విడివిడిగానా.. కలిసి తీసుకోవాలా?

బీమా బ్యాంకింగ్

విడివిడిగానా.. కలిసి తీసుకోవాలా?

ఆరోగ్య అత్యవసర పరిస్థితి ఎదురైనప్పుడు.. ఆర్థిక భారం పడకుండా ఆదుకునేది ఆరోగ్య బీమా. ఈ పాలసీలపై ఇటీవల కాలంలో అవగాహన బాగా పెరిగింది. ప్రతి ఒక్కరూ తమకంటూ ఒక వైద్య బీమా పాలసీ ఉండాలని జాగ్రత్తపడుతున్నారు. ఇప్పుడు చాలా బీమా సంస్థలు.. కుటుంబం అంతటికీ వర్తించే ఫ్లోటర్‌ పాలసీలతోపాటు... ఒక్కో కుటుంబ సభ్యుడికి విడివిడిగా పాలసీ తీసుకునే వెసులుబాటూ కల్పిస్తున్నాయి. మరి వీటిలో ఏది ఎంచుకుంటే మేలు.. తెలుసుకుందాం.

వైద్య బీమా పాలసీ.. నిబంధనలను బట్టి వాస్తవంగా అయిన ఆసుపత్రి ఖర్చులను చెల్లిస్తుంది. ఇందులో వ్యక్తిగతంగా పాలసీ తీసుకున్నా.. కుటుంబం అంతటికీ వర్తించేలా పాలసీ తీసుకున్నా ఈ పద్ధతి మారదు. ఇక్కడ గమనించాల్సింది.. ఏ రకం తీసుకుంటే.. ఎక్కువ లాభం అని. ఈ రెండింటిలో ఏది ఎంచుకోవాలన్న విషయంలో ఎప్పుడూ ఇబ్బందే. ఎందుకంటే.. ఇందులో దేనికి ఉండే లాభాలు దానికి ఉంటాయి.. అదే విధంగా నష్టాలూ కనిపిస్తాయి. కానీ.. వ్యక్తుల ఆదాయం, ప్రీమియం చెల్లించే సామర్థ్యం, ఆర్థిక లక్ష్యాలు, కుటుంబంలోని సభ్యుల సంఖ్య, చేస్తున్న ఉద్యోగం ఆధారంగా ఏ పాలసీ తీసుకోవాలన్నది ఆధారపడి ఉంటుంది.

కుటుంబ సభ్యులందరికీ.. విడివిడిగా పాలసీ తీసుకున్నప్పుడు.. ప్రతి వ్యక్తికీ ఆయా పాలసీ విలువ మేరకు బీమా రక్షణ ఉంటుంది. కుటుంబంలోని వ్యక్తులందరి పేర్ల మీదా ఈ పాలసీ తీసుకుంటాం కాబట్టి, ఎవరికి వారిది వ్యక్తిగత పాలసీ కిందకే వస్తుంది. ఇలా ఒకే కుటుంబంలోని వ్యక్తులు వేర్వేరు పాలసీలు తీసుకున్నప్పుడు.. బీమా కంపెనీలు కొంత శాతం రాయితీని కూడా ఇస్తున్నాయి. ఒక్కో పాలసీదారుడు ఓపీడీ సేవలతోపాటు, నో క్లెయిం బోనస్‌ కూడా పొందేందుకు అవకాశం ఉంటుంది. ఇక ప్రీమియం విషయానికి వస్తే.. ఇద్దరు వ్యక్తులు చెరో రూ.5లక్షల పాలసీ తీసుకున్నప్పుడు.. ఫ్యామిలీ ఫ్లోటర్‌ పాలసీ రూ.10లక్షల పాలసీకన్నా తక్కువ ప్రీమియం ఉంటుంది.

ఫ్యామిలీ ఫ్లోటర్‌ పాలసీని తీసుకుంటే.. ఒకే పాలసీలో కుటుంబంలోని అందరికీ రక్షణ లభిస్తుంది. ఈ పాలసీ విలువ మొత్తాన్ని కుటుంబంలోని ఏ సభ్యుడైనా వాడుకునేందుకు వీలుంటుంది. దంపతులిద్దరు, పిల్లలు, తల్లిదండ్రులందరినీ ఒకే పాలసీ గొడుగు కిందకు తీసుకురావచ్చు. ఉదాహరణకు మీరు రూ.10లక్షల పాలసీ తీసుకున్నారనుకుందాం.. అప్పుడు ఆ ఫ్యామిలీ ఫ్లోటర్‌ పాలసీలో ఉన్న ఎవరైనా సరే.. రూ.10లక్షల వరకూ వినియోగించుకోవచ్చు. ఒక బృందంగా పాలసీ ఉంటుంది. ఒకరికి మించి సభ్యులు ఉన్నప్పుడు ఫ్యామిలీ ఫ్లోటర్‌ పాలసీనే కాస్త ఎక్కువ ప్రయోజనం కలిగిస్తుందని చెప్పొచ్చు.

నలుగురు కుటుంబ సభ్యులు ఉన్న కుటుంబానికి రూ.10లక్షలకు బీమా పాలసీ తీసుకున్నారనుకుందాం. ఒక వ్యక్తికి అనారోగ్యం వచ్చి, ఆసుపత్రిలో చేరి రూ.5లక్షలు ఖర్చయిందనుకుందాం.. అప్పుడు మిగతా సభ్యులకు రూ.5లక్షల వరకే రక్షణ ఉంటుంది. దీన్నే మళ్లీ పాలసీ పునరుద్ధరించేదాకా వాడుకోవాల్సి వస్తుంది. ఫ్యామిలీ ఫ్లోటర్‌ పాలసీకి చెల్లించే ప్రీమియాన్ని కుటుంబంలో వయసులో పెద్దవారిని దృష్టిలో పెట్టుకొని నిర్ణయిస్తారు. దీనివల్ల పిల్లలకు వర్తించే ప్రీమియమూ తల్లిదండ్రుల వయసును బట్టే ఆధారపడి ఉంటుంది.

కుటుంబంలో చిన్న పిల్లలు ఉన్నప్పుడు.. ఒకే పాలసీలో వ్యక్తిగతంగా వేర్వేరుగా తీసుకోవడమే ఉత్తమం. అత్యంత అరుదుగా కుటుంబంలోని సభ్యులందరూ ఏదైనా అనారోగ్యం బారినపడితే.. అప్పుడు వ్యక్తిగత పాలసీలే అధిక రక్షణ కలిగిస్తాయని చెప్పొచ్చు.

- అమిత్‌ ఛబ్రా
హెడ్‌, హెల్త్‌ ఇన్సూరెన్స్‌, Policybazaar.com

Tags :

మరిన్ని

జిల్లా వార్తలు

వారెవ్వా! చదువు సుఖీభవ ఈ-నాడు మకరందం రయ్.. రయ్ సిరి విజేత ఈ తరం హాయ్! ఆహా హాయ్ బుజ్జీ స్థిరాస్తి రుచులు విహారి