Crime news: పానీపూరీ తింటున్న ముగ్గురు అక్కా చెల్లెళ్లపైకి దూసుకొచ్చిన కారు.. ఒకరి మృతి!

నోయిడా: రోడ్డు పక్కన పానీపూరీ తింటున్న అక్కాచెల్లెళ్లపైకి కారు దూసుకెళ్లిన ఘటనలో ఓ చిన్నారి ప్రాణాలు కోల్పోయింది. నోయిడాలోని సదర్‌పూర్‌ ప్రాంతంలో ఈ ప్రమాదం చోటుచేసుకుంది. మద్యం మత్తులో డ్రైవర్‌ కారును నడపడం వల్ల జరిగిన ఈ దుర్ఘటనలో రియా అనే ఆరేళ్ల చిన్నారి ప్రాణాలు కోల్పోయింది. ఈ ఘటనపై పోలీసులు తెలిపిన వివరాల ప్రకారం.. నోయిడాలోని సెక్టార్‌ -45 సదర్‌పూర్‌ గ్రామంలో శనివారం ఈ ఘటన చోటుచేసుకుంది. ముగ్గురు అక్కా చెల్లెళ్లు రియా(6), అను(15), అంకిత(18) కలిసి పానీపూరీ తింటున్న సమయంలో వేగంగా దూసుకొచ్చిన కారు వీరిని ఢీకొట్టింది. ఈ ప్రమాదంలో తీవ్ర గాయాలు కావడంతో వారిని ఆస్పత్రికి తరలించగా.. చికిత్సపొందుతూ రియా ఈరోజు ప్రాణాలు కోల్పోయినట్టు వెల్లడించారు. అనూ అనే బాలిక వెన్నెముక దెబ్బతినగా.. అంకితకు స్వల్పంగా గాయాలయ్యాయని తెలిపారు. ఈ బాలికల తల్లి కూడా ఆ పరిసరాల్లోనే ఉన్నప్పటికీ ఆమె ఈ ప్రమాదం నుంచి తృటిలో తప్పించుకోగలిగిందన్నారు. నలుగురు వ్యక్తులతో వెళ్తున్న కారు అక్కడే పేర్చిన ఇటుకల్ని బలంగా ఢీకొట్టగా.. వీధివ్యాపారి బండి బోల్తా పడింది. దీంతో అక్కకి పెద్ద సంఖ్యలో చేరుకున్న జనం డ్రైవర్‌ను పట్టుకొని పోలీసులకు అప్పగించారు.