తాత కోట నుంచే ఉదయనిధి స్టాలిన్‌ పోటీ

తాజా వార్తలు

Updated : 12/03/2021 15:44 IST

తాత కోట నుంచే ఉదయనిధి స్టాలిన్‌ పోటీ

అభ్యర్థుల జాబితాను విడుదల చేసిన డీఎంకే

చెన్నై: రాజకీయాల్లో మరో వారసుడు ప్రత్యక్ష ఎన్నికల పోరులోకి అడుగుపెడుతున్నారు. డీఎంకే అధినేత ఎంకే స్టాలిన్‌ కుమారుడు ఉదయనిధి తొలిసారిగా ఎన్నికల్లో పోటీ చేస్తున్నారు. ఒకప్పుడు తాత కరుణానిధి ప్రాతినిధ్యం వహించిన చెపాక్‌ నియోజకవర్గం నుంచి ఎన్నికల్లో తన అదృష్టాన్ని పరీక్షించుకోనున్నారు. ఇక స్టాలిన్‌ ఎప్పటిలాగే కొలతూరు స్థానం నుంచి బరిలోకి దిగుతున్నారు.

శాసనసభ ఎన్నికల్లో పోటీ చేసే డీఎంకే అభ్యర్థులను స్టాలిన్‌ శుక్రవారం ప్రకటించారు. ఈ మేరకు 173 మందితో జాబితా విడుదల చేశారు. దురై మురుగన్‌, కేఎన్‌ నెహ్రూ, ఎంఆర్‌కే పన్నీర్‌సెల్వం లాంటి సీనియర్‌ నేతలతో పాటు చాలా మంది సిట్టింగ్‌ ఎమ్మెల్యేలకు డీఎంకే మరోసారి అవకాశమిచ్చింది. బొడినాయకనూర్‌లో ఉపముఖ్యమంత్రి పన్నీర్‌ సెల్వంకు పోటీగా తంగా తమిళ్‌సెల్వన్‌ను డీఎంకే నిలబెట్టింది. ఈ సందర్భంగా స్టాలిన్‌ మాట్లాడుతూ.. మార్చి 15న నామినేషన్‌ వేయనున్నట్లు తెలిపారు. ఆ తర్వాత రాష్ట్రవ్యాప్తంగా విస్తృత ప్రచారం చేస్తానన్నారు. ప్రతి అభ్యర్థి కరుణానిధి అని భావించి కార్యకర్తలు పనిచేయాలని పిలుపునిచ్చారు.

ఇదే అరంగేట్రం..

తమిళనాడు మాజీ ముఖ్యమంత్రి, డీఎంకే అగ్రనేత కరుణానిధి మనవడు అయిన ఉదయనిధి.. మూడేళ్ల కిందటే రాజకీయాల్లోకి అడుగుపెట్టారు. ప్రస్తుతం ఆయన డీఎంకే యూత్‌ వింగ్‌ సెక్రటరీగా ఉన్నారు. కానీ ప్రత్యక్ష ఎన్నికల్లో పోటీ చేయడం ఇదే తొలిసారి. అయితే అరంగేట్రంలోనే కీలక చెపాక్‌-ట్రిప్లికకేన్‌ నియోజకవర్గం నుంచి బరిలోకి దిగుతుండటం విశేషం. ఈ నియోజకవర్గం డీఎంకేకు కంచుకోటగా ఉంది. గతంలో కరుణానిధి ఈ స్థానం నుంచి మూడు సార్లు పోటీ చేసి విజయం సాధించారు.

1996, 2001, 2006లో వరుసగా మూడు సార్లు చెపాక్‌ నుంచి కరుణానిధి అసెంబ్లీకి వెళ్లారు. ఇందులో రెండుసార్లు ఆయన ముఖ్యమంత్రి అయ్యారు. దీంతో ఈ స్థానాన్ని కరుణానిధి కుటుంబం అదృష్టంగా భావిస్తుంది. అయితే 2008లో చెపాక్‌, ట్రిప్లికేన్‌ ప్రాంతాలను విలీనం చేశారు. ఆ తర్వాత 2011, 2016లో జరిగిన అసెంబ్లీ ఎన్నికల్లోనూ డీఎంకే ఇక్కడ జయకేతనం ఎగరవేసింది.

ప్రత్యర్థి ఎవరో..

ఉదయనిధిగా పోటీగా అన్నాడీఎంకే కూటమి తరఫున చెపాక్‌లో బరిలోకి దిగేది ఎవరో ఇంకా తెలియరాలేదు. తొలుత ఈ స్థానం నుంచి భాజపా తరఫున నటి ఖుష్బూ ఇక్కడ పోటీ చేస్తారనే వార్తలు వచ్చాయి. అయితే కూటమిలో భాగంగా ఈ నియోజకవర్గాన్ని భాజపాకు కాకుండా పీఎంకేకు కేటాయించింది అన్నాడీఎంకే. ఏదేమైనా రానున్న ఎన్నికల్లో చెపాక్‌ పోరు ఆసక్తికరంగా మారనుంది.

తమిళనాడులో 2011 నుంచి అధికారానికి దూరంగా ఉంటోన్న డీఎంకే.. వచ్చే ఎన్నికల్లో ఎలాగైనా విజయం సాధించాలని పట్టుదలగా ఉంది. కాంగ్రెస్‌, వాపక్షాలు, ఎండీఎంకే, వీసీకే వంటి పార్టీలతో పొత్తు పెట్టుకుని గట్టిగా ప్రచారం చేస్తోంది. రాష్ట్రంలో మొత్తం 234 అసెంబ్లీ స్థానాలుండగా.. సీట్ల సర్దుబాటులో భాగంగా డీఎంకే 173 స్థానాల్లో బరిలోకి దిగుతోంది. మిగతా 61 స్థానాలను మిత్రపక్షాలకు కేటాయించింది.



Advertisement

Tags :

మరిన్ని

జిల్లా వార్తలు
బిజినెస్
మరిన్ని
సినిమా
మరిన్ని
క్రైమ్
మరిన్ని
క్రీడలు
మరిన్ని
జనరల్
మరిన్ని
జాతీయ- అంతర్జాతీయ
మరిన్ని