బస్సులో ప్రయాణికుడి అసభ్య ప్రవర్తన.. వీడియో తీసి అరెస్టు చేయించిన యువతి

కొచ్చి: బస్సులో తన పట్ల అసభ్యంగా ప్రవర్తిస్తున్న వ్యక్తి చేష్టలను వీడియో తీసి పోలీసులకు పట్టించిందో యువతి. కేరళ ఎర్నాకుళం జిల్లాలో ఈ ఘటన చోటుచేసుకుంది. ఆ యువతి బుధవారం బస్సులో వెళ్తుండగా, నిందితుడు సయ్యద్‌ ఆమె పక్క సీట్లో కూర్చొని అసభ్యంగా తాకడంతోపాటు తన మర్మాంగాన్ని బహిర్గతం చేసి వెకిలి చేష్టలకు పాల్పడ్డాడు. దీనిపై ఆ యువతి సయ్యద్‌ను నిలదీసింది. మొబైల్‌ ఫోన్‌తో వీడియో తీస్తూ ప్రశ్నించింది. పారిపోబోతున్న నిందితుణ్ని కండక్టరు సాయంతో పట్టుకుని పోలీసులకు అప్పగించింది. అనంతరం ఆ వీడియోను సామాజిక మాధ్యమాల్లో పోస్ట్‌ చేయడంతో వైరల్‌గా మారింది.