రాత్రివేళ ద్విచక్ర వాహనాల చోరీ

తిరుపతి(నేరవిభాగం), న్యూస్‌టుడే: రాత్రి వేళల్లో ద్విచక్ర వాహనాలు చోరీ చేసే ఐదుగురు దొంగలను అరెస్టు చేసినట్లు తిరుపతి తూర్పు సబ్‌ డివిజన్‌ పోలీసు అధికారి మురళీకృష్ణ తెలిపారు. ఆదివారం సాయంత్రం మంగళం పోలీసు అవుట్‌ పోస్టులో జరిగిన విలేకరుల సమావేశంలో నిందితుల వివరాలు వెల్లడించారు. ఆదివారం ఉదయం వచ్చిన సమాచారం మేరకు అలిపిరి - జూపార్కు రోడ్డులో ఐదుగురిని అదుపులోకి తీసుకుని విచారించారు. తిరుపతి కొర్లగుంటకు చెందిన మట్లి రామకృష్ణ (21), పీలేరు మండలం గుర్రంవారిపల్లికి చెందిన రొంపిచెర్ల హరిప్రసాద్‌ (24), చంద్రగిరి పాతపేటకు వాసి పాలపాటి అకిలేశ్వర్‌ రెడ్డి(24), తిరుపతి గాంధీపురానికి చెందిన పసుపర్తి హర్షవర్ధన్‌(19), తిరుచానూరు సమీపంలోని పాడిపేటకు చెందిన ఎ.రాజేష్‌ (21)గా గుర్తించారు. వారిని విచారించగా అలిపిరి, తిరుపతి తూర్పు, ఎంఆర్‌పల్లి, శ్రీకాళహస్తి 1టౌన్‌, 2టౌన్‌, చంద్రగిరి, తిరుచానూరు, సూళ్లూరుపేట పోలీస్‌స్టేషన్ల పరిధిలో రాత్రి వేళ ద్విచక్ర వాహనాలు దొంగిలించినట్లు అంగీకరించారు. వారి నుంచి రూ.7.50 లక్షల విలువైన 15 ద్విచక్ర వాహనాలు స్వాధీనం చేసుకున్నారు. కేసు ఛేదనలో ప్రతిభ కనబరిచిన అలిపిరి సీఐ అబ్బన్న, ఎస్‌ఐ చిన్న రెడ్డెప్ప, సిబ్బంది రవిరెడ్డి, ప్రసాద్‌, రాజశేఖర్‌ను అభినందిస్తున్నట్లు డీఎస్పీ తెలిపారు.