Delhi: కోర్టులో సినిమా డైలాగ్‌ కొట్టి.. ఫర్నిచర్‌ విరగొట్టి!

దిల్లీ: చాలా సినిమాల్లో మనం కోర్టు సీన్లు చూశాం. కానీ.. ఓ వ్యక్తి కోర్టులోనే సినిమాని తలపించే విధంగా ఓ చిత్రంలోని డైలాగ్‌ చెప్పి, ఫర్నిచర్‌ విరగొట్టాడు. ఇంతకీ అసలేమైందంటే.. దిల్లీలోని శాస్త్రీనగర్‌కు చెందిన రాకేశ్‌ 2016నాటి ఓ కేసుకు సంబంధించి కర్కర్దూమా కోర్టులో విచారణకు హాజరవుతున్నాడు. ఐదేళ్లుగా విచారణ కొనసాగుతున్నా.. తీర్పు రాకపోవడంతో అసహనానికి గురయ్యాడు. ఇటీవల మరోసారి కోర్టులో విచారణకు హాజరైన రాకేశ్‌ విచారణ వాయిదాల మీద వాయిదాలు పడుతుండటంతో ఆగ్రహంతో ఊగిపోయాడు. బాలీవుడ్‌ సినిమా ‘దామిని’లో నటుడు సన్నీ దేఓల్‌ చెప్పిన ‘తారీఖ్‌ పర్‌ తారీఖ్‌(రోజు తర్వాత రోజు)’ డైలాగ్‌ చెబుతూ.. కోర్టులో ఉన్న ఫర్నిచర్‌, కంప్యూటర్లను ధ్వంసం చేశాడు. న్యాయమూర్తి డయాస్‌ను కూడా విరగొట్టాడు. దీంతో పోలీసులు అతడిని అదుపులోకి తీసుకుని పలు సెక్షన్ల కింద కేసు నమోదు చేసి జైలుకు పంపించారు.