అనంతపురం-గుంటూరు ఎన్‌హెచ్‌లో 2 ప్యాకేజీల టెండర్లు ఖరారు

పనులు దక్కించుకున్న ఎస్‌ఆర్‌సీ, మేఘ

ఈనాడు-అమరావతి: అనంతపురం-గుంటూరు జాతీయ రహదారి-544డి విస్తరణలో భాగంగా రెండు ప్యాకేజీల్లో టెండర్లు ఖరారు అయ్యాయి. వీటిలో తొలి ప్యాకేజీ ఎస్‌ఆర్‌సీ ఇన్‌ఫ్రా, రెండవది మేఘ ఇంజినీరింగ్‌ సంస్థలు దక్కించుకున్నాయి. నాలుగు వరసల కింద నిర్మించనున్న ఈ రహదారికి హైబ్రీడ్‌ యాన్యూటీ మోడ్‌ (హ్యామ్‌) కింద ఎన్‌హెచ్‌ఏఐ టెండర్లు పిలిచింది. వీటి ధరల బిడ్లు గురువారం తెరిచారు.

* మొదటి ప్యాకేజీలో భాగంగా అనంతపురం శివారు పామురాయి నుంచి ముచ్చుకోట వరకు 39.380 కి.మీ.మేర రూ.684.03 కోట్ల అంచనా వ్యయంతో టెండరు పిలిచారు. ఇందులో అంచనా కంటే 1.12 శాతం తక్కువకు కోట్‌చేసిన ఎస్‌ఆర్‌సీ ఇన్‌ఫ్రా డెవలపర్స్‌ ఎల్‌-1గా నిలిచి పని దక్కించుకుంది. అంచనా కంటే 0.90 శాతం తక్కువకు కోట్‌చేసిన మేఘ ఇంజినీరింగ్‌ సంస్థ ఎల్‌-2 నిలిచింది.

* రెండో ప్యాకేజీలో ముచ్చుకోట నుంచి బుగ్గ వరకు 32 కి.మీ. మేర రూ.738.82 కోట్ల అంచనా విలువతో టెండరు పిలిచారు. ఇందులో అంచనా కంటే 0.74 శాతం తక్కువకు కోట్‌చేసిన మేఘ ఇంజినీరింగ్‌ సంస్థ ఎల్‌-1గా నిలిచి ఈ పని దక్కించుకుంది.

* రెండేళ్లలో ఈ పనులు పూర్తిచేయాల్సి ఉంటుంది.