పర్యావరన్‌!

జరభద్రం

పర్యావరన్‌!

పర్యావరణం అంటే మమకారమే... కానీ బండి నడుపుతూ కాలుష్యం పెంచుతున్నామనే బాధ! తనవంతుగా భూతాపం తగ్గించాలనే తాపత్రయమే... అయినా ఎలా ముందుకెళ్లాలో తెలియని సంశయం!! ప్రకృతి ప్రేమికుల వెతలు చెప్పనలవి కాదు... వీళ్లేకాదు.. ఇతర వాహనదారులు ఎవరైనా చిన్నచిన్న జాగ్రత్తలు పాటిస్తే చాలు.. ఎంచక్కా కారు లేదా బైక్‌ని ఎకోఫ్రెండ్లీగా మార్చేయొచ్ఛు.. పనిలో పనిగా డబ్బూ ఆదా చేసుకోవచ్చు.

రోజువారీ అవసరాలు, లాంగ్‌టూర్లు, జాలీ రైడింగ్‌లు.. ఏదైతేనేం.. బండితో అవసరం లేనివారు ఎవరుంటారు చెప్పండి? ఈ ప్రయాణం కోసం మన వాహనాలు పెట్రోల్‌, డీజిల్‌లను తెగ తాగేస్తుంటాయి. ఆపై వాతావరణంలోకి కాలుష్యాన్ని వెదజల్లుతుంటాయి. ఇది మన జేబుల్ని గుల్ల చేయడమే కాదు.. మనుషులకు, పర్యావరణానికీ హానికరమే. అప్పుడు మనమేం చేయాలి? వాహన వినియోగం ఎలాగూ తప్పనప్పుడు చిట్టిపొట్టి చిట్కాలు పాటిస్తూ ఉన్నంతలో పర్యావరణహితంగా మెలగాలి. అదెలాగో చూద్దాం.

నీటికీ ఓ లెక్కుంది

కారు, బైక్‌లను బయటి గ్యారేజీల్లో వాషింగ్‌కి ఇవ్వడం కన్నా ఇంట్లో కడిగితే నీటిని పొదుపు చేయవచ్చని చాలామంది అనుకుంటారు. ఇది అపోహే. నిజానికి ఇంట్లో మనం నీటి పంపులతో వాహనాన్ని కడిగినప్పుడు నీరు ఎక్కువగా వృథా అవుతుంటుంది. ఇలా చేయడం విలువైన నీటిని నిర్లక్ష్యంగా వాడుతూ పర్యావరణానికి హాని కలిగించడమే. దీనికి బదులు ఒక బకెట్‌ నీరు తీసుకొని ఒక స్పాంజీని అందులో ముంచి తుడవాలి. అది కుదరకపోతే ప్రొఫెషనల్స్‌కి ఇవ్వడమే మంచిది.

గాలి మాటలొద్దు

చాలామంది టైర్లలో గాలి తగినంత పరిమాణంలో ఉండేలా చూసుకోరు. అసలు ఇది పెద్ద విషయం అన్నట్టుగానే పరిగణించరు. పైగా గాలి చెక్‌ చేయడం పెద్ద భారంగా భావిస్తారు. టైర్లలో గాలి ఏమాత్రం ఎక్కువైనా, తక్కువైనా మైలేజీపై తీవ్ర ప్రభావం చూపిస్తుంది. టైర్‌ ప్రెషర్‌ బాగా లేకపోతే మైలేజీపై దాదాపు 30శాతం వరకు ప్రభావం పడుతుంది. ముఖ్యంగా టైరులో 1 పీఎస్‌ఐ తగ్గినా 0.2 శాతం మైలేజీ తగ్గుతుంది. ఇంధన వాడకం తగ్గితే సహజంగానే పర్యావరణానికి మేలు చేసినవాళ్లం అవుతాం.

బ్యాటరీ బాటలో..

పర్యావరణంపై పూర్తి మమకారం చాటుకోవాలి అనుకుంటే నేరుగా బ్యాటరీ బైక్‌, కారుకే ఓటేయొచ్ఛు వీటి ధర కాస్త ఎక్కువైనా ఇంధనం ఖర్చు దాదాపు సగమే. మరమ్మతులు, నిర్వహణ ఖర్చులు సైతం సంప్రదాయ పెట్రోల్‌, డీజిల్‌ ఇంధనాలతో పోల్చితే 20శాతం వరకు తక్కువ. దీంతోపాటు ప్రభుత్వం నుంచి మంచి ప్రోత్సాహకాలు అందుతాయి. సీఎన్‌జీ, బయోడీజిల్‌లాంటి పర్యావరణహిత ఇంధనాలతో నడిచే హైబ్రిడ్‌ వాహనాలు సైతం అందుబాటులో ఉన్నాయి.

ఏసీ తగ్గిద్దాం

ప్రస్తుతం ఏసీ లేని కార్లు లేవు. కారు వాడేవాళ్లలో ఎక్కువమంది అవసరం ఉన్నా, లేకపోయినా వీటికి అలవాటు పడిపోతున్నారు. కానీ అధిక ఏసీ వాడకం వల్ల పర్యావరణానికి, మనకూ రెండువిధాలా నష్టం అంటున్నారు హ్యుందాయ్‌ సర్వీస్‌ మేనేజర్‌ శ్రీనివాస్‌. ఏసీ ఆన్‌ చేసినప్పుడు ఆటోమేటిగ్గా కారు ఇంజిన్‌ సామర్థ్యం తగ్గిపోయి అది మైలేజీపై ప్రభావం చూపిస్తుంది అంటారాయన. దీంతోపాటు ఏసీ నుంచి వెలువడే వేడి వాయువులు పర్యావరణానికి తీవ్రమైన చేటు చేస్తాయి. ఏసీ వాడినప్పటికన్నా అద్దాలు కిందికి దించినప్పుడు ఇంధనం సమర్థంగా వినియోగం అవుతుందని తాజా అధ్యయనంలో తేలింది. సాధారణంగా ముప్ఫై డిగ్రీల సెల్సియస్‌ ఉష్ణోగ్రత వరకు ఏసీల వాడకం పెద్దగా అవసరం ఉండదు. అద్దాలు కిందికి దించుకుంటూ చల్లదనాన్ని ఎంజాయ్‌ చేయవచ్చు.

ఈ దారిలో సైతం..

* మైలేజీ పెంచే ఎనర్జీ కన్జర్వింగ్‌ ఆయిళ్లు వాడటం మేలు ● ఇంజిన్‌ ట్యూనింగ్‌ సరిగా లేకపోయినా ఇంధన వినియోగం అధికమవుతుంది. సరిచేయించాలి.

* వాహనానికి అదనంగా స్పాయిలర్లు అమర్చి, ఇతర మాడిఫికేషన్లు చేయించి వాహనం ఆకారాన్ని మార్చొద్ధు

* లేత రంగు వాహనాలే వేడిని వికేంద్రీకరిస్తాయి.

* ఎయిర్‌ ఫిల్టర్లలో దుమ్ము, వ్యర్థాలు పేరుకుపోయినప్పుడు ఇంజిన్‌పై భారం పడుతుంది. వీటిని ఎప్పటికప్పుడు బాగు చేయించాలి ● గంటకి వంద కిలోమీటర్లు వేగం దాటిన తర్వాత పెరిగే ప్రతి పది కిలోమీటర్ల వేగానికి పదిశాతం చొప్పున మైలేజీ పడిపోతుందంటారు నిపుణులు.

* మైలేజీ పెంచే సింథటిక్‌ రబ్బరుతో తయారు చేసిన ఎకోఫ్రెండ్లీ టైర్లు అందుబాటులో ఉన్నాయి.● కాలుష్య ఉద్గారాలను తగ్గించాలని గట్టిగా అనుకుంటే కార్‌ పూలింగ్‌కి ఓటేయండి.