close

తాజా వార్తలు

చేస్తారా... క్రికెట్‌ సాగు?

క్రికెట్‌ ప్రొటీన్‌ న్యూట్రిబార్లు... క్రికెట్‌ కుకీస్‌... క్రికెట్‌ పాస్తా.. ఇలా అమెరికాలో ‘క్రికెట్‌ డైట్‌’ని  చాలా ఇష్టంగా తింటున్నారు. ఆ... క్రికెట్‌ మానియా నడుస్తుంది కదా. ఆ కోవకి చెందిందే ఈ డైట్‌ అనుకుంటున్నారేమో. కాదండోయ్‌. ఇక్కడ క్రికెట్‌ అంటే.. కీచురాళ్లు లేదా మిడతల జాతికి  చెందిన కీటకాలని అర్థం. వాటితో చేసిన ఆహారమే పైవన్నీ. పెరుగుతున్న జనాభాని, తగ్గుతున్న నీటి వనరులని దృష్టిలో పెట్టుకుని ప్రపంచ ఆహార అవసరాలని తీర్చడానికి వివిధ దేశాలు ‘ఇన్‌సెక్ట్‌ ఫార్మింగ్‌’ లేదా ‘కీటకసాగు’ని మొదలుపెట్టాయి. రానున్న కాలంలో జంతువులు, మనుషుల్లో తలెత్తబోయే ప్రొటీన్‌ లోపాలని తగ్గించడానికీ, నీటిని సద్వినియోగం చేసుకోవడానికి కీటకాల సాగే ప్రధాన మార్గంగా మారుతుందట...

ఆదివారం వస్తే చాలు చలో చికెన్‌ సెంటర్‌... ఇంకా మనసు పడితే మటన్‌ దుకాణం! మరికొందరయితే వారంలో ఏడు రోజులూ చేప, మాంసం తిన్నా సంతృప్తి చెందరు. సరే... ఎవరిష్టం వాళ్లదిలే అనుకుందాం అంటే ఓ సమస్యొచ్చింది. ఏమిటా సమస్య? మనం ఇంతగా ఇష్టపడి లొట్టలేసుకుని తినే మాంసాహారానికీ, ప్రస్తుతం మనం ఎదుర్కొంటున్న నీటి కటకటకి ఉన్న సంబంధమే ఆ సమస్య. మేకలు, కోళ్లు, గొర్రెలు.. ఇలా మాంసాన్నిచ్చే ఇతర జీవుల పెంపకానికయ్యే నీటి వినియోగం భారీగా పెరుగుతోంది. అలాగని శాకాహారానికి మారిపోదాం అనుకుంటున్నారేమో! పంటల సాగుకయ్యే నీటి వినియోగం కూడా తక్కువేం కాదు. పర్యావరణ మార్పుల కారణంగా... పంటల దిగుబడితోపాటు, నాణ్యతా దెబ్బతింటోంది. దీంతో 2050 నాటికి మనుషులే కాదు, ఇతర జీవజాతి కూడా తీవ్రమైన ప్రొటీన్‌ లోపాలని ఎదుర్కొంటుందని అధ్యయనాలు చెబుతున్నాయి. మరి దీనికి ప్రత్యామ్నాయం?‘ఇన్‌సెక్ట్‌ ఫార్మింగ్‌’ లేదా అచ్చ తెలుగులో క్రిమికీటకాల సాగేనంటున్నారు నిపుణులు.

21 వ శతాబ్దపు ఆహారం ఇదేనా? 

వర్షాకాలం మొదలైన తర్వాత... తమిళనాడులో ‘ఈసులు’ లేదా ‘ఈసల్‌ ఫ్రై’ అనే ప్రత్యేకమైన వంటకానికి ఎక్కడలేని డిమాండ్‌ ఉంటుంది. కరివేపాకు, ఎండుమిర్చి వేసి కరకరలాడేలా చేసే ఈ వంటకాన్ని దేంతో చేస్తారో తెలుసా? వర్షం పడినప్పుడు దీపం చుట్టూ ముసురుకునే రెక్కల పురుగులు తెలుసుగా! వాటితోనే. మన దగ్గర కూడా ఉసుళ్లని మరమరాల్లా వేయిస్తారు. అంతెందుకు.. ఉత్తరాదిన కొన్ని ప్రాంతాల్లో ఎర్రచీమల పచ్చడిని చాలా ఇష్టంగా తింటారు. ఇక ఈశాన్య రాష్ట్రాల గురించి చెప్పడానికేముంది. పురుగు, పుట్ర దేన్నీ వదలరు. 

యమ్మీ...యమ్మీగా వండుకుని తినేస్తారు. మెక్సికో, ఆఫ్రికా, అమెరికా అని తేడా లేకుండా కీటకాలతో రుచికరమైన వంటకాలు చేసుకునే సంప్రదాయం అన్నిచోట్లా ఉంది. అయితే పప్పుధాన్యాలు, కోళ్లు, మేకలు... ఇతరత్రా జంతుజాతిని తినేవారితో పోలిస్తే వీరిది చాలా తక్కువ శాతం. భవిష్యత్తులో ప్రపంచ జనాభా 900 కోట్లకు చేరుకుంటే అంతమందికి ఆహారాన్ని సమకూర్చడానికి ఇప్పుడున్న ఆహార వనరులు మనకు సరిపోవు. మనకే కాదు జంతువులకూ తిండి కరవవుతుంది. ఇలాంటి సమయంలో మనకంటే కొన్నివేల రెట్లు అధికంగా ఉండే కీటకాల నుంచి ‘అగ్రి ప్రొటీన్‌’ తయారుచేసి ఆహారంగా వినియోగించాలని అమెరికా, బ్రిటన్‌, యూరప్‌ దేశాలు భావిస్తున్నాయి.

