ఈసారి పింఛనుకు పడవ ప్రయాణం చేయాల్సిందే!

సూళ్లూరుపేట, న్యూస్‌టుడే: రాష్ట్ర ప్రభుత్వ ఆదేశాలతో ఈసారి బ్యాంకు ఖాతా ద్వారా పింఛను పొందేందుకు తీరప్రాంత వాసులు పడవ ప్రయాణం చేయాల్సి వస్తోంది. తిరుపతి జిల్లా తడ మండలంలోని ఇరకం దీవి ప్రజలు మండల కేంద్రంలోని బ్యాంకులకు చేరుకోవాలంటే పులికాట్‌ సరస్సులోంచి వెళ్లాల్సిందే. ఈ గ్రామంలో 234 మంది పింఛను లబ్ధిదారులున్నారు. వీరికి నేరుగా గ్రామంలోని సిబ్బంది పింఛను సొమ్ము అందజేసే వీలున్నా.. ఆ దిశగా చర్యలు తీసుకోలేదు. 26 మందికి మాత్రమే ఇంటివద్ద పింఛను అందించేలా అధికారులు చర్యలు చేపట్టారు. మిగిలిన 208 మంది దాదాపు 15 కిలోమీటర్ల దూరంలోని తడలో బ్యాంకులకు వచ్చి సొమ్ము తీసుకోవాల్సి ఉంటుంది. దీంతో వీరికి రానుపోను, బ్యాంకుల వద్ద పడిగాపులకే రోజంతా వృథా అయిపోతుంది.