Supreme Court: చట్టసభల సభ్యులపై కేసుల్లో.. సత్వర విచారణ చేపట్టాలి

సుప్రీంలో ప్రజాప్రయోజన వ్యాజ్యం
అత్యవసర పరిశీలనకు అంగీకరించిన సీజేఐ జస్టిస్‌ ఎన్‌.వి.రమణ ధర్మాసనం

దిల్లీ: చట్టసభల సభ్యులపై నమోదైన క్రిమినల్‌ కేసుల్లో విచారణను వేగవంతం చేయాలంటూ సుప్రీంకోర్టులో ఓ పిటిషన్‌ దాఖలైంది. దీన్ని అత్యవసరంగా పరిశీలించేందుకు... ప్రధాన న్యాయమూర్తి జస్టిస్‌ ఎన్‌.వి.రమణ నేతృత్వంలోని ధర్మాసనం బుధవారం అంగీకరించింది. సీనియర్‌ న్యాయవాది, కోర్టు సహాయకులు విజయ్‌ హన్సారియా ఈ పిటిషన్‌ దాఖలు చేశారు. ప్రస్తుత, మాజీ ఎంపీలు, ఎమ్మెల్యేలు, ఎమ్మెల్సీలపై నమోదైన కేసుల వివరాలతో కూడిన తాజా నివేదికను దీనికి జత చేశారు. వీటిని పరిష్కరించేందుకు తక్షణ, కఠిన చర్యలు అవసరమని; సీబీఐ తదితర ఏజెన్సీల ద్వారా దర్యాప్తును వేగవంతం చేయాలని పిటిషనర్‌ అభ్యర్థించారు. ఈ వ్యాజ్యాన్ని పరిశీలిస్తామని ధర్మాసనం పేర్కొంది. జస్టిస్‌ ఎ.ఎస్‌.బోపన్న, జస్టిస్‌ హిమా కోహ్లిలు కూడా ఈ ధర్మాసనంలో ఉన్నారు. తాజా నివేదిక ప్రకారం- చట్టసభల సభ్యులపై మొత్తం 4,984 కేసులు అపరిష్కృతంగా ఉన్నాయి. వీటిలో 1,899 కేసుల విచారణ ఐదేళ్లు దాటింది.చట్టసభల సభ్యులపై నమోదైన కేసులను, సీబీఐ తదితర ఏజెన్సీల ద్వారా దర్యాప్తును వేగవంతం చేయాలని కోరుతూ... న్యాయవాది అశ్వినీ ఉపాధ్యాయ దాఖలుచేసిన కేసులో సుప్రీంకోర్టు ఎప్పటికప్పుడు ఆదేశాలు జారీచేస్తోంది.