పర్యావరణాన్ని కాపాడేందుకే...

పప్పుధాన్యాలు, సంప్రదాయక మాంసంలోకన్నా ఈ కీటకాల నుంచి అందే ప్రొటీన్లు చాలా ఎక్కువ. ఒక కిలో మాంసం మన చేతికి రావడానికి సగటున 15,000 లీటర్ల నీళ్లు ఖర్చవుతాయి. అదే కీటకాలు తమ జీవితకాలంలో ఎనిమిది లీటర్ల కంటే ఎక్కువ నీటిని వినియోగించవు. ఒక కిలో సంప్రదాయక మాంసం తయారుచేయడానికి అయ్యే సమయం, ఖర్చు కూడా చాలా ఎక్కువ. అదే.. కీటకాలయితే తమ సంతతిని చాలా వేగంగా వృద్ధి చెందిస్తాయి. ఒక మిడత మూడు వారాల్లో పెరిగి పెద్దయి 1500 గుడ్లు పెడితే... ఒక పశువు పెరగడానికి రెండేళ్లకు పైగా సమయం తీసుకుంటుంది. కీటకాలతో పోలిస్తే నిర్వహణ వ్యయం   12 రెట్లు అధికంగా ఉంటుంది. జంతువుల నుంచి వ్యాపించే హెచ్‌1ఎన్‌1, మ్యాడ్‌కౌ వంటి వ్యాధులు వ్యాపించడానికి ఆస్కారం లేదు. అంతకుమించి పశువుల నుంచి వెలువడే మీథేన్‌ వంటి హరిత వాయువులను పెద్దఎత్తున నియంత్రించగలుగుతాం. వీటిపెంపకం కోసం వ్యవసాయ భూముల్లో కేటాయిస్తున్న భూములశాతం తగ్గుతుంది.

సాగు సాగేదిలా....

మిడతలు, కీచురాళ్లు, మీల్‌వార్మ్స్‌తో పాటు పెంకుపురుగు, బ్లాక్‌ సోల్జర్‌ ఫ్లై వంటి తినదగ్గ కీటకాలని ఫారమ్‌లలో పెంచుతారు. తేనెటీగలు, పట్టు పురుగుల పెంపకం మాదిరిగానే ఈ సాగూ ఉంటుంది. కీటకాల రకాలని బట్టి లార్వా, ప్యూపా, అభివృద్ధి చెందిన దశల్లో ఉన్న వాటిని వేరుచేసి వివిధ అవసరాలకు తగ్గట్టుగా గ్రేడింగ్‌ చేస్తారు. డ్రైయింగ్‌ పద్ధతిలో వీటిల్లోని తేమని తొలగించి ఎక్కువ కాలం నిల్వ ఉండేట్టు చేస్తున్నారు. పారిస్‌లోని ఎన్‌సెక్ట్‌ సంస్థ ఈ సాగుని పెద్దఎత్తునే చేస్తోంది. ఈ పద్ధతిలో నెలకి 30 టన్నుల ప్రొటీన్‌ని ఉత్పత్తి చేస్తోంది. అన్నట్టు ఇవి తీసుకునే ఆహారం కూడా ఖరీదైనదేం కాదు. మిగిలిపోయిన ఆహారాన్నే వీటికి అందిస్తారు. ఈ కీటకాల విసర్జితాలని సైతం ఎరువులుగా  వాడుతున్నారు. అగ్రిప్రొటీన్‌గా వ్యవహరించే ఈ ఆహారాన్ని చెట్లకి, చేపలకి, జంతువులకి ప్రధాన ఆహారంగా మారుస్తున్నారు. ప్రస్తుతం చేపల పెంపకం దార్లు ఈ ఉత్పత్తులని ఎక్కువగా కొనుగోలు చేస్తున్నారు.

ఏ పోషకాలుంటాయి?

ఇన్‌స్టెక్‌ డైట్‌... ప్రొటీన్లని పెద్దమొత్తంలో అందించే ఆహారం ఇది. ప్రొటీన్లతోపాటు జీర్ణవ్యవస్థకు మేలుచేసే ప్రొబయోటిక్‌, సూక్ష్మపోషకాలు పుష్కలంగా ఉంటాయి. వ్యాధినిరోధకశక్తిని పెంచే బి12, రైబోఫ్లావిన్‌, విటమిన్‌ ఎ వంటివి వీటి నుంచి అందుతాయి. ఖనిజాలు, లవణాలతోపాటు పీచు పుష్కలంగా ఉంటుంది.

చేపల దాణాగా...

వివిధ ఆహార అవసరాల కోసం ఇలా పురుగులని పెంచడం చట్ట సమ్మతమేనా? రెండేళ్ల క్రితమే ఈయూ కమిషన్‌ ఈ రకమైన ఆహారాన్ని చేపలకు దాణాగా వేయడానికి అనుమతించింది. చెఫ్‌లు తమ సృజనాత్మక వంటకాల్లో వీటిని ఉపయోగించుకోవచ్చు కూడా.

Tags :

రాజకీయం

జనరల్‌

సినిమా

క్రైమ్

స్పోర్ట్స్

బిజినెస్‌

జాతీయ-అంతర్జాతీయ

జిల్లా వార్తలు
ఛాంపియన్

దేవతార్చన

+

© 1999- 2019 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact : 9000180611, 040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.