Andhra News: వండి నోట్లో పెట్టలేం కదా!: డిప్యూటీ సీఎం కొట్టు సత్యనారాయణ

బాపట్ల, న్యూస్‌టుడే: ‘ప్రభుత్వం ఒక్కో పేద కుటుంబానికి రూ.లక్షల విలువైన స్థలం ఇచ్చి ఇల్లు కట్టుకోవడానికి రూ.1.80 లక్షల సాయంతో పాటు డ్వాక్రా మహిళలకు రూ.30వేల రుణం ఇప్పిస్తోంది. అయినా చాలామంది లబ్ధిదారులు గృహ నిర్మాణం చేపట్టకపోవడం సరికాదు...’ అని ఉపముఖ్యమంత్రి, జిల్లా ఇన్‌ఛార్జి మంత్రి కొట్టు సత్యనారాయణ పేర్కొన్నారు. బాపట్ల జిల్లా ప్రగతి సమీక్ష సమావేశం అనంతరం విలేకరులతో మాట్లాడారు. ప్రభుత్వం ఇస్తున్న సాయం ఏ మాత్రం సరిపోవడం లేదని, ఒక్కో ఇంటి నిర్మాణానికి కనీసం రూ.3.50 లక్షల వ్యయం అవుతోందని విలేకరులు ఆయన దృష్టికి తీసుకెళ్లగా.. ‘బియ్యం, కూరగాయలు ప్రభుత్వం ఇస్తే.. వండుకుని తినాల్సింది పేదలే. ప్రభుత్వమే వండి నోట్లో పెట్టలేదు కదా’ అని వ్యాఖ్యానించారు.