ట్రిపుల్‌ ఐటీల్లో సీట్లన్నీ భర్తీ

నూజివీడు, న్యూస్‌టుడే: ఏపీ ఆర్జీయూకేటీ పరిధిలోని నూజివీడు, ఇడుపులపాయ, శ్రీకాకుళం, ఒంగోలు ట్రిపుల్‌ ఐటీల్లో 2022-23 విద్యా సంవత్సరానికి అన్ని సీట్లు భర్తీ అయినట్లు ఆర్జీయూకేటీ కులపతి ఆచార్య కేసీరెడ్డి తెలిపారు. ఆదివారం నూజివీడు ప్రాంగణంలో నిర్వహించిన ఆఖరి విడత కౌన్సెలింగ్‌లో 121 సాధారణ, 20 క్రీడా కోటా సీట్లను భర్తీ చేశారు. దీంతో మొత్తం 4 ప్రాంగణాల్లోని 4,400 సీట్లు భర్తీ అయ్యాయి. అఖరి విడత కౌన్సెలింగ్‌లో ప్రవేశాలు పొందిన విద్యార్థులకు కులపతి గుర్తింపు కార్డులు అందజేశారు. కార్యక్రమంలో ప్రవేశాల కన్వీనర్‌ ఎస్‌ఎస్‌ఎస్‌వీ గోపాలరాజు పాల్గొన్నారు.