‘83’ చిత్ర బృందం కసరత్తులు

ముంబయి: ‘83’ సినిమా కోసం రణ్‌వీర్‌ సింగ్‌, మిగిలిన చిత్ర బృందం చెమట చిందించారు. 1983లో కపిల్‌దేవ్‌ సారథ్యంలో టీమిండియా ప్రపంచ కప్‌ ఎలా సాధించిందనే నేపథ్యంలో ‘83’ చిత్రం రాబోతోంది. ఇందులో కపిల్‌ దేవ్‌ పాత్రలో బాలీవుడ్‌ హీరో రణ్‌వీర్‌ సింగ్‌ నటిస్తున్నారు. కబీర్‌ ఖాన్‌ దర్శకుడు. రిలయన్స్‌ ఎంటర్‌టైన్‌మెంట్స్‌ సంస్థ నిర్మిస్తోంది. ప్రీతమ్‌ సంగీతం అందిస్తున్నారు. 2020 ఏప్రిల్‌ 10న ఈ సినిమాను విడుదల చేయడానికి సన్నాహాలు జరుగుతున్నాయి.

క్రికెట్‌లో శిక్షణ నిమిత్తం రణ్‌వీర్‌తో పాటు మిగిలిన నటీనటులు హిమాచల్‌ ప్రదేశ్‌లోని ధర్మశాలకు వెళ్లారు. అక్కడ రణ్‌వీర్‌కు కపిల్‌తోపాటు పలువురు క్రికెటర్లు మెళకువలు నేర్పించారు. ఈ సినిమా కోసం చేసిన కసరత్తులకు సంబంధించిన వీడియోను రణ్‌వీర్‌ ట్విటర్‌లో షేర్‌ చేశారు. అందరూ నటీనటులు ఎంతో శ్రమిస్తూ కనిపించారు. నటరాజ్‌ షాట్‌ను రణ్‌వీర్‌ పర్‌ఫెక్ట్‌గా చేశారు. ఈ చిత్రం విడుదల కోసం సినీ, క్రికెట్‌ అభిమానులు ఎంతో ఆసక్తిగా ఎదురుచూస్తున్నారు.