సామగ్రి వెనక్కి ఇవ్వకుంటే పోలీసు కేసులు

ఆప్తాల్మిక్‌ అసిస్టెంట్లకు జిల్లా అధికారుల హెచ్చరిక

ఈనాడు, అమరావతి: కంటి వెలుగు కింద పథకం కింద పనిచేసే ఆప్తాల్మిక్‌ అసిస్టెంట్లు.. ట్యాబులు, స్క్రీనింగ్‌ బుక్స్‌, కళ్లజోళ్లు వెనక్కి ఇవ్వకుంటే పోలీసు కేసులు తప్పవని అధికారులు హెచ్చరిస్తున్నారు. తమకు 8 నెలలుగా వేతనాలు ఇవ్వకపోవడాన్ని నిరసిస్తూ వారు ఈనెల 16 నుంచి విధులు బహిష్కరించారు. ఈ నేపథ్యంలో వీరి నుంచి సామగ్రిని వెనక్కి తీసుకోవాలని రాష్ట్ర వైద్యారోగ్య శాఖ జిల్లా అధికారులను ఆదేశించింది. సామగ్రి వెనక్కి ఇవ్వకుంటే పోలీసు కేసుల నమోదు వరకు వెళ్లాల్సి ఉంటుందని గురువారం సమాచారం పంపారు. సామగ్రి తిరిగి ఇచ్చేస్తే తమను అసలు పట్టించుకోరని ఉద్యోగులు ఆందోళన చెందుతున్నారు. పైగా పోలీసు కేసుల గురించి మాట్లాడటం ఎంతవరకు సమంజసమని వారు ప్రశ్నిస్తున్నారు.