World Cup: వరల్డ్‌ కప్‌ టికెట్లపై వ్యాపారవేత్త హర్ష గోయెంకా ఆసక్తికర వ్యాఖ్యలు!

దిల్లీ: దేశమంతా వరల్డ్‌ కప్‌ (World Cup 2023) మేనియా నడుస్తోంది. భారత్‌- ఆస్ట్రేలియా మధ్య జరగనున్న తుది పోరు కోసం యావత్‌ దేశం ఆసక్తిగా ఎదురుచూస్తోంది. ప్రత్యక్షంగా లక్షకుపైగా.. టీవీల ముందు కోట్లాది మంది వీక్షించేందుకు సిద్ధమయ్యారు. ఇలాంటి మ్యాచ్‌ టికెట్లకు ఎంత డిమాండ్‌ ఉంటుందో అందరికీ తెలిసిందే. ఈ తరుణంలో ప్రముఖ పారిశ్రామికవేత్త హర్ష గోయెంకా (Harsh Goenka) ‘ఎక్స్‌’లో చేసిన ఓ పోస్ట్‌ చర్చనీయాంశమైంది. ఓ వర్గం నుంచి విమర్శలూ ఎదురవుతున్నాయి.

సాధారణంగా ఇలాంటి మ్యాచ్‌లకు వివిధ రంగాలకు చెందిన ప్రముఖులను నిర్వాహకులే స్వయంగా ఆహ్వానిస్తుంటారు. వారికి ఉచితంగా పాస్‌లు అందజేస్తుంటారు. ఈ క్రమంలోనే పలువురు రాజకీయ, వ్యాపార, సినీ ప్రముఖులు పాస్‌లు పొందారు. దీనిపైనే తాజాగా గోయెంకా ఓ విమర్శనాత్మక పోస్ట్‌ చేశారు. వ్యాపారావేత్తల్లోని తమ స్నేహితులెవరూ టికెట్లు కొనలేదన్నారు. ఏదోలా ఉచిత పాస్‌లు పొందారని తెలిపారు. ఇక్కడే అసలు విషయం దాగుందని.. ధనవంతులే డబ్బులు చెల్లించడానికి ఇష్టపడరని ‘ఎక్స్‌’లో ఆయన పోస్ట్‌ చేశారు.

గోయెంకా పోస్ట్‌పై ఓ యూజర్‌ స్పందిస్తూ.. ‘‘అసలు మీరు టికెట్‌ కొని వెళ్తున్నారా? లేక పాస్‌ తీసుకున్నారా?’’ అని ఆరా తీశారు. దీనికి ఆయన ప్రతిస్పందిస్తూ.. రెండూ తీసుకోలేదని చెప్పారు. అయితే, కొన్ని వర్గాల నుంచి గోయెంకా పోస్ట్‌పై విమర్శలూ వస్తున్నాయి.

ఒక్క టికెట్ రూ.1.87 లక్షలు..

భారత్‌-ఆస్ట్రేలియా మధ్య జరగనున్న ఫైనల్‌ మ్యాచ్‌ ఒక్కో టికెట్‌ ధర దాదాపు రూ.రెండు లక్షల వరకు పలుకుతోంది. ఓ టికెట్‌ రీ-సెల్లింగ్‌ వెబ్‌సైట్‌ ప్రకారం.. టైర్ 4 టికెట్ ధర ఏకంగా రూ.1,87,407గా ఉంది. దీనికి పక్కనే ఉండే టైర్ టికెట్ ధర రూ.1,57,421గా ఉంది. ఈ వెబ్‌సైట్‌లో అతి తక్కువగా ఉన్న టికెట్ ధర రూ.32,000. ఈ ధరలను చూసి అభిమానులు షాక్‌ అవుతున్నారు.