి జట్టును గెలిపించాడు. 1983 కప్‌లో మొహిందర్‌ అమర్‌నాథ్‌ (Mohinder Amarnath).. 2011లో మహేంద్రసింగ్‌ ధోని (MS Dhoni) జట్టు విజయాల్లో కీలకమయ్యారు. మరి ఈసారి ఫైనల్లో హీరో కాబోయేది ఎవరు! 83 ప్రపంచకప్‌ ఫైనల్లో అమర్‌నాథ్‌ అటు బ్యాట్‌తో ఇటు బంతితో మాయ చేసి వెస్టిండీస్‌ను ముంచాడు. భారత్‌ 183 పరుగులకే చేస్తే అందులో అమర్‌నాథ్‌ వాటా 26 పరుగులు. ఇక బౌలింగ్‌లో కీలక తరుణంలో వికెట్లు తీసి ప్రత్యర్థిని దెబ్బ కొట్టాడు. డూజన్‌ (25), మార్షల్‌ (18) ఔట్‌ చేసిన అమర్‌నాథ్‌ భారత్‌ను విజయపథంలో నడిపించాడు. పూర్తి వార్త కోసం క్లిక్‌ చేయండి

19/11/2023 09:54(IST)

వీరులారా.. విజయీభవ

కోట్ల ప్రజల ఆశలు మోస్తూ.. ప్రపంచకప్‌(World Cup)లో అద్భుత ప్రదర్శనతో ఫైనల్‌ చేరిన టీమ్‌ఇండియా(Team India).. తుది లక్ష్యాన్ని చేరుకునేందుకు మిగిలింది ఇంకో 100 ఓవర్లు! ప్రపంచకప్‌లో మన ఆధిపత్యాన్ని చరిత్రగా చెప్పుకోవాలన్నా.. ఇప్పటివరకూ సాధించిన ఆ పది విజయాలకు విలువ ఉండాలన్నా.. పదికాలాల పాటు ఈ గెలుపు గుర్తుండాలన్నా.. అసలైన ఆట ఆరంభించేందుకు మిగిలింది మరికొన్ని గంటలే! పూర్తి వార్త కోసం క్లిక్‌ చేయండి

19/11/2023 06:12(IST)

భారత్‌-ఆస్ట్రేలియా ఫైనల్‌ మ్యాచ్‌.. వాతావరణం అనుకూలించేనా?

వన్డే ప్రపంచకప్‌ ఫైనల్‌ మ్యాచ్‌కు (ODI Worldcup Final) సర్వం సిద్ధమైంది. అహ్మదాబాద్‌లోని నరేంద్రమోదీ స్టేడియం (Narendra Modi Stadium) వేదికగా భారత్‌-ఆస్ట్రేలియా (Ind vs Aus) మధ్య ఆదివారం జరగనున్న మ్యాచ్‌ కోసం ప్రపంచవ్యాప్తంగా క్రికెట్ అభిమానులంతా ఉత్కంఠగా ఎదురు చూస్తున్నారు. అయితే, వాతావరణం సహకరిస్తుందా?లేదా అనే అనుమానం అభిమానుల మనసులను తొలిచేస్తోంది. పూర్తి కథనం కోసం క్లిక్‌ చేయండి

19/11/2023 06:10(IST)

ఇంకో కప్పు నాయకా..

భారత్‌లో క్రికెట్‌ ఓ మతం అయితే.. ప్రపంచకప్‌ ఓ పండగ. ఇక ప్రపంచకప్‌లో విజేతగా నిలిస్తే భారత్‌లో అన్ని మతాలు కలిపి జరుపుకొనే అతిపెద్ద పండగే. అలాంటి పండగలు రెండుసార్లు జరుపుకున్నాం. 1983 కపిల్‌డెవిల్స్‌.. 2011 ధోనీసేన కోట్లాది భారతీ యుల కలను సాకారం చేశాయి. 1983 విజయం భారత క్రికెట్‌ దశ, దిశను మార్చగా.. 2011 గెలుపు దేశంలో ఆటను మరో స్థాయికి తీసుకెళ్లింది. అనామక జట్టుతో కపిల్‌ కప్పును అందించగా.. గ్రామీణ నేపథ్యం నుంచి వచ్చిన ధోని దిగ్గజ ఆటగాళ్లను సమన్వయం చేసుకుంటూ ట్రోఫీ సాధించి పెట్టాడు. ఈసారి రోహిత్‌ పక్కా ప్రణాళికతో జట్టుకు మార్గనిర్దేశం చేస్తూ ఆఖరి అంకానికి తీసుకొచ్చాడు. ఈ మెట్టూ ఎక్కేస్తే కొత్త చరిత్రే. పూర్తి కథనం కోసం క్లిక్‌ చేయండి

18/11/2023 20:35(IST)

ప్లేయర్‌ ఆఫ్‌ ది టోర్నమెంట్‌ అవార్డు.. రేసులో నలుగురు భారత ఆటగాళ్లు

వన్డే ప్రపంచకప్‌ (ODI World cUP 2023) తుది దశకు చేరుకుంది. ఆదివారం అహ్మదాబాద్‌లో జరగనున్న ఫైనల్ మ్యాచ్‌తో టోర్నీ ముగియనుంది. టైటిల్ పోరులో భారత్, ఆస్ట్రేలియా (IND vs AUS) తలపడనున్నాయి. ఇరుజట్లూ బలంగా ఉండటంతో మ్యాచ్‌ రసవత్తరంగా సాగడం ఖాయంగా కనిపిస్తోంది. ఇదిలా ఉండగా.. ప్రతి ప్రపంచకప్‌లో ఒక ఆటగాడికి ప్లేయర్ ఆఫ్‌ ది టోర్నమెంట్ అవార్డు ఇస్తున్నారు. ఈ సారి ప్లేయర్ ఆఫ్‌ ది టోర్నమెంట్ అవార్డు రేసులో నిలిచిన ఆటగాళ్ల జాబితాను ఐసీసీ ప్రకటించింది. లిస్ట్‌లో మొత్తం తొమ్మిది ఆటగాళ్లు ఉండగా.. అందులో నలుగురు భారత ప్లేయర్లే కావడం విశేషం. రోహిత్‌ శర్మ, విరాట్ కోహ్లీ, మహ్మద్‌ షమి, జస్‌ప్రీత్‌ బుమ్రా ఈ అవార్డు రేసులో ఉన్నారు. ఆడమ్ జంపా (ఆస్ట్రేలియా), మ్యాక్స్‌వెల్ (ఆస్ట్రేలియా), రచిన్‌ రవీంద్ర (న్యూజిలాండ్), డారిల్ మిచెల్ (న్యూజిలాండ్), క్వింటన్ డికాక్ (సౌతాఫ్రికా) కూడా పోటీలో ఉన్నారు.

పూర్తి కథనం కోసం క్లిక్‌ చేయండి

18/11/2023 19:51(IST)

అహ్మదాబాద్‌.. కొట్టేనా జిందాబాద్‌

ముంబయిలోని వాంఖడే మైదానం.. ఈ పేరు వినగానే అక్కడ టీమ్‌ఇండియా (Team India) సాధించిన ఎన్నో ఘనతలు గుర్తుకొస్తాయి. ఎన్నో విజయాలు స్ఫూరిస్తాయి. తనకు సొంత మైదానమైన ఇక్కడ క్రికెట్‌ దిగ్గజం సచిన్‌ తెందుల్కర్‌ (Sachin Tendulkar) పరుగుల వరద పారించారు. రికార్డుల మోత మోగించారు. కానీ అదంతా 2011కు ముందువరకే. ఆ తర్వాత వాంఖడే అంటే.. ధోని సిక్సర్‌తో టీమ్‌ఇండియా ప్రపంచకప్‌ గెలిచిన క్షణం, విరాట్‌ భుజాలపై సచిన్‌ ఊరేగిన దృశ్యం, రెండోసారి భారత్‌ వన్డే విశ్వవిజేతగా నిలిచిన వేళ మనసులోని నుంచి పెళ్లుబికిన కన్నీళ్లు.. ఇవే గుర్తుకొస్తాయి. 2011లో వాంఖడేలో ఫైనల్లో శ్రీలంకపై గెలిచిన భారత్‌ రెండోసారి ప్రపంచకప్‌ను ముద్దాడింది. ఇప్పుడు మళ్లీ 12 ఏళ్ల తర్వాత 2023 ప్రపంచకప్‌లో టీమ్‌ఇండియా ఫైనల్‌ ఆడబోతోంది. ఇప్పుడు వేదిక అహ్మదాబాద్‌కు మారింది. మరి ప్రపంచలోని అతి పెద్దదైన నరేంద్ర మోదీ స్టేడియం (Narendra Modi Stadium) టీమ్‌ఇండియాకు మరుపురాని బహుమతినిస్తుందా? ఇక్కడ కప్పుకు భారత్‌ మూడోసారి ముద్దు పెడుతుందా?

పూర్తి కథనం కోసం క్లిక్‌ చేయండి

18/11/2023 19:35(IST)

ODI WC 2023: ఒక్క రోజుకు రూ.2 లక్షలు.. ప్రపంచకప్‌ వేళ గదుల ధరలు

అహ్మదాబాద్‌: వన్డే ప్రపంచకప్‌ ఫైనల్‌. అందులోనూ కప్‌ కోసం ఆస్ట్రేలియాతో భారత్‌ తలపడనుంది. దీంతో ఈ మ్యాచ్‌ను ప్రత్యక్షంగా వీక్షించి, జీవిత కాల అనుభూతిని పొందడం కోసం క్రికెట్‌ అభిమానులు సిద్ధమవుతున్నారు. ప్రపంచంలోని పెద్దదైన నరేంద్ర మోదీ క్రికెట్‌ స్టేడియంలో ఆదివారం ఈ మ్యాచ్‌ జరుగుతుంది. ఈ మ్యాచ్‌కు నెలకొన్న డిమాండ్‌ దృష్ట్యా అహ్మదాబాద్‌తో పాటు చుట్టుపక్కల నగరాల్లోని హోటల్‌ గదుల అద్దె ఆకాశాన్ని తాకుతోంది. అయిదు నక్షత్రాల హోటల్లో ఒక్క రాత్రి కోసం ఒక్కో గదికి అద్దె గరిష్ఠంగా రూ.2 లక్షలకు చేరింది. సాధారణ ధరలో లభ్యమయ్యే గదులకు కూడా ఇప్పుడు రూ.50 వేల నుంచి రూ.1.25 లక్షల వరకూ అద్దె వసూలు చేస్తున్నట్లు తెలిసింది. మామూలు రోజుల్లో ఒక్కో రాత్రికి రూ.3 వేల నుంచి రూ.4 వేలు వసూలు చేసే సాధారణ హోటళ్లు ఇప్పుడు ఈ అద్దెను రూ.20 వేలకు పెంచేశాయి. ‘‘అహ్మదాబాద్‌లోని అయిదు, మూడు నక్షత్రాల హోటళ్లలో కలిపి మొత్తం 5 వేల గదులే ఉన్నాయి. గుజరాత్‌ వ్యాప్తంగా 10 వేల గదులే ఉన్నాయి. కానీ నరేంద్ర మోదీ స్టేడియం సామర్థ్యం 1.20 లక్షలకు పైనే. 30 వేల నుంచి 40 వేల అభిమానులు బయట నుంచి వస్తారని అనుకుంటున్నాం’’ అని గుజరాత్‌ హోటల్‌, రెస్టారెంట్ల సంఘం అధ్యక్షుడు నరేంద్ర సోమాని తెలిపాడు.

18/11/2023 19:19(IST)

అమితాబ్‌.. దయచేసి ఫైనల్‌ చూడొద్దు!

ప్రపంచకప్‌ ఫైనల్లో ఆస్ట్రేలియాతో భారత్‌(India vs Australia) తలపడుతుంటే చూడాలని ఎవరికి ఉండదు. దేశంలోని ప్రముఖులతో పాటు సామాన్య ప్రజలు కూడా ఆదివారం తుదిపోరు కోసం ఎదురు చూస్తున్నారు. కానీ ఆ ఫైనల్‌ను చూడొద్దంటూ దిగ్గజ నటుడు అమితాబ్‌ బచ్చన్‌ను అభిమానులు కోరుతున్నారు. ఆయన వీక్షిస్తే భారత్‌ ఓడిపోయే ప్రమాదం ఉంటుందన్నది వారి నమ్మకం. సెమీస్‌లో కివీస్‌పై టీమ్‌ఇండియా విజయం తర్వాత.. ‘‘నేను చూడనప్పుడే మనం గెలుస్తాం’’ అని అమితాబ్‌(Amitabh Bachchan) ట్వీట్‌ చేశారు. ఇది ఇప్పుడు విస్తృతమైంది. దీంతో దయచేసి ఫైనల్‌ చూడొద్దంటూ ఆయన్ని అభిమానులు కోరుతున్నారు. జట్టు కోసం మరో త్యాగం చేయాలని చెబుతున్నారు. ఈ కామెంట్లపై స్పందించిన అమితాబ్‌.. ‘‘ఆ మ్యాచ్‌కు వెళ్లాలా? వద్దా? అని ఇప్పుడు ఆలోచిస్తున్నా’’ అని మరోసారి ఎక్స్‌లో పోస్టు చేశారు. టీమ్‌ఇండియా ఆడేటప్పుడు ఇలాంటి నమ్మకాలను అమితాబ్‌ పాటిస్తారని 2011లో ఆయన తనయుడు అభిషేక్‌ వెల్లడించారు.

IND vs AUS WC 2023: ప్లేయర్‌ ఆఫ్ ది టోర్నమెంట్‌గా కోహ్లీ

తాజా వార్తలు (Latest News)

ఏపీ నూతన డీజీపీ కోసం ముగ్గురు పేర్లతో ఈసీకి సిఫార్సు

పలు పాఠశాలలకు బెదిరింపులు..విదేశీ ఐపీ అడ్రెస్‌ నుంచి మెయిల్స్‌..!

ఈనాడు.నెట్‌లో టాప్‌ 10 వార్తలు @ 1 PM

సమంత ఫొటోపై చర్చ.. ఆగ్రహం వ్యక్తం చేస్తోన్న అభిమానులు

దిల్లీ మద్యం కేసు.. కవితకు మళ్లీ చుక్కెదురు

కుర్రాళ్లు ఇంకా నేర్చుకోవాలి.. ఒత్తిడిని తట్టుకోవాలి: కేఎల్ రాహుల్

సుఖీభవ

చదువు