గుత్తి క్వారంటైన్‌ కేంద్రం వద్ద ఉద్రిక్తత 

రాళ్లు రువ్విన బాధితులు 
కానిస్టేబుల్‌కు స్వల్ప గాయాలు

గుత్తి: అనంతపురం జిల్లా గుత్తిలోని శ్రీకృష్ణదేవరాయల ఇంజినీరింగ్‌ కళాశాలలో ఏర్పాటు చేసిన క్వారంటైన్‌ కేంద్రం వద్ద ఉద్రికత్త చోటు చేసుకుంది. క్వారంటైన్‌లో ఉన్న మహారాష్ట్రకు చెందిన కొందరు తమను స్వస్థలానికి పంపాలని డిమాండ్‌ చేస్తూ సోమవారం సాయంత్రం పోలీసులపై రాళ్లు రువ్వారు. ఈ సంఘటనలో అలీ అనే కానిస్టేబుల్‌కు స్వల్ప గాయాలయ్యాయి. మహారాష్ట్రకు చెందిన సుమారు 50 మంది గత 14 రోజులుగా క్వారంటైన్‌లో ఉంటున్నారు. తమకు కరోనా లక్షణాలు లేవని వైద్యులు ధ్రువీకరించినప్పటికీ సొంత గ్రామాలకు పంపడం లేదని అధికారులతో వాదనకు దిగారు. విషయం తెలుసుకున్న గుత్తి పోలీసులు పరిస్థితిని చక్కదిద్దేందుకు క్వారంటైన్‌కు వెళ్లగా ఆగ్రహం వ్యక్తం చేస్తూ వారిపై రాళ్లు రువ్వారు. రాత్రి కలెక్టర్‌ గంధం చంద్రుడు రానున్నారని, స్వస్థలాలకు వెళ్లేందుకు ఏర్పాట్లు చేస్తామని అధికారులు, పోలీసులు హామీ ఇచ్చారు.