తెదేపా నేత వ్యక్తిగత స్వేచ్ఛలో జోక్యం వద్దు

పోలీసులకు హైకోర్టు ఆదేశం

ఈనాడు, అమరావతి: తెదేపా నేత, డీసీసీబీ పూర్వ ఛైర్మన్‌ వరుపుల రాజా వ్యక్తిగత స్వేచ్ఛ, జీవించే హక్కులో జోక్యం చేసుకోవద్దని సీఐడీ, ఏపీ పోలీసులను హైకోర్టు ఆదేశించింది. ఇప్పటికే నమోదైన కేసుల్లో విచారణ అవసరం అనుకుంటే చట్ట నిబంధనలను పాటించాలని స్పష్టంచేసింది. హైకోర్టు న్యాయమూర్తి జస్టిస్‌ సీహెచ్‌ మానవేంద్రనాథ్‌రాయ్‌ బుధవారం ఈమేరకు ఆదేశాలు జారీచేశారు. తనపై తప్పుడు కేసులు పెట్టి పోలీసులు వేధిస్తున్నారని, వ్యక్తిగత స్వేచ్ఛలో వారి జోక్యాన్ని నిలువరించాలని కోరుతూ కాకినాడ జిల్లా ప్రత్తిపాడు నియోజకవర్గం తెదేపా ఇన్‌ఛార్జి వరుపుల రాజా హైకోర్టులో వ్యాజ్యం వేశారు. న్యాయవాది వీవీ సతీష్‌ వాదనలు వినిపిస్తూ.. పిటిషనర్‌ ‘మీ కోసం మీ ఇంటికీ మీ రాజా’ కార్యక్రమం నిర్వహిస్తున్నారన్నారు. ఆ కార్యక్రమాన్ని అడ్డుకోవాలని పోలీసులు చూస్తున్నారన్నారు. ఇప్పటికే నమోదు చేసిన మూడు కేసుల్లో హైకోర్టు పిటిషనర్‌కు రక్షణ కల్పించిందన్నారు. అయినా పోలీసులు ఇంటికెళ్లి వేధింపులకు గురిచేస్తున్నారని తెలిపారు.