ఓపెన్‌ స్కూల్‌ ఫలితాల విడుదల

పదిలో 55.81%, ఇంటర్‌లో 65.77% ఉత్తీర్ణత

ఈనాడు డిజిటల్‌, అమరావతి: ఆంధ్రప్రదేశ్‌ సార్వత్రిక విద్యాపీఠం (ఓపెన్‌ స్కూల్‌ సొసైటీ) పది, ఇంటర్‌ ఫలితాలను పాఠశాల విద్యాశాఖ కమిషనర్‌ సురేష్‌కుమార్‌ గురువారం విడుదల చేశారు. పదో తరగతిలో 55.81 శాతం, ఇంటర్‌లో 65.77 శాతం మంది విద్యార్థులు ఉత్తీర్ణులయ్యారు. పది పరీక్షలకు 32,581 మంది హాజరుకాగా.. వారిలో 18,185 మంది పాసయ్యారు. ఇంటర్‌ పరీక్షలను 73,550 మంది రాయగా 48,377 మంది ఉత్తీర్ణులయ్యారు. సప్లిమెంటరీ పరీక్షలు జూన్‌ ఒకటి నుంచి 8 వరకు నిర్వహించనున్నట్లు సార్వత్రిక విద్యాపీఠం సంచాలకుడు నాగేశ్వరరావు తెలిపారు. దానికి సంబంధించిన ఫీజును ఏప్రిల్‌ 29 నుంచి మే 10 వరకు చెల్లించవచ్చని ఆయన వెల్లడించారు. పునః మూల్యాంకనం, లెక్కింపునకు ఏప్రిల్‌ 29 నుంచి మే 7 వరకు అవకాశం కల్పించినట్లు పేర్కొన్నారు.