ముగ్గురు మృతి

కోల్‌కతా: పశ్చిమ బెంగాల్‌లో దారుణం చోటు చేసుకుంది. తృణమూల్‌ కాంగ్రెస్‌ కార్యకర్త ఇంటిపై గుర్తు తెలియని దుండగులు శుక్రవారం అర్ధరాత్రి బాంబులు విసిరారు. ఈ దుర్ఘటనలో ముగ్గురు ప్రాణాలు కోల్పోయారు.వీరిలో సోహెల్‌ రాణా(19), కైరుద్దీన్‌ షేక్‌(55) టీఎంసీ కార్యకర్తలు. ముర్షిదాబాద్‌లోని డోమ్‌కోల్‌ పోలీస్‌ స్టేషన్‌ పరిథిలో చోటు చేసుకుందీ దారుణం. ఘటనా సమయంలో కాంగ్రెస్‌, తృణమూల్‌ కాంగ్రెస్‌ మధ్య గొడవలు కూడా జరిగాయి. ఈ ఘటనకు కాంగ్రెస్‌ నేతలే కారణమని కైరుద్దీన్‌ షేక్‌ కుమారుడు ఆరోపించారు. అర్ధరాత్రి సమయంలో అందరూ ఇంట్లో నిద్రిస్తుండగా తమ ఇంటి వద్ద శబ్దం వినిపించిందని బయటకి వచ్చి చూస్తే తన తండ్రి విగత జీవిగా కనిపించాడని మృతుడి కొడుకు పోలీసులకు తెలిపారు. సోహెల్‌ రాణా తండ్రి అల్తాఫ్‌ హుస్సేన్‌ను సైతం కొద్ది రోజుల ముందు ఇదే తరహాలో హతమార్చారని ఆయన ఆరోపించారు. అయితే ఘటన కారణంగా జరిగిన తోపులాటలో పలువురు తీవ్రంగా గాయ పడ్డారు. పోలీసులు కేసు నమోదు చేసుకుని దర్యాప్తు చేస్తున్నారు. దీనిపై మరిన్ని వివరాలు తెలియాల్సి ఉంది.