Dubai: ఎడారి దేశంలో పాలరాతి ఆలయం

దుబాయ్‌లోని జెబెల్‌అలీలో ‘ఆరాధన గ్రామం’
ప్రత్యేక ఆకర్షణగా నిలుస్తున్న శ్రీవేంకటేశ్వరుడి విగ్రహం

ఈనాడు, అమరావతి: ఎడారి దేశం దుబాయ్‌లో హిందువుల కోసం ప్రత్యేకంగా పాలరాతితో నిర్మించిన దేవాలయం సందర్శకులను ఆకట్టుకుంటోంది. ఆలయానికి అనుమతులతోపాటు నిర్మాణంలోనూ యూఏఈ పాలకులు సహాయం అందించారు. దుబాయ్‌లోని జెబెల్‌అలీలో నిర్మించిన ఈ దేవాలయానికి ఎన్నో ప్రత్యేకతలున్నాయి. 9 మతపరమైన పుణ్యక్షేత్రాలను కలిపి ‘ఆరాధన గ్రామం’ పేరుతో ఆలయాన్ని నిర్మించారు. ఆలయంలో 16 దేవతా విగ్రహాలుండగా.. శ్రీవేంకటేశ్వరస్వామి విగ్రహం భక్తులను అమితంగా ఆకట్టుకుంటోంది. మందిరం మధ్యలో ఏర్పాటుచేసిన పెద్ద 3డీ ప్రింటెడ్‌ తామరపువ్వు ప్రత్యేక ఆకర్షణగా నిలుస్తోంది. ఈ ఆలయంలోనే సిక్కుల పవిత్రగ్రంథం గురుగ్రంథ్‌ సాహిబ్‌ సైతం ఉంది. దుబాయ్‌కు వెళ్లే భారతీయుల సంఖ్య రోజురోజుకూ పెరుగుతున్నందున మన దేశంతో ఉన్న అనుబంధాన్ని చాటుకునేలా యూఏఈ పాలకులు ఈ ఆలయాన్ని నిర్మించారు. వివిధ దేశాల నుంచి తెచ్చిన పాలరాతితో కట్టిన దేవాలయం భక్తులను ఆకర్షిస్తోంది. ఇటీవల దీన్ని దుబాయ్‌ మంత్రి షేక్‌ నహ్యాన్‌ బిన్‌ ముబారక్‌ అల్‌ నహ్యాన్‌ ప్రారంభించారు. ఈ వేడుకకు వివిధ మతాల నాయకులు, యూఏఈ ప్రభుత్వ ఉన్నతాధికారులు, దౌత్యవేత్తలు హాజరయ్యారు.

అద్భుతంగా నిర్మించారు

‘పాలరాతితో నిర్మించిన దేవాలయం చాలా అద్భుతంగా ఉంది. కట్టడాలు అమోఘంగా ఉన్నాయి. 16 రకాల దేవతా పాలరాతి విగ్రహాలు ఒక్కచోటే చూసే అవకాశం లభిస్తుంది.’

- డాక్టర్‌ సమాల సుధ మోహర్‌, తెలంగాణ ప్రవాసీ దుబాయ్‌

పర్యాటలకు కొత్త అనుభూతి

‘తెలుగు రాష్ట్రాల నుంచి దుబాయ్‌కి వచ్చే పర్యాటకులు సందర్శిస్తే కొత్త అనుభూతి కలుగుతుంది. ఆలయనిర్మాణం, దేవుళ్ల విగ్రహాలు చాలా బాగున్నాయి. అనుమతులిచ్చి, ప్రారంభించిన దుబాయ్‌ పాలకులకు ధన్యవాదాలు.’

- మోనిక ముక్కు, భక్తురాలు, దుబాయ్‌