పోలీసుల నిర్లక్ష్యం వల్లే తపస్వి ప్రాణాలు పోయాయి

డీజీపీకి తెదేపా అధినేత చంద్రబాబు లేఖ

ఈనాడు డిజిటల్‌, అమరావతి: పోలీసుల నిర్లక్ష్యం వల్లే గుంటూరు జిల్లా, పెదకాకాని మండలం, తక్కెళ్లపాడు గ్రామంలో దంత వైద్య విద్యార్థిని తపస్వి హత్యకు గురయ్యారని తెదేపా అధినేత చంద్రబాబు ధ్వజమెత్తారు. జ్ఞానేశ్వర్‌ అనే వ్యక్తి ప్రేమ పేరుతో తనను వేధిస్తున్నాడని యువతి ఫిర్యాదు చేసినా పోలీసులు ఎలాంటి చర్యలూ తీసుకోలేదని మండిపడ్డారు. ఘోరమైన దాడులు జరిగాకే ప్రభుత్వం స్పందిస్తోందని విమర్శించారు. ఈ మేరకు రాష్ట్ర డీజీపీకి గురువారం ఆయన లేఖ రాశారు. ‘పోలీసుల శాంతిభద్రతల వైఫల్యం కారణంగా రాష్ట్రంలో నేరాలు పెరిగిపోయాయి. గతేడాది రమ్య హత్య మరచిపోక ముందే గుంటూరులో అదే తరహా ఘటన మరొకటి జరగడం శోచనీయం.  నిందితుడ్ని కఠినంగా శిక్షించాలి’ అని చంద్రబాబు డిమాండ్‌ చేశారు. 

* హత్యకు గురైన దంతవైద్య విద్యార్థిని తపస్వి తల్లిదండ్రులు సీతారత్నం, పి.మహేశ్‌కుమార్‌లను చంద్రబాబు గురువారం ఫోన్‌లో పరామర్శించారు. కుమార్తె మరణంతో తీవ్ర విషాదంలో ఉన్న వారిని ఓదార్చారు.