Airhostess death case: బాల్కనీ పైనుంచి జారిపడి ఎయిర్‌హోస్టెస్‌ మృతి.. బాయ్‌ఫ్రెండ్‌ అరెస్టు!

బెంగళూరు: బెంగళూరు(Bengaluru)లో అపార్ట్‌మెంట్‌ నాలుగో అంతస్తు బాల్కనీ నుంచి కిందకు పడి ఎయిర్‌ హోస్టెస్‌(Airhostess) అర్చనా ధిమన్‌ (28) శనివారం మృతి చెందిన కేసులో పోలీసులు దర్యాప్తును ముమ్మరం చేశారు. ఈ కేసులో ఆమె బాయ్‌ ఫ్రెండ్‌పై హత్యా నేరం కింద కేసు నమోదు చేసి అరెస్టు చేశారు. ఎయిర్‌ హోస్టెస్‌గా పనిచేస్తోన్న అర్చన.. ఈ ఘటన జరగడానికి నాలుగు రోజుల ముందే దుబాయి నుంచి బెంగళూరుకు వచ్చారు. ఆమె తన బాయ్‌ఫ్రెండ్‌, సాఫ్ట్‌వేర్‌ ఇంజినీర్‌ ఆదేశ్‌తో కలిసి కోరమంగల ఎనిమిదో బ్లాక్‌లోని ఓ అపార్టుమెంట్‌లో సహజీవనం చేస్తున్నారు.  

వీరిద్దరికీ ఓ డేటింగ్‌ సైట్‌ ద్వారా పరిచయం కావడంతో గత ఆరు నెలలుగా రిలేషన్‌షిప్‌లో ఉన్నట్టు ఆదేశ్‌ పోలీసుల విచారణలో  వెల్లడించాడని దర్యాప్తు అధికారులు తెలిపారు.  ఇద్దరి మధ్య తరచూ గొడవలు వస్తుండేవని.. ఈ ఘటన జరిగిన రాత్రి ఇద్దరూ  మద్యం తాగినట్టు చెప్పాడని పోలీసులు పేర్కొన్నారు. బాల్కనీ నుంచి ప్రమాదవశాత్తు  జారి అర్చన  కిందకు పడిపోయిందని.. ఆస్పత్రికి తరలించగా అప్పటికే ప్రాణాలు కోల్పోయినట్టు ఆదేశ్‌ పోలీసులకు వివరించాడు. ఈ ఘటనలో అతడి ప్రమేయంపై అనుమానాలు వ్యక్తం చేస్తున్న పోలీసులు హత్యానేరం కింద కేసు నమోదు చేసి కస్టడీలోకి తీసుకున్నారు.  పోస్టుమార్టం నివేదిక వచ్చిన తర్వాత తదుపరి చర్యలు తీసుకోనున్నట్టు తెలిపారు.