వీధి పోటు అటుఇటు!

ఈనాడు, హైదరాబాద్‌

ఇంటికి వీధి పోటు ఎంత చేటు? కొన్ని దిక్కులలో ఉంటే మేలు జరుగుతుందా? మంచైనా, చెడైనా ఆ ప్రభావం ఏ మేరకు ఉంటుంది? వాస్తు శాస్త్రం ఏం చెబుతుంది? వివరిస్తున్నారు వాస్తు నిపుణులు కృష్ణాదిశేషు పెంటపాటి.
కొన్ని దిక్కులలో వీధి పోటున్న ఇళ్లలో ఉంటున్నవారికి అపరిమితంగా మేలు జరుగుతుందని.. అందులో ఉత్తర ఈశాన్యంగానీ, తూర్పు ఈశాన్యంలో వీధి పోటున్న ఇళ్లు.. పడమర వాయువ్యం, దక్షిణ ఆగ్నేయం దిశలలో వీధి పోటున్న ఇళ్లవారికి అపరిమిత సుఖ సంతోషాలు, సిరి సంపదలు కలుగుతాయనే విశ్వాసాలు సమాజంలో ఉన్నాయి. పడమర నైరుతి, దక్షిణ నైరుతి మూలల్లో వీధి పోటున్న ఇళ్లలో ఉంటున్నవారికి అనేక ఇబ్బందులు, అకాల మరణాలు సంభవిస్తాయనే అపోహలు, నమ్మకాలు ఉన్నాయి. వీధి పోటున్న ఇళ్ల ముందు ప్రహరికి బయటివైపు చిన్నగుడి, దేవుని బొమ్మలు పెట్టడంతో దోషం పోతుందని, ఇదొక నివారణ మార్గమని విశ్వసిస్తుంటారు. వీధి పోటున్న ఇంటికి మంచి, చెడు ఎలా ఉన్నా.. పరుల దృష్టితో కొంత కీడు కలిగే ప్రమాదం ఉంటుందని మరికొందరి బలమైన నమ్మకం.

ప్రభావం ఎలా ఉంటుంది?
మన ఇంటి ముందున్న వీది కంటే ఎదురుగా ఉన్న వీధి వెడల్పు ఎక్కువగా ఉన్నా.. దూరం పోతున్నా వీధి పోటు ప్రభావం ఎక్కువగా ఉంటుంది. ఆయా వీధుల నుంచి ప్రయాణించే వాహనాలు, తిరిగే జనాలు ఎక్కువగా ఉంటారు. ఎదురు వీధి చిన్నగా ఉన్నా.. దూరం తక్కువగా ఉన్నా ప్రభావం వేరుగా ఉంటుంది. వీధి పోటుతో ప్రాణ నష్టం, ఆస్తి నష్టం, ఇతరత్రా కష్టనష్టాలు కచ్చితంగా ఇంత జరుగుతుందని చెప్పలేం. జనం రాకపోకలు, వాహనాల రద్దీ, ప్రయాణించే వేగం నియంత్రణలపై ఆధారపడి ఉంటుంది.

వాటితో ప్రయోజనం ఉందా?
వీధి పోటున్న ఇంటి ముందు విగ్రహం, దేవుళ్ల బొమ్మల ఏర్పాటు కచ్చితంగా ప్రయోజనం చేకూరుస్తుంది. ముఖ్యంగా వాహనదారులు ప్రయాణించేటప్పుడు అక్కడున్న పరిస్థితులు, రద్దీకి అనుగుణంగా మలుపు తిప్పే తొందరలో వేగం పెంచడం, తగ్గించడం చేస్తుంటారు. నియంత్రణ లోపిస్తే ప్రమాదం జరిగే అవకాశం ఉంది. ఎదురుగా ఇంటి ముందున్న విగ్రహంపై దృష్టి పడినప్పుడు జాగ్రత్తతోపాటూ తనను తాను తెలియకుండానే నియంత్రించుకునే అవకాశం ఉంది. ఈ క్రమంలో తొందరలో ఎదురింటిలోకి చొచ్చుకుపోయే ప్రమాదం ఉంది. కొందరి దృష్టి హానికరంగా ఉంటుంది. వారి చూపు, మాట నష్టపరిచేదిగా ఉంటుంది. వారు ఆ ఇంటి గురించి, ఇంట్లోవారి గురించి చెడుగా ఆలోచన చేసే ప్రమాదం ఉంది. ఇంటి ముందు గోడకు విగ్రహం పెడితే దృష్టి మరల్చడంతో అలాంటి వారి నుంచి ఎలాంటి హాని కలుగకుండా బయటపడవచ్చు.

ఒకే దిశలో ఉండవు..
వీధిపోటు ఉన్న ఇంటిలో నివసిస్తున్న వారందరికి వీధి పోటు ఫలితాలు ఒకేలా ఉంటాయని చెప్పలేం. దీనికి కారణం అన్ని దిక్కుల ఇళ్లకు ఒకే దిశలో వీధి పోట్లు ఉండవు. ఒకేలానూ ఉండవు. ఎదురుగా వచ్చే వీధి పోటు ఆయా ఇళ్లకు ఏ మూలో, మధ్యలో ఉండొచ్చు.. ఇల్లుకు పూర్తిగా, సగం ఇల్లు వీధి పోటుకు గురికావొచ్చు. తదనుగుణంగానే ఇంట్లో ఉండేవారిపై ప్రభావం మారుతుంది.

రూ.45 లక్షల లోపు ఇళ్లు కట్టేలా..

ఈనాడు, హైదరాబాద్‌: రియల్‌ ఎస్టేట్‌కు రెండు మూడు మినహా పెద్దగా ప్రోత్సాహకాలు ఈసారి బడ్జెట్‌లో లేవు. గృహ రుణం వడ్డీ చెల్లింపుపై లక్షన్నర వరకు పన్ను అదనపు మినహాయింపును మరో ఏడాది పొడిగించడం, అందుబాటు ధరల్లో ఆవాసాలు నిర్మించే బిల్డర్లకు పన్ను మినహాయింపు మార్చి, 2022 వరకు పొడిగింపు, అద్దె ఇళ్లకు ప్రోత్సాహకాల వంటివి పరిశ్రమకు ఉపయుక్తమేనని స్థిరాస్తి సంఘాల ప్రతినిధులు అన్నారు.
కొవిడ్‌ అనంతరం వస్తున్న బడ్జెట్‌ కావడంతో రాయితీలు, ప్రోత్సాహకాలు ఆశించినా అవేవి బడ్జెట్‌లో కన్పించలేదు. నిర్మాణ సామగ్రిపై జీఎస్‌టీ 28 శాతం నుంచి 18 శాతం వరకు ఉంది. వీటిని హేతుబద్ధీకరించాలని పరిశ్రమ ఎప్పటి నుంచో కోరుతోంది. పైగా ఇటీవల స్టీలు, సిమెంట్‌ ధరలు పెరగడంతో నిర్మాణ వ్యయం గణనీయంగా పెరిగింది. జీఎస్‌టీ తగ్గిస్తేనైనా ఊరట ఉంటుందని నిర్మాణదారులు ఆశించారు. వీరికి నిరాశే ఎదురైంది. ఇంటి కొనుగోలుదారులు పీఎంఏవై గడువు పొడిగింపుతో పాటూ మరిన్ని రాయితీలు ఉంటాయని ఆశించినా ఏవి బడ్జెట్‌లో కన్పించలేదు.
* అందరికి ఇల్లు నినాదం నేపథ్యంలో మొదటిసారి గృహ కొనుగోలుదారులను ప్రోత్సహించేందుకు సెక్షన్‌ 80ఈఈఎ ప్రయోజనాలను మరో ఏడాది పొడిగిస్తున్నట్లు బడ్జెట్‌లో చెప్పారు. మొదటిసారి గృహ కొనుగోలుదారులకు గృహరుణ వడ్డీ చెల్లింపులపై ఆదాయపు పన్ను మినహాయింపును అదనంగా రూ.1.50 లక్షల వరకు 2019లో తొలిసారి తీసుకొచ్చారు. అందుబాటు ఇళ్లకే అని ప్రకటించారు. సాధారణంగా సెక్షన్‌ 24 బి కింద రూ.2 లక్షల వడ్డీ వరకు పన్ను మినహాయింపు ఉంటుంది. దీంతో మూడున్నర లక్షల వరకు మినహాయింపు పొందవచ్చు. మార్చి 31, 2022 వరకు ఆ అవకాశం ఉంది.
* అందుబాటు ధరల్లో రూ.45 లక్షల లోపు ఇళ్ల నిర్మాణం చేపట్టేవారికి వచ్చే లాభాల్లో పన్ను మినహాయింపు మరో ఏడాది పొడిగించారు. అప్పటివరకు అనుమతి తీసుకున్నవాటికి ఇది వర్తిస్తుంది. దీంతో నగరంలో వీటి నిర్మాణాలు చేపట్టేందుకు మరింతమంది ముందుకొచ్చే అవకాశం ఉంది.

అదొక్కటే ఊరట..

ఈసారి బడ్జెట్‌లో పరిశ్రమ నుంచి చాలా ఆశించాం. కొవిడ్‌ అనంతరం ఆరోగ్యంపై, మౌలిక వసతుల కల్పనపై కేంద్రం ఎక్కువ దృష్టిపెట్టింది. రహదారులకు పెద్దపీట వేశారు. నగదు చలామణి పెంచేందుకు తీసుకున్న చర్యలు కన్పించాయి. స్థిరాస్తి రంగానికి కొత్తగా ప్రయోజనాలేమి లేకపోయినా.. కొవిడ్‌ సెస్సు వేయకపోవడం ఊరటే.

-వి.రాజశేఖర్‌రెడ్డి, ప్రధాన కార్యదర్శి, క్రెడాయ్‌ హైదరాబాద్‌

Tags :