Visakhapatnam: నడి సంద్రంలో బోటులో అగ్ని ప్రమాదం.. 9 మంది మత్స్యకారులకు గాయాలు

విశాఖ వన్‌టౌన్: చేపలవేటకు వెళ్లిన బోటు నడిసంద్రంలో అగ్ని ప్రమాదానికి గురైంది. విషయం తెలిసిన వెంటనే కోస్టుగార్డు నౌక రంగంలోకి దిగి బోటులోని మత్స్యకారులను రక్షించింది. వివరాలు ఇలా ఉన్నాయి.. కాకినాడ జిల్లా ఏటిమొగకు చెందిన 9 మంది మత్స్యకారులు గత నెల 24న కాకినాడకు చెందిన శ్రీదుర్గాభవాని బోటులో చేపల వేటకు బయలుదేరారు. శుక్రవారం విశాఖ తీరానికి 20నాటికల్‌ మైళ్ల దూరంలో వేట సాగిస్తుండగా జనరేటర్‌లో మంటలు చెలరేగి బోటును చుట్టుముట్టాయి. సమాచారం అందుకున్న కోస్ట్‌గార్డ్‌ నౌక ‘వీర’ వెంటనే అక్కడికి చేరుకుని మంటల్లో చిక్కుకున్న మత్స్యకారులను రక్షించింది. కోస్ట్‌గార్డ్‌ డీఐజీ రాజేష్‌ మిత్తల్‌ పర్యవేక్షణలో సహాయక కార్యక్రమాలు జరిగాయి. గాయపడ్డ వారిలో ఇద్దరి పరిస్థితి విషమంగా ఉండగా.. మరికొంత మంది స్పల్పంగా గాయపడ్డారు. క్షతగాత్రులను కేజీహెచ్‌కు తరలించి చికిత్స అందిస్తున్నట్లు మత్స్యశాఖ విశాఖ జిల్లా సహాయ సంచాలకులు విజయకృష్ణ తెలిపారు